Danmarki timmisartunik sorsuutinik, umiarsuarnik sorsuutinik sakkutuunullu atortunik allanik pisinissamut milliarderpassuit atortariaqarpai.
Aningaassalli kisimik iluaqutaanngillat.
Danmarki timmisartunik sorsuutinik, umiarsuarnik sorsuutinik sakkutuunullu atortunik allanik pisinissamut milliarderpassuit atortariaqarpai.
Aningaassalli kisimik iluaqutaanngillat.
Danskit naalakkersuisuisa sakkussiassanut aningaasarpassuarnik atuitillugit illersornissaqarfik illersornissamut tunngatillugulu suliffissuaqarfiit tusindilinnik nutaanik sulisussarsiortariaqarput.
Taakkualu Danmarkimi inuussutissarsiortut unammillassavaat.
Danmarkimi sakkussiassanik nutaanik sanaartorneq pissutigalugu suliffiit 18.000-t missaanniittut 2035-p tungaanut pisariaqartinneqarput.
Sakkutuut, illersornissamut atortunik tunisassiortut suliffeqarfiillu allat illersornissaqarfimmik annertusaanermik kingunerisaanik suliassaqalersut kisitsisinut taakkununnga ilaapput.
Immikkut ilisimasallit milliardilikkaanik aningaasaliissutit illersornissamut piginnaanngorsagaanissaannut pisariaqartut maannangaaq amigaatigineqarput.
Tamanna kukkunersiuinermik siunnersuisarnermullu suliffeqarfiup EY-p nunani avannarlerni misissuinerata nutaap takutippaa.
Misissuineq naapertorlugu qarasaasianut, paasissutissanut softwarenullu tunngasunik piginnaasaqartunik sulisussarsiniarneq ajornakusoortorujussuuvoq.
Suliffiilli 18.000-it taakku tamarmik nutaanik atorfinitsitsinikkut pilersinneqartariaqanngillat.
Tamanna Christoffer Husted Rasmussenip, EY-Parthenonimi suleqataasup, nassuiarpaa.
- Suliffiit nutaat aamma suliassat suliffigineqartut allanngortinneqarneri pineqarput, oqarpoq.
Suliffeqarfiit allanik siornatigut pilersuisartut, illersornissamut tunngasunik suliaqarnerulernissaat naatsorsuutigineqarpoq.
Sulisulli piginnaanillit amigaatigineqarneri pissutaallutik annertusaanissamut kingaallassaataasinnaavoq.
Taama Søren Kryhlmand, Dansk Industrimi (DI) pisortaanerup tullia, naliliivoq.
- Aningaasaliissuteqarneruneq illersornissamut nukittunerulersitsinngilaq, aammali inunnik pisariaqartitsisoqarpoq teknologiimik Illersornissaqarfimmut atortussanik ineriartortitsisinnaasut.
- Taamaattumik illersornissamut politikki suliffeqarnermullu politikki ataatsimut eqqarsaatigisariaqarput, oqarpoq.
Ajornartorsiutit amerligaluttuinnarput
DI naapertorlugu Illersornissaqarfiup illersornissamut tunngasunik suliaqartut suliffissuaqarfiit amerlasuut sulisussarsiornerminni ajornartorsiutigisartagaat aqqusaartariaqarpaat.
Taamaattumik suliffinnik nutaanik pilersitsinikkut sulisut suliffimmit allamut nuutsinneqarsinnaapput, sulisullu amerliartortinneqarlutik.
Inuiaqatigiit ineriartornerat pissutigalugu tamanna ajornakusoornerulernissaa ilimagineqarpoq.
- Suliffiit amerlavallaaleraangata sulisartut amigaataalersimapput, tamannalu annertusiartuinnarpoq. Ilaatigut inuiaqatigiit ineriartornerat pissutigalugu aamma ilaatigut sakkussiassanik pilersuinerup kingunerisaanik sulisussarsiortoqarnerujartornera pissutaalluni, Søren Kryhlmand oqarpoq.
ILLERSORNISSAQARFIMMI ANNERTUSAANERMI UNAMMILLERNARTUT
Illersornissaqarfik illersornissamullu tunngasunik suliaqartut silassorissuusianut qarasaasianut programminut, paasissutissanut qarasaasianillu programmiliornermut immikkut ilisimasalinnik pissarsiniarneq ajornartippaat.
Danmarkimi sulisussat killeqarneri pissutigalugit illersornissaqarfiup illersornissamut atortussanik tunisassiortullu annertusiartortillugit immikkut ilisimasalinnik, Danmarkimi inuussutissarsiortut aamma pisariaqartitaannik, pissarsiniarneq unammillernarneruleraluttuinnarpoq.
Illersornissaqarfik nutaanik atorfinitsitsinissaminut unamminartumi inissisimavoq. Suliffeqarfiit namminersortut akissarsiaqarnerulernissamik soraarsitaanissamut aarlerinartoqannginnermillu neqeroorfigigajuppaat.
Najoqqutaq: EY-p nalunaarusiaa "From Ambition to Readiness“.
Taannali isumaqanngilaq sakkussiaqalerneq qallunaat inuussutissarsiornerannik akerlilersuisariaqartoq.
- Iluaqutaasumik illersuineq niuernikkut iluatsitsilluarnerup akerleraa, oqarpoq.
- Arlalitsigut nukittorsaaqatigiittoqarsinnaavoq. Taamaattorli qanorluunniit isumaqaraluarutta sulisussaaleqineq unamminaarnartuassaaq, oqarpoq.
Sulisunik amerlanerusunik pissarsinissaq kisimi unamminartuunngilaq.
Illersornissaqarfimmi sulineq soqutigineqarneruleraluttuinnarpoq, tamannali immikkut ilisimasalinnik misilittagaqarluartunik amigaateqarnermut aaqqiissutaasinnaanngilaq.
Illersornissaqarfimmi misilittagaqarluartunik ullormiit ullormut ilinniartinneqarsinnaanngitsunik, pisariaqartitsivoq.
Illersornissaqarfik amerlanerusunik sakkutuunngortitaqalissagaluarpataluunniit suliassat ilungersunarnerpaat ukiorpassuit qaangiuppata aatsaat, naammassineqarsinnaassapput.
EY naapertorlugu suliffeqarfiit namminersortut amerlanertigut soraarsitaanissaq ulorianartorsiortinngikkaluarlugu akissarsianik qaffasinnerusumik neqeroorfigisinnaavaat.
Aningaasat amerlanerusut naammanngillat
Aammattaaq Illersornissaqarfimmut pingaaruteqarpoq misilittagaqarluartunik atorfinitsitsiinnarnissaq siornatigullu sulisunik utertitsisoqarnissaa, Christina Burgwald EY-mi suleqataasoq nalunaarusiamilu atuakkioqataasoq taama naliliivoq.
- Illersornissaqarfimmut taama angusaqarluartigisoqassappat aningaasat atortullu amerlanerusut naammanngillat. Suliassallu kivinniarlugit inuttalersuisoqartariaqarpoq. Tamanna oqariartuutitsinni pigaarnersaavoq, oqarpoq.
Aamma sulisussanik nutaanik atorfinitsitsiniarneq sivisusinnaavoq — isumannaallisaanermut tunngatillugu akuersissutinik pissarsiniarneq sapaatip-akunnialui ukiullu ataatsip sinnera sivisussuseqarsinnaavoq.
Atorfinitsitsinissamut periarfissat erseqqissumik allassimanissaat, ilinniartitaanerup annertusarneqarnissaa ilinniarfiillu suliffeqarfiillu namminersortut qanimut suleqatigineqarnissaat, EY-p innersuussissutigaa.
Sulisitsisut kattuffiata DI-p nunanit allaneersut suliartornerunissaat, piginnaanngorsaanissaq utoqqaallu sulisartut amerlineqarnissaat aaqqiissutissatut eqqaavai.
Illersornissaqarfik qanoq ililluni sulisussarsiorsinnaanersut, aamma sulisussaaleqineq sakkussiassanik annertusaanermut akornutaasinnaanersoq, Ritzau-p Illersornissaqarfiup sakkutooqarfigisaanni sulisuinut apeqqutigaa.
Sakkutuut naalagaat piffissaq eqqorlugu akinngilaq.
