ICC-mi Sara Olsvigip kingoraartissaa qinerneqarpoq

Taamaasilluni pisortatigoortumik siulittaasuuffik Kalaallit Nunaannit Canadamut nuunneqarpoq.

Aluki Kotierk ilaatigut FN-ip Nunap Inoqqaavi pillugit Ataatsimiisitaliaanut siulittaasuusoq, aammattaaq Nunavut Tunngavik Incorporated-imi 2016-imiit 2024-mut præsidentiusimasoq, ICC tusagassiutitigut nalunaarummi allappoq.

Sulinermigut naggueqatigiit Inuit pisinnaatitaaffii pillugit nunagisamini nunanilu tamalaani annertuumik illersuisuusoq, ICC allappoq.

ICC-mi siulittaasutut kiffartuussinissamut periarfissaqarnini ataqqinaatigalugulu qujamasuutigalugu, Aluki Kotierk oqarpoq:

– Nunat tamalaat akornanni katersuuttarfiit aqqutigalugit naggueqatigiit Inuit sinnerlugit illersuisarnissama nangeqqinnissaa immikkut pisussaaffittut isigaara. Sara Olsvigip siuttuunerata kattuffitta isigineqarneranut annertuumik sunniuteqarluarsimavoq, suliassallu pillugit naammassisaqarsinnaanera annertuumik aqqutissiorsimallugu, siulittaasunngortoq oqarpoq.

Kattuffimmi siulittaasutut kiffartorsimanini pillugu, siulittaasuujunnaartup, Sara Olsvigip, ataatsimeersuariartunut qujamasunnini ersersippaa:

- Ataatsimeersuarneq manna pikkunarlunilu ingerlalluarsimavoq. ICC-mit aallartitat naggueqatigiit Inuit sinniisuunermikkut norsatut assersuunneqarsinnaapput. Norsaq atorlugu aalajangiisarnitsigut aamma nalunaarusiamik suliaqarnitsigut siumut ingerlaqqinnissatsinnut ajatsissutigisarparput, taamatullu ICC-p tulliani ataatsimeersuarnissaata tungaanut toraajutsissutigisarparput.

- Taamaattumik ICC tuukkatut ippoq, piniakkap amiata iluanut nikittussaajunnaarluni pulalluni ikkuttartoq. Aallartitat toraarfissatsinnut tikkuussisarput, taamatullu ICC nunarsuarmut appakaatsittarlugu, katersuuttarfinnilu uagut pilluta aalajangiiffissanut tunngassutilinni tuukkartullusooq ikkussisarput. ICC nunat tamalaat akornanni isumaqatiginninniartuni akuunissamut kimigiisertuassaaq, ilaatigut inini uagutsinnut tikilluaqqusaaffiunngikkaluartuni allaat, taakkununngami allaat akuunissamut aamma inoqatitta peqqusimammatigut. , Sara Olsvig oqarpoq.

ICC Internationalip siulersuisui maanna ima isikkoqarput:

• Siulittaasoq: Aluki Kotierk

• Siulittaasoq: Aluki Kotierk

• Alaska: Siulittaasoq Marie Greene aamma siulittaasup tullia Nicole Kanayurak Wojciechowski,

• Canada: Siulittaasoq Herb Nakimayak aamma siulittaasup tullia Natan Obed (nunat tamalaat akornanni), siulersuisuunerni ilaasortatut inissikkallartoq,

• Chukotka: Siulittaasoq Irina Meshcheriakova aamma siulittaasup tullia Maria Leita,

• Kalaallit Nunaat (Greenland): Siulittaasoq Emma Lennert aamma siulittaasup tullia Nivi Rosing.