Ilinniarfiup taamaatiinnartartut ikilisinniarlugit ilinniarneq sivikilligaa
Taamaatiinnartartut ikilisarniarlugit isumaginninnermi ikiortitut ilinniarnerup sivisussusia affaannanngortinniarlugu aalajangerneqarpoq.
Perorsaanermik Ilinniarfik aasaru isumaginninnermi ikiortitut ilinniarnermut tunngatillugu malunnaatilimmik allannguissaaq.
Isumaginninnermi ikiortitut ilinniarnissamut aaqqissuussaq nutaaq aasamut atuutilissaaq.
Ilinniagaq — siornatigut ukiut marluk ingerlanneqartartoq - ukioq ataaseq ingerlanneqarsinnaanngorlugu Ilinniartitsineq sungiusarnerlu sivikinnerulissapput.
Ilinniartitsineq sapaatip-akunnerini 49-niit 29-nut sivikillineqassasoq aamma suliffimmik misiliineq sapaatip-akunnerini 48-niit 17-inut sivikillineqassasoq Perorsaanermik Ilinniarfik tusagassiutitigut nalunaarummi allappoq:
Sakkukillineqassanngitsoq
- Ilinniartitsinerup siunertaa piginnaanerillu sakkukillinagit allannguisoqassaaq.
Marloriarluni suliffimmi misiliisariaqarnerup ilinniartunit unammillernartinneqarsimanera allannguisoqarneranut pissutaanerpaavoq.
- Isumaginninnermi ikiortitut ilinniarnerup maanna sivisussusia naleqqutinngitsoq taamaatitsiinnartarnermullu pissutaasoq isumaqarpugut. Ilinniartut affaat inorlugit ilinniakkamik ullumikkut naammassinnittarput. Pingaartumik qaammatini arfinilinni praktikkerneq – fagimut, inuttut aamma Kalaallit Nunaanni sumiiffimmut atugassarititaanullu tunngatillugu -unammillernartuusoq paasinarsisimavoq. Suliffimmik misiliinerit maannakkutut ittumik ingerlanneqartut taamaatitsiinnarnissamut aarlerinarnerusartut misilittakkatta takutippaat. Misilittakkat tamakku tunngavigalugit suliffimmik misiliinerit marluutillugit ataatsimut ikilisinneqarsimapput, SPS allappoq, ilaatigut imatut nangilluni:
- Ilinniartut ikiortitut ilinniarnerminnik ingerlatseqqinniartut pitsaasumik ineriartortinneqarnissaat ukiup ataatsip ingerlanerani qulakkeerneqassaaq, taamaalillunilu ilinniartitaanerup ataqatigiinnerulernissaa ilinniartussarsiornerlu siuarsarneqassapput.
Ilinnialersinnaanissaq siuarsarneqassasoq
Ilinniartitsinerup allanngortinneqarluinnarnerata kingunerisaanik angerlarsimaffik qimanngikkaluarlugupaaqqinnittarfinni ikiortitut ilinniarnermit (DMU) soraarummeernerit pitsaanerulissapput, ilisimatitsissutigineqarpoq, tassani suliniutit aaqqissuussaanerat nutaaq ataqatigiinnerusumik kajumissinarnerusumillu ingerlassalluni.
- Nuummit ilinniartut pingajuattut naggataarutaasutullu ilinniarnerminnut atatillugu ullumikkut Ilulissani qaammatini sisamani atuagarsortarput. Tamanna aaqqissuussinermi nutaami atorunnaarsinneqarpoq. Ilinniartut aaqqissuussineq nutaaq aqqutigalugu ilinniagartik Nuummi naammassisinnaassavaat, taamaalillutillu ilaquttatik avatangiisitillu sungiusimasatik qimallugit Ilulissanut angalasariaqassanngillat, ilisimatitsissutigineqarpoq.
