Asasara Donald Trump,
Nunatta akornanni pissutsit pillugit nalunaarutit kingulliit qanoq isumaqarfiginerlugit oqaluttuutissallutit allaffigaakkit. Piffissami sivisuumi nunatta – angerlarsimaffitta kiffaanngissuseqarfigisattalu – tigunissaanik kissaateqarnerit oqaatigisarpat.
Asasara Donald Trump,
TRUMPIMUT QANOQ OQASSAGALUARPIT?
Takorlooriaruk Donald Trumpimut allakkamik nassiussisinnaallutit. Taava qanoq allaffigissagaluarpiuk?
Trump, USA aamma Kalaallit Nunarput pillugu piffissami matumani sammisaqartoqangaatsiarnera pissutigalugu USA-p præsidentianut allagaqarusussinnaasut ujartorpagut.
Peqataarusukkuit mailikkut uunga saaffiginnissinnaavutit: bk@sermitsiaq.gl.
Nunatta akornanni pissutsit pillugit nalunaarutit kingulliit qanoq isumaqarfiginerlugit oqaluttuutissallutit allaffigaakkit. Piffissami sivisuumi nunatta – angerlarsimaffitta kiffaanngissuseqarfigisattalu – tigunissaanik kissaateqarnerit oqaatigisarpat.
Inuiaavugut tulluusimaartut kinguaariinni arlalinni pinngortitami sakkortuumi aniguisimasut siulitta Issittumi qanoq iliornissaq ilisimalluarsimammassuk. Inuiaat allat amerlasuut maani aniguisimanngillat, aniguisullu amerlanertigut siulitta misilittagai aallaavigalugit aniguisinnaasimapput..
Nunarsuarmi angisuumi nunat politikkikkut unammillernerisa qiterpasissuanni inuiaqatigiit amerlanngitsunnguulluta inissisimavugut. Nalunngilarput nammineerluta nunarput illersorsinnaanagu, aammattaarli sorsugiarneq tamaani ileqqorinngilarput. Inuiaavugut eqqissinermik nuannarisaqartut. Allat avataaneersut uagutsinnik "piginnittunngorusuttut“ eqqarsaatigalugu eqqunngitsuliorneruvoq. Nunat pissaanilissuit nunarput pillugu akiuunneranni ersissuteqartarpugut paatsiveerusimaartarlutalu, soorlulusooq nammineq oqaaseqarsinnaanngitsutut.
Uannut ilaquttannullu USA politikkiinnaanngilaq. Kulturisi peroriartorninnut ilaangaatsiarpoq — Johnny Cash, Metallica aamma Linkin Park tusarnaartarpavut timersornerillu malinnaaffigisarlugit. Angajuma 2001-imi Bostonimi paarlaasseqatigiilluni ilinniarnini ingerlappaa, tassanilu pisiassaatissinnik angerlaassimmat qatanngutikkalu Boston Celtics nuannaartorilluinnalersimavagut. Malinnaavigisaqaagut, tamannalu ulluinnarsiutigaarput.
Eqqaamalluarpara USA 2001-mi saassunneqarmat anaanaga ernumanerup pianik qiasoq takugakku, ernini Bostonimiimmat. Taamani nunarsuup assigani iinnanngilagut; tamatta assigiimmik sioorassuteqarpugut, tamannami inuttut ataqatigiissutigaarput. USA-mut ikinngutaallutalu suleqataajuaannarpugut, taamatullu ingerlaannarnissarput neriuutigaara. Ikinngutigiinnerli ataqqinninnermik tunngaveqartarpoq, pisiarineqarnani.
Neriuutiginerpaavara USA-p Kalaallit Nunaatalu naligiimmik tunngavilimmik suli qaninnerusumik suleqatigiilernissaat. Neriuutigaara suleqataasutut nammineersutut oqaloqatigisinnaasatsitut isigilissagaatigut, nioqqutissatut oqaluuserineqartussatut pinnata.
Annilaangassutiginerpaasara tassaavoq pissaanilissuit naakkittaatsut akornanni peqataasutut inissisimalernerput — nipeqarata tusaaniarneqannginnissarput, pinngortitatta kulturittalu sakkutuut soqutigisaannit uagut nammineq aqussinnaanngisatsinnit aserorneqarnissaat.
Neriuppunga ikinngutinnit nunatsinnut pitsaanerpaamik kissaassisumit isumakuluummik ersersitsinertut atuassagit.
Inussiarnersumik,
Ernst
Bo Frederiksen, Nuuk, Kalaallit Nunaat
