Ilisimatusarfimmut rektorinngortussaq siulersuisunit toqqarneqartoq
Mari Kleist decembarip allaqqaataani Ilisimatusarfimmi rektorinngussaaq.
Mari Kleist Ilisimatusarfimmi rekotirmut tullersortaareerluni rektorinngortinneqarpoq.
Assi: Ilisimatusarfik
Ilisimatusarfimmi rektorip Gitte Adler Reimerip taartissaa toqqarneqarpoq.
Rektorimut maanna tullersortaasoq Mari Kleist decembarip aallaqqaataani rektoritut atorfinitsinneqarpoq. Ilisimatusarfik nittartakkamini allappoq.
- Mari Kleist Ilisimatusarfimmi rektorertaatut tikilluaqqusinnaagatsigu nuannaarutigingaarparput, Ilisimatusarfimmi siulersuisuni siulittaasoq Eyjólfur Guðmundsson oqarpoq, nangillunilu:
- Taanna aqutsisutut nukittuujullunilu aallarnisaanermut takorluuisinnaasuuvoq, ilisimatusarfiullu aamma tamatuma inuiaqatigiinni pingaaruteqassusaa ilisimalluarpai. Marip Ilisimatusarfimmi rektorinngortinneqarnermini suliatigut pingaarnerit aamma aaqqissugaanermik paasisimasaqarluarnini aqutsinermini ataqatigiitsissavai.
Mari Kleist Ilisimatusarfimmi Kulturimik, Oqaatsinik Oqaluttuarisaanermillu pisortaareerluni februaarip aallaqqaataani rektorimut tullersortinngorpoq.
- Tulluusimaarpunga aamma siulersuisut tatiginninnermik takutitsinerat qujamasuutigaara. Ilisimatusarfik inuiaqatitsinni pingaaruteqarluinnartutut atuuffeqarpoq - suleqatit aamma ilinniartut peqatigalugit Ilisimatusarfiup nukittuuginnarnissaanut ammasuunissaanullu suliap nanginnissaa qilanaaraara, Mari Kleist oqarpoq.
Gitte Adler Reimerip ukiuni arlalinni Ilisimatusarfiup ineriartortinneqarneranut annertuumik sulissuteqarsimaneranut pingaarutilimmillu tunniussaqarsimaneranut siulersuisut aamma qutsavigaat. Gitte Adler Reimer ukiuni arfineq-pingasuni rektoriuvoq.
