Illersornissamut ministeri USA-mik suleqateqarneq pillugu: Nuna nunallu killingi eqqartornissaat kissaatiginngilarput

Illersornissamut ministerip Jeppe Bruusip Nunanullu Allanut Tunngasunut Naalakkersuisup Múte B. Egedep (IA) Nuummi sakkutuunut pingasunngornermi pulaarput.

Danmarkip Kalaallit Nunaanni illersornissamut suliniuteqarnera isornartorsiorneqareersoq tikeraartoqarpoq. Assersuutigalugu umiarsuaq Hvidbjørnen inuttassaaleqisoqarnera pissutigalugu Kalaallit Nunaannut angalanissani taamaatiinnartariaqarsimagaa, DR-ip qanittukkut oqaluttuaraa.

Iliuuseqarneq naammagisimaarnartoq, Danmarkilu aatsaat taama najuunnera annertutigisoq, illersornissamut ministeri Sermitsiamit apersorneqarluni oqarpoq:

– Danmarkip Kalaallit Nunaanni maannakkut iliuuserisai naammagisimaarluinnarpakka, aamma Hvidbjørnenimi suli amerlanerusut ilinnialissapput, taamaalillutalu annertunerusumik najuussinnaalissagut. Hvidbjørnen tamaaniinngikkaangat isumaqanngilaq inissisimaffik qimaannarneqartoq. Allanik taarserneqartarpoq, umiarsuarnit allanit, timmisartunik, qulimiguulinnik il.il, Jeppe Bruus oqarpoq nangillunilu:

- Kunngeqarfik tamarmi, Kalaallit Nunaat ilanngullugu, illersorneqarnerani aatsaat taama peqataatigaagut.

USA-p præsidentiata Donald Trumpip Kalaallit Nunaata USA-mit pigineqarnissaanik aqunneqarnissaanillu oqariartuuteqarsimanerata kingorna Danmarkip, Kalaallit Nunaanni illersornissamut suliniuteqarnera politikkikkut innuttaasullu akornanni soqutigineqartorujussuanngorpoq.

Apeqqut: Illersornissaq pillugu USA-mik suleqateqarneq maanna qanoq ippa?

– Suleqatigiinnerput ilumoorpoq, ataatsimoorluta sungiusaqatigiittarpugut allanillu sammisaqartarluta, USA-p Kalaallit Nunaannik aqutsilernissamik kissaateqarnera erseqqissumik itigartikkipput ersarippoq. Tamanna ataatsimoorluta iliuuseqarfigaarput, taamaalillutalu kunngeqarfiup iluani qanimut suleqatigiippugut paasillugulu qanoq ataatsimoorluta ingerlaqqissinnaasugut, Jeppe Bruus oqarpoq nangillunilu:

– Amerikamiut qanimut suleqatigaavut, issittumi isumannaatsuunissamut pingaaruteqarput, erseqqipporli nuna nunallu killingi eqqartornissaat kissaatiginngikkipput.

Apeqqut: Isumaqarpit umiarsuaq inuttakippallaarnera pissutigalugu angalanissani taamaatiinnartariaqarnera aallaavigalugu, USA-p Danmarkip Kalaallit Nunaanni illersornissamut iliuuseqarnera ajunngitsumik isigigaa?

– Umiarsuaq kisiat isigigaanni, taava takussutissaq tamakkiisoq takuneqarsinnaanngilaq. Annertunerusumik najuuppugut, tamannalu amerikamiunit aamma nassuerutigineqartoq isumaqarpunga. Aningaasaliinerujartuinnarpugut, annertunerusumillu maannakkut inissisimavugut, Issittumi, Kalaallit Nunaat ilanngullugu, suliniuteqarnerput 40 procentimik annertusivarput. Tamakkiisumik isigalugu takussaanerulersimavugut, Jeppe Bruus oqarpoq.