Pia Clasen Lundblad, perorsaasoq.
Sooruna inulerisutut ilinniagaq toqqarsimaviuk?
Pia Clasen Lundblad, perorsaasoq.
Sooruna inulerisutut ilinniagaq toqqarsimaviuk?
- Eqqarsarnikuunngikkaluarama perorsaasunngorumaarlunga, kisianni Ilulissani meeqqerivimmi Majoriarlunga praktikkernikuugama, soqutigilerakku taamanili. Meeqqanut sullissineq nuannaralugu uummateqarfigilerlugu.
SAMMISAQ: ASSAAT KISSALAARTUT AMIGAATAANERAT
Kalaallit Nunaanni assaannik kissalaarunik amigaateqarneq, tamatumalu inuiaqatigiinnut sunniutai Sermitsiamiit allaaserisani nangeqattartuni sammivarput Perorsaasut ulluinnarni suliassaqarpallaartarnerat, sulisut ikippallaarnerat aningaasarsiakippallaarnerlu allaaserisani siullerni sammivarput.
Ulluinnaat suliffiusut qanoq misigisarpisigit?
- Suliartornissara qilanaarisarpara, sulinerput nuannaraara meeqqallu uummateqarfigalugit. Ulloqartarpugut soorunami ulapilluta. Nerisitassat, nangiligassat, saammarsagassat, sammisaqartitsinerit allallu. Soorlu aamma ullormut marloriaq sinittartuuteqaraanni piffissamik tigusisinnaasaqaat. Ilaanneqartarpugut quiartornissatsinnut piffissaqarata.
- Meeqqerisuusugut ullaakkumiit suliartorutta soraarnissap tungaanut timerput aalaannaavittarpoq. Ullormut pingaartittarpara nuannersumik sulinissaq, qiimaqatigiilluta suleqatillu ataqatigiilluta nuannaarluta. Taamatut ulloq nuannersumik naallugu nuannarinerusarpara.
Meeqqat piffissaqarfigerusuppagut, nuannaarnermik qanilaarnermillu tunniussinissaq pingaaruteqarluinnarmat.
- Pia Clasen Lundblad, 2011-mi perorsaasunngortoq.
Sulisussaaleqinerup ilinnut meeqqanullu sunniuteqarneranik ersersitsisumik ullormik aalajangersimasumik oqaluttuarsinnaavit?
- Ullut tamaasa sulisunik napparsimasoqartarpoq napparsimasoortoqarluniluunniit. Qaqutigoortorujussuuvoq sulisut tamakkeqqalluta sulisarnerput. Taanna unammillernarpoq. Soorunami amigarnermi sulisutut angusinnaasagut annikinnerulertarput. Qanittumi misigisara amigangaaratta eqqarsarlunga: “Ullumikkut meeraatinnguagut sammilaarnissaanut sulaarnissaanut piffissaqarfigerpianngitsoorpakka”. Iluaalliorlunga, ulluinnarnimi meeqqat piffissaqarfigerusuppagut aamma soorunami nuannaarnermik qanilaarnermillu tunniussinissaq pingaaruteqarluinnarmat.
Pia Clasen Lundblad.
Assi: Oscar Scott Carl
Atugassarititat eqqarsaatigalugit aqagu allanngortitsisinnaasuugit suna allanngortissagaluarpiuk?
- Akissarsiat. Kursusillu amerlineqarnissaat. Perorsaasut, sulisut isumaginninnermilu ikiortit nammineq ineriartoqqissalluta sukkulluunniit pisariaqartittuaannaratsigu. Sulisut aalajaatsut amerlinissaat aamma kissaatiginarpoq. Ilaatigummi misiginartarami sulisut inimi pingasuugaluarlutik amigartartut, taamaammat allannguisinnaasuuguma inimi sulisut sisamanngortissagaluarpakka. Immitsinnummi paarilluassagutta tamakkua pingaaruteqarluinnarput.
