Illorsuarni najugaqarnissaq illersorneqarsinnaavoq

"Nunaqarfik Illorsuit ammaqqinneqarnissaa sulissutigineqassaaq, suliassarlu najugaqartut aamma Namminersorlutik Oqartussat suleqatigalugit ingerlanneqassaaq" Avannaata Kommuniani suleqatigiit, Siumut Naleqqallu qinigaaffimmi maanna atuuttumi isumaqatigiissutaanni taama allassimasoqarpoq.

Tamannalu ullumikkut suli attanneqarpoq.

- Uanga allaanerusumik isumaqarfiginngilara, ammartariaqarpoq, Avannaata Kommuniani borgmesteri, Lars Erik Gabrielsen (S), Sermitsiamut oqarpoq.

Inatsisartunut ilaasortat Illorsuit inunnit najugaqarfigileqqinneqarsinnaanera pillugu sapaatit akunnerata siuliani oqallipput. Illorsuilli suli inunnit najorneqarnissaminut uloriarnarpallaartoq, Upalungaarsimanermut Naalakkersuisoq, Iddimanngiiu Jensen Bianco (IA) Inatsisartunut oqarpoq. 

- Kalaallit Nunaanni Upalungaarsimanermut Ataatsimiisitaliap Umiammakku Nunaata eqqaanni qaqqat sisoorsinnaanerannut, sumiiffinnilu taakkunani qaqqap sisoorneranut atasumik tassaarsuaqarsinnaanerinut, upalungaarsimanikkut suliamik naliliinerat Naalakkersuisunit ilisimavarput. Tassani allassimavoq Illorsuit sumiiffittut uninngavigissallugu navianartorsiorfiusutut suli isigineqartariaqartoq, Iddimanngiiu Jensen Bianco, oqarpoq.

Naalakkersuisut taama isumaqarnerat kommunimi pineqartumi akisussaasuusup inuerusaanertut nalilerpaa.

- Nunarsuarmiut allat innermik anitsisarfeqarfiusuni najugaqarput. Innermik anitseriillaraangat uteqqittarput. Soorluluunniit qujarutiinnarneqartoq nunaqarfiit maani ilanngarneqarmata, Lars Erik Gabrielsen oqarpoq.

Kalerrisaarutissamik siunnersuuteqartoq

Taanna Illorsuit najugaqarfigineqaleqqinnissaanut upalungaarsimanermi atortussamik siunnersuuteqarpoq. Siunnersuutinilu Naalakkersuisunut ilaasortaasimasunut maannalu ilaasortaasunut annguttaraluarlugu aamma oqaatigaa.

 - Qaqqarsuup sisusussap qaavani radiokædeqassooq, qaqqarsuarmi sisusussami kabelit siaarneqassapput, sisuppat kabelit kittorassapput, kittorarpatalu paasineqassooq ajutoortoq, taava alarmi aallartissooq innuttaasullu qimaasariaqarunik qimaassapput. 

Aaqqiissut taanna atorlugu isumaqarpit Illorsuarni najugaqarnissaq illersorneqarsinnaasoq?

- Ilaana. Ilumoortumik ilaanarujussuaq, borgmesteri oqarpoq.

Sermitsiap Upalungaarsimanermut Naalakkersuisoqarfik borgmesterip siunnersuutaa pillugu attaveqarfigaa, sulialli suliarineqarnerani tassanngaannit akisoqanngilaq.

Inatsisinik uniuineq periarfissatut isigigaa

Lars Erik Gabrielsenip naliliinera naapertorlugu Illorsuarni attaveqaatit ammaqqippata nunaqarfik najugaqarfigeqqiliinnariaavoq. 

- Attaveqaatit ammaqqiinnarneqartussaapput, akisuumik ammarneqarnavianngillat. Tusass peqataanianngippat Starlinkeqarpoq, taanna oqarpoq.

Starlink tassaavoq qaammataasat atorlugit internetimut attaveqaat. Tusassip attaveqaatiginngisaanik atuineq nunatsinni inerteqqutaavoq. Ingerlatseqatigiiffimmi Namminersorlutik Oqartussat pigisaat kisermaassilluni ingerlatsisussaasoq inatsisitigut aalajangerneqarnikuuvoq. Taamaattumik Starlinkimik inoqarfinni atuineq inatsisinik uniuineruvoq.

Tamannalu aamma Attaveqaasersuutinut Naalakkersuisup Sermitsiamut siusinnerusukkut uppernarsarpaa. 

 - Tusass A/S avaqqullugu Starlinkimik atuineq inerteqqutaavoq, Iddimanngiiu Jensen Bianco allappoq.

Illorsuarmiuusimasut apererusukkai

Borgmesterip Illorsuit inunnit qassinit najoqqilerneqarusunnersoq kisitsisinngorlugu paaserusulluinnalerpaa. Tamannalu pillugu Uummanniarnissaminik pilersaarpoq.

- Illorsuarmiuusimasut aggersarusuppagut ataatsimeeqatigalugit aperalugillu; Kikkut nuukkusuppat? Paaserusupparput kikkut uterusunnersut, taakkua tigussaasut pigalugit oqariartorsinnaassagatta ukua nuukkusummata uagut iliuuseqarusuppugut, Lars Erik Gabrielsen oqarpoq.

Alapernaarsuinerit

Namminersorlutik Oqartussat qaqqat Illorsuit eqqaaniittut, nakkaasimasut, nakkutigaat. Taakku killiffimmik qaqqarsuillu pissusiinik qaammatikkaartumik naliliisarput. Nalunaarusiaq kingulleq juunip qulingani saqqummerpoq. Tassani Umiammakku Nunaanni qaqqat suli nikerartut allaaserineqarpoq.

- Umiammakku Nunaanni qaqqani nakkutigineqartuni suli pisoqartoq nakkutiginninnermi paasissutissat takutippaat. Ujaqqat nakkaasut ujaqqallu sisoortut kiisalu qaqqat innartaasa ilaanni arriitsumik, ataavartumik nikikkiartuaartoqartoq, takuneqarpoq. Tamanna pisoqarnerinut qaammatit siuliini takuneqartartunut naapertuuppoq, ujarassiuut allapput.