KL

DK

Illersornissaqarfiup Narsarsuaq 45 millionit koruuninik aningaasaliiffiginiaraa

Danskit illersornissamut ministeriat Narsarsuarmi mittarfimmut 45 million koruuninik tapiissuteqarusuppoq. Tamanna aamma mittarfiup eqqaani sakkutuujunngitsunut atortussanut tapiissutaavoq. Siunissaq ungasinnerusoq eqqarsaatigalugu pilersaarusiornerup tungaanut ingerlatsineq ingerlaannassasoq siunertaavoq.

2026-mi apriilip 15-ani Nuummut timmisartuussisoqartarunnaarpoq, Narsarsuarli illersornissaqarfimmit suli soqutigineqarpoq.
Morten Okkels Morten Okkels Tusagassiortoq
Saqqummersinneqarpoq

Narsarsuup nunaqarfittut mittarfeqarfittut oqaluttuarineqarnera suli naammassinngilaq. Illersornissaqarfiup mittarfik tamatumunngalu attuumassuteqartut ingerlanneqarnissaannut ukiumut minnerpaamik 45 millionit koruunit atorniarpai.

Tamanna illersornissamut ministerip Jeppe Bruusip Folketingimi Aningaasaqarnermut Ataatsimiititaliamut qinnuteqaataani erserpoq. Ministeri ataatsimiititaliamut ima paasissutissiivoq:

– Narsarsuarmi mittarfiup siunissami pisariaqartinneqartut nalilerneqarnissaat eqqarsaatigalugu ukiumi ataatsimi minnerpaamik ingerlanneqarnissaa qulakkeerneqassasoq Illersornissaqarfiup innersuussutigaa.

– Illersornissaqarfiup suleqataasalu siunissami ungasinnerusoq eqqarsaatigalugu pisariaqartitaat paasiniarneqartartillugit minnerpaaffiusumik ingerlatsinerup mittarfiup issittumi silaannaap ajorsiartornerani aserunnginnissaa qulakkeertussaavaa.

Aningaasat aamma mittarfimmut atatillugu namminersorlutik oqartussanit ingerlanneqartunut atorneqartassapput.

– Ilaatigut illoqarfinnit ungasissumiittuni kiassaaneq, inunnik angallassineq, nunaqarfinni qatserisartut, tamanut aputaajaasarnerit, ikummatissamik pilersuineq, ullukkut unnuakkullu eqqagassanik igitsisarneq, orsersortarfik, inissiat, umiarsualivik/nassiussanik isumaginninneq kuuffissallu aserfallatsaalineqarnerat kiffartuussinermut ilaasut Namminersorlutik Oqartussat tamatumunnga atatillugu ilisimatitsipput.

Narsarsuarmi aningaasartuutit Illersornissamut ministereqarfiup atugaasa iluanni akilerneqassapput.

Tassa illersornissamut ministerip Folketingimi Aningaasaqarnermut Ataatsimiititaliaq aningaasanik nutaanik qinnuiginngilaa. Issittumi illersornissaqarfiup ingerlanneranut aningaasanit immikkoortitaareersunit tigusilluni allatut atuinissaq qinnutigaa.

Timmisartorsuit Herculesit arlaqartussat siullersaat sakkutuut sungiusarnerannut Arctic Shield-imut atatillugu mimmat mittarfitoqqami timmisartorsuaqaqqilerpoq.

45 millionit koruunit illersornissaqarfik narsarsuaq mittarfik jeppe bruus inuiaqatigiit

Atorfiit tamaasa takukkit

PODCASTI

Powered by Labrador CMS