IA: Attartornermut inatsit nutaaq ilaqutariinnut meerartalinnut aamma illersuutaassaaq

Inissianik attartornermut inatsisissatut siunnersuummik Naalakkersuisut saqqummiipput. Inatsisit atuuttut ataatsimoortinnissaat, nutarsarnissaat ineqarnermilu malittarisassat paasinarnerulernissaat siunertarineqarpoq. 

Ane Hansenili Inuit Ataqatigiit sinnerlugit Inatsisartunut ilaasortaq isumaqarpoq inatsisissatut siunnersuut inunnik isumaginninneq eqqarsaatigalugu siamasinnerusumik isigineqartariaqaraluartoq.

Ilaqutariit ineqarnermut akiligassaminnik kinguaattoortut iniminnit anisitaasinnaapput, ilaannilu tamanna meeqqanut sunniuteqartarpoq.

– Inuit Ataqatigiinni isumaqarpugut ilaqutariit meerartallit pineqartillugit inunnik isumaginninnermi inatsisit aamma ineqarnermut inatsisit ataqatigiinnerusariaqartut.

Meeqqanut kingunerisinnaasai ernummatigai

Pisut iIaqutariinni aningaasatigut ajornartorsiornermik aqqusaagaqarfiusut, atornerluinermik sumiginnaanermillu peqquteqanngikkaluartut Ane Hansenip maluginiaqquai.

- Ilaqutariit inissaaruppata meerartaat angajoqqaavannit peersinneqarsinnaasarput, ilaqutariit angajoqqaalluunniit imigassamik hashimilluunnit ajornartorsiuteqanngikkaluartut. Aamma angajoqqaat meeqqaminnik sumiginnaanngikkarluartut, taanna oqarpoq.

Ane Hansen naapertorlugu ilaqutariit ajornartorsiutaasa annertusivallaannginneranni naammattumik ikiorserneqarsinnaanerat inatsisitigut periarfissinneqarnersoq misissorneqartariaqarpoq.

- Ilaqutariit ikiorneqarnissamut periarfissaqarnerulernissaat kissaatigaarput, nalunngilarput meeqqat angerlarsimaffiup avataanut inissinneqarnerat akisusinnaasartoq, aningaasatiguinnaanngitsoq aammali misigissutsikkut.

Meeqqanut kingunerluutaasinnaasut annertusinnaanerat erseqqissarpaa.

- Meeqqanut tuttarpoq, misigisallu sakkortuut kingunerluuteqarsinnaapput. Ilaqutariinnit ilaqutariinnut nuutinneqaqattaarneq misigisinnaavaat, ajornerpaamillu pisoqartillugu meeqqat angerlarsimaffianut nuutsinneqarlutik.

Siusinnerusukkut ikiorserneqarnissaq kissaatigaa

Inuit Ataqatigiit isumaqarput ilaqutariit aningaasatigut ajornartorsiutaat angerlarsimaffimmik annaasaqarnermik kinguneqartinnagit iliuuseqartoqartassasoq.

Napparsimanermik imaluunniit annaasaqarnermik peqquteqartumik ilaqutariit aningaasaqarnikkut inissisimanerat allangoriataarsinnaasoq Ane Hansen assersuuteqarluni tikkuaavoq.

- Ilaqutariit ingerlalluaraluarlutik nappaammik allamilluunnit nalaataqarunik malinnaasinnaajunnaarsinnaapput.

- Taamaattoqartillugu ilaqutariit ajornartorsiutaat annertusivallaartinnagit ikiorneqarsinnaasariaqarput. Akerlianik meerartaat angerlarsimaffiup avataanut inissinneratigut artukkernerunagit tapersersorneqartariaqarput.

Ineqarnermut tapiissutit allanngorartinneqarsinnaasariaqarpoq

Inuit Ataqatigiit tikkuagaasa aalajangersimasut ilagaat ineqarnermut tapiissutit.

Attartornermut inatsissatut siunnersuummut oqaaseqaamminni Inuit Ataqatigiit allapput Naalakkersuisut ineqarnermut tapiissutinik suliaqarnerminnik naammassinninnissaat "pisariaqarluinnalersoq".

Aaqqissuussineq eqqaannerullunilu ilaqutaarit aningaasaqarnerisa allanngorsinnaanerat sillimaffigineqarnerusariaqartoq, Ane Hansen isumaqsrpoq.

Ane Hansenip isumaa naapertorlugu ilaqutariit qanoq ikiorserneqarsinnaanerat aamma isumaliutigineqartariaqarpoq.

– Nalunngilarput ineqarnermut tapiissutit kommunimut nammineq qinnuteqartartut. Tamaattoqarnera eqaannerusinnaasutut isigaarput, taamaalilluni anisitaanissaq pinngitsoortinneqarsinnaammat.

Ilaqutariit meerartallit ikiorusunneruai

Inigisamik annaasaqarnerup kingunerisaanik isumaginninnikkut kingunerluutit inatsisitigut naammaginartumik qulakkeerneqarnersut Inuit ataqatigiinnit apeqquserneqarpoq.

Ane Hansen erseqqissaavoq angerlarsimaffiup avataanut inissiinernik tamanik pinngitsoortitsiniaaneq partiip isumaanniinngitsoq.  

-Meeqqap angerlarsimaffiup avataanut inissinneqarnissaat soorunami ilaanni pisariaqartarpoq. Tamanna pinngitsoortissinnaangilarput. Pisunili allani aaqqissutissanik nassaartoqarsinnaasariaqarpoq.

- Ilaqutariit meerartallit ikiorusunneruagut, angajoqqaat inigisaminnut akissaqanngippata ilungersunartumillu allamik peqquteqanngippat meeqqat angajoqqaaviniit peersinnagit inatsisitigut ajunnginnerusumik aqqutissiukkusuppagut.

Ajornartorsiutinik siusinnerusukkut iliuuseqarnissamut periarfissiisunik inatsiseqarnissaa taamaammat ujartorpaa.

- Ajornartorsiutit unammillernartullu paasineqarneranni ilaqutariit qanoq ikiorneqarnissaannut sinaakkusiisunik inatsiseqartariaqarpoq.

Inissianik attartornermut inatsisissatut siunnersuut oktobarip 21-ani Inatsiartuni aappassaaneerneqassaaq.