POLITIIT ULLOQ UNNUARLU NALUNAARUSIAAT
Ilulissani ikuallanneq nammineq qamittussanngortinneqartoq Tasiilamilu innarluutilik saassunneqarsimasoq
Ilulissani qatserisartut Ilulissat mittarfittaassaata eqqaani ippassaq ikuallanneq tikikkuminaatsumiimmat qanitaanilu imeqarfeqanngimmat imermik naammattumik assartuisinnaasimannginnamik qamissinnaasimanngilaat. Taamaattumik illu aqunneqartumik nammineq qamittussanngortittariaqarsimavaat, Kalaallit Nunaanni Politiit sillimasuisa pisortaat, Thomas Jeppesen oqaluttuarpoq.
Kalaallit Nunaanni Politiit ukiup nutaap aallartinnerani nuna tamakkerlugu ulapaarput. Ikuallattoqarnera, aserorterinerit inoqatinik saassussineq ilaatigut misissuiffigineqartut arlalissuit ilagaat.
Foto: Oscar Scott Carl
Tallimanngornermi unnukkut nal. 19:31 Kalaallit Nunaanni Politiit nalunaarfigineqarput "Munch-campen"-imi Ilulissani ikuallattoqarneranik, ikuallattoornermut kalerrisaarutip aallartinnerata malitsigisaanik.
- Politiit aammalu ikuallattoornermut upalungaarsimasut ikuallaffimmut anngupput. Campi mittarfiliorfiup eqqaaniippoq, inoqanngilaq, paasitinneqarneralu malillugu najugaqarfiusimasut taakku kommunimit pisiarineqarsimapput. Ikuallattoq qatserinikkut unitsinneqarsinnaasimanngilaq, qatserisartut imermik naammattumik sukkasuumik pissarsisinnaasimanngimmata. Taamaattumik aalajangiunneqarpoq ikuallattoq aqunneqartumik nammineq qaminneqartussanngortinneqassasoq, politiit sillimasuisa pisortaat Thomas Jeppesen oqarpoq nangillunilu:
- Nalunaaquttap akunnerisa sisamat matuma siorna paasineqarpoq ikuallaffik pujuliorunnaartoq, maannalu ikuallanneq pillugu paasiniaanitsinni killiffik misissorpara.
Ikuallaffiusoq inoqanngitsumiinnerarpat, ikuallalersimaneranut pissutaasoq paasivisiuk?
- Maannakkorpiaq suli paasineqanngilaq, tamanna misissorparput, maannakkut tikinneqarsinnaalerpoq, qaammarlualaariarpallu ikuallattoqarneranik paasiniaasartugut misissuinertik nangissavaat. Maannakkorpiarli pingaarnerpaavoq ikuallanneq aqunneqarsinnaalersimammat aammalu inunnik ajoqusertoqarsimanngimmat.
Pisiniarfimmi tillinniarneq aammalu nunatsinni sumiiffinni arlalinni aserorterineq
Nuummi Akikip pisiniarfiani pisiniartoq pisiarisimasaminik mobiltelefoneminillu tillinniamit tilliffigitissimavoq, piffissap sivikitsuaqqap ingerlanerani pigisami alalaarnerinnaani, pisiniap pigisai tillittup sukkaannaq tigoriarlugit qimaasimagami.
- Ilimanarpoq pisiniartup pisiani poortorlugit aallartereersoq, tillinniap sukkaannaq pisiai mobilialu aallarussimagai. Suliami pasisaqarpugut, nakkutilliisut pisortaat oqaluttuarpoq.
Sisimiuni arfininngornermi nal. 12:44 nalunaarutigineqarpoq angerlarsimaffimmi igalaat aserorneqarsimasut.
Aammattaaq Qaqortumi nal. 13:50 nalunaarutigineqarpoq aserorterisoqarsimasoq, tassanilu biilimut igalaat aserorneqarsimapput.
Aasianni politiinut savilersorluni sioorasaarisoqarmat inuk tigusarineqarsimavoq:
- Angut tigusarineqarpoq, inunnik ajoqusertoqanngilaq.
Inuk innarluutilik Tasiilami saassunneqartoq
Tasiilami inuk innarluutilik saassunneqarsimavoq:
- Innarluutilik saassunneqartoq imminut illersorsinnaasimanngilaq akiuussinnaananilu. Taanna kiinnamigut arlaleriarluni tilluarneqarsimavoq napparsimmavimmukaanneqartariaqarluni. Suliamut atatillugu pasisaqarpugut, suliallu misissornqarnera nanginneqarpoq.
Sisimiuni pisortat illuannik aserorterineq
Sisimiuni atuareernermi ornittagaq inuusuttuaqqallu klubbiat Sukorsit aserorteriffigineqarsimavoq tillinniartoqarneranut atatillugu:
- Pinerluttup igalaat aqqutigalugit klubbi iserfigisimavaa, suli siusippallaarpoq pinerluttup suut tillissimanerai oqaatigisinnaanngikkallarparput, kisianni politiit suliami misissuipput.
- Taakku saniatigut ulapittorujussuuvugut angerlarsimaffinni amerlasuuni eqqissiviilliornernut atatillugu, nunap immikkoortuini assigiinngitsuni pisunik, Kalaallit Nunaanni Politiit nakkutilliisuisa pisortaat Thomas Jeppesen naggasiivoq.
