Ilaqutariit Maqe Poulsenikkut SAS-ip taamaatitsiinnarnerani eqqugaapput: - Avaarnaqaaq
SAS-ip Nuup Københavnillu akornanni aasaq manna timmisartuussinissatik orsussap akitsoraluttuinnarnera peqqutigalugu taamaatiinnarpaat. Taamaatitsiinnarnermut eqqugaasut ilagaat ilaqutariit katillugit tallimaallutik angalasussat, taakkua angalanissaasa ullui nikittariaqalerput saniatigullu aningaasartuuteqartussanngorlutik.
Ilaqutariit Poulsenikkut Mallorca nuannareqaat siornatigullu tikereernikuullugu.
Assi: Nammineq pigisaq
Ilaqutariit Maqe Poulsenikkut Danmarkimut Mallorcamullu aasamut feeriarnissartik qanilliartuinnartoq qilanaarileruttorlugu SAS-imit mailisiartik, Nuummiit Københavnimut utimullu angalanissap taamaatiinnarneqarneranik imaqartoq arfininngormat ullaakkut takoriasaarpaat.
Inuit arlaqaramik billetit ilaat immikkut pisiarinikuuaat, inniminnigarlu ataaseq taamaatiinnarneqartoq kisiat allagarsissutigigamikku sinneri qanoq inissinnersut misissupallappaat.
- Misissorlugit sinneri sunaaffa tamarmik aflyseqqasut, Birthe Poulsen oqarpoq.
Taassuma uini, meeqqatik marluk anaananilu feeriaqatigisussaavai, katillugit tallimaallutik angalassallutik. Ullullu angalaffissatik angallatileruttorfiup nalaaniimmata iliuuseqapallassallutik aalajangerput.
- Nalunartut pillugit Air Greenlandimut pisipallareerama, ilami inuit amerlaqigatta akitsorpallaannginnerani pisipallappunga, Birthe Poulsen oqarpoq.
Aningaasartuuteqarnerusussanngortut
Qujanartumik billetit akisuneruallaanngitsut nalaarlugit pisiaraat. Københavnimiilli Nuummut uternissartik billetinik akikinnersiuinerminni ullunik marlunnik nikisittariaqalerpaat, taamaalillutik hotelimiinnerunissaminnut aningaasartuuteqarnerusussanngorput.
- Immaqa 4-5.000 koruuninik akiliisariaqassuugut, Birthe Poulsen oqarpoq.
Angalanissat taamaatiinnarneqarnerannut allagarsigamik marlunnik periarfissinneqarput. Siulleq billetimut akiliutigisartik utertissinnaavaat, aappaattullu angalanissartik timmisartumut allamut nuutsissinnaallugu.
Birthe Poulsenikkut billetitik utertippaat, kammalaataatali aamma angalaqataasussaasup periarfissap aappaa toqqarpaa, taamaalilluni angalanissaa Air Greenlandimut nuutsinneqarpoq, billetillu nikingassutaa SAS-ip ilanngullugu akilerpaa. Kisianni angalanissaasa ullui nikisinneqarsimapput.
- Oqarfigineqarpoq (aggustip aaqq.) 5-iani inissaqartoq, billetili tigugamiuk aatsaat 8-ni aallartussanngorsimalluni paasivaa, Birthe Poulsen oqarpoq.
SAS nunatsinnut aappaagu angalaqqissanersoq suli maannamut nalunarpoq. Ilaqutariilli SAS piffissaq imaalereersoq taamaatitsiinnareersorlu siunissami atoqqissallugu naatsorsuutiginngilaat, tatigiunnaaqqavaammi.
- Naamik, avaarnaqaaq, Birthe Poulsen naggasiivoq.
