Ilinniartoq qinikkanut: Ilinniarnermusiagut amerlisigit

Kalaallit Nunaanni ilinniarfinni ingerlariaqqiffiusuni, assersuutigalugu Ilisimatusarfimmi, ilinniartut qaammammut 5.229 koruuninik ilinniarnermusisarput. Aningaasat taakkua qaammatit ingerlanerani akiligassaminnut inuussutissaminnullu atortarpaat. Taakkuali aningaasat ilinniartunut amelasuunut naammanngitsut, Ilisimatusarfimmi uumassusililerinermi ilinniartoq, Linda Bagger tusagassiorfinnut allappoq.

- Ukiuni kingullerni nerisassanut, ineqarnermut aamma aningaasartuutinut pisarialinnut akit qaffangaatsiarnikuupput. Saniatigullu ilinniarnermut tapit inuuniarnermut malinnaanikuunatik. Tassa imaappoq, ilinniartoq siusinnerusumut sanilliullugu  ilinniarnermut tapit pissarsissutigisinnaaneri minnerulernikuuvoq, ilinniartoq allappoq.

Ilinniarnermusiat naammannginnerat peqqutaalluni ilinniartut ilinniarnermik saniatigut akunnerpassuarni sulisariaqanngikkaagamik aningaasanik attartugassarsiunngikkaagamik ilaquttaminnut ikioqqusariaqartartut, Linda Bagger allappoq. Tamannalu ilinnianermut peqqissutsimullu pitsaanngitsoq taanna isumaqarpoq.

- Taamaammat pingaaruteqarpoq ilinniarnersiutip aningaasat naleerukkiartorneranut inuuniarnerullu aningaasatigut ineriartorneranut nalimmassarneqarnissaa.

- Inuulluataarnermik ujartuinngilagut. Kissaatigiinnarparput ulluinnarni aningaasartuutivitta akilernissaata saniatigut ilinniarnitta aallunnissaanut nukissaqarnissarput, Linda Bagger allappoq.

Qinikkat kissaateqarfigigai

Uumassusililerinermi ilinniartup isumaa naapertorlugu ilinniakkamik ingerlataqarnermi atukkat, aamma aningaasatigut, pitsaanerusariaqarput. 

- Ilinniartup nerisassarsissanerluni imaluunniit atuagarsissanerluni toqqartariaqartussaanngilaa. Ilinniarnerullu saniatigut taamarsuaq sulisaqartussaassanngikkaluarpoq, ilinniarneranut sunniuteqarsinnaasumik, Linda Bagger allappoq.

Taamaattumik nuna tamakkerlugu qinikkat, aningaasanut aappaagumut inatsisissamik suliaqartut, ilinniartut atugaannik eqqarsaatiginninnerunissaat kaammattuutigaa. 

- Ilinniarnermusiat ullutsinnut malinnaatinneqalertariaqarput, Linda Bagger allappoq.

Inatsisartut aningaasanut aappaagumut inatsisissatut siunnersuut pilersaarutaasut malillugit oktobarip 26-anni aappassaaniissavaat. Ilinniartup kissaataa qinikkanit tusaaneqarusussanersoq ilaatigut tassani akissutissarsineqarsinnaassaaq.