Ikuallattoqareersoq ineqartut allamut inissinneqarallartut

Narsami pingasunngornerup unnuaani ikuallattoqarnerata kingorna inissiani arfinilinni najugallit allamut inisseqqinneqartariaqarsimapput.

Politiini pigaartut pisortaat Andreas Nordentoft Sermitsiamut taama paasititsivoq.

Politiit nalunaaqutaq 18.48 nalunaarfigineqarput Blok D-mi ikuallattoqalersimasoq.

Politiit qatserisartullu ornigupput, nalunaaqutarlu 19.07 ikuallattoq qaminneqarpoq.

Nalunaarutigineqarportaaq inuk ataaseq ikuallannermut atatillugu annertunngitsumik ajoqusersimasoq.

Ikuallattoq nalaatsornerinnakkut aallartissimasoq ilimagineqarpoq, ikuallatsitsisoqarsimaneranut takussutissaqanngimmat.  Pigaartulli pisortaata erseqqissarpaa ikuallattoqarneranik misissuineq suli ingerlanneqartoq.

Ikuallattoqarnera pissutigalugu inissiani arfiniliusuni najugaqartut inissianut allanut nuunneqarallarput.