Ilulissani illoqarfiup qeqqa filmiliuusersorneqalertoq

Ilulissani illoqarfiup qeqqa ulloq unnuarlu nakkutigineqartussanngorpoq. Illoqarfiup qeqqani filmiliuutinik pingasunik ikkussuinissaq Avannaata Kommuniani kommunalbestyrelsimi amerlanerussutillit, Siumup Naleqqallu, qinikkat aggustip 28-ani ataatsimiinneranni aalajangerpaat. Borgmesteri, Lars Erik Gabrielsen (S), siunnersuuteqartuuvoq.

- Borgmesterip kissaatingaa illoqarfimmi assingiinngittunik pisoqartarnera peqqutingalungu illoqarfiup qeqqani filmiliuteqalissasoq, assersuutingalungu augustip aallartinnerani Ilulissani imerniartarfiup silataani Politiit persuttaanermi takunnittoqarsimaneranik paasissutissanik ujartuipput, ingerlatsivik qinikkanut allappoq.

Illuatungiliuttut, Demokraatit, Atassut Inuit Ataqatigiillu inatsisit qulakkeerneqarnissaat kissaatigalugu ikinnerussuteqarlutik itigartitsipput.

Kommunip ingerlatsiviani inatsisitigut sinaakkutit pillugit aalajangiineq sioqqullugu misissuisoqarpoq. Kommunip eqqartuussissuserisut filmiliuutinik ikkussuineq inatsisitigut qanoq sinaakkuteqarnersoq pillugu aperisimagai, allagaatini Sermitsiap pissarsiaani allaqqavoq. Kommunip misissuisimanera eqqartuussissuserisut pitsaasutut nalileraat tassani allaqqavoq.

Kalaallit Nunaanni sammisamut tassunga tunngasumik inatsiseqanngitsoq tassani allaqqavoq. Taamaattumik kommuni assersuutigalugu pinerlunnernik ikilisaaniarnermini "marsertunik" filmiliuusersuisinnaasoq allagaammi allaqqavoq. Danmarkimili inatsisit allaasut tassani aamma oqaasertalerneqarpoq.

 - Illoqarfiup iluani filmiliuteqarneq pillugu inatsisitingut aporfeqarnersoq allattoqarfik misissuivoq, misissuinermi paasinarsivoq illoqarfiit allat taamatut aaqqiisimasut, ingerlatsivik allappoq.

Sumiiffiit pingasut

Kommunalbestyrelsi taama aalajangernermini pisussaaffeqalerpoq innuttaasunut ersarissumik nalunaaqutsiissalluni sumi filmiliuuteqarnersoq.

Filmiliuutit pingasut ikkussuunneqarnissaat pilersaarutaavoq. Kalaalimineerniarfiup eqqaanut ikkussassaq imerniartarfiup tungaanut sammissaaq. Majoriamut ikkussassaq imerniartarfiup aappaata silataanut sammissaaq. Timersortarfimmut ikkussassaq pisiniarfiit Brugsenip Pisiffiullu tungaanut sammissaaq.

- Inuppassuit imerniartarfimmeereerlutik illoqarfiup qeqqa aqqusaartarpaat taamatullu ulluunerani assingiinngittunik pisoqartarpoq tamakkualu annerusumik nakkutingineqarsinnaanerat siunertaavoq, qularnanngittumik aamma pinaveersaartitsinermik taamatut aaqqiineq kinguneqarsinnaavoq, kommuni allappoq.

Kommunip suliaq pillugu innuttaasunut paasititsiniaanissani ilisimatitsissutigaa. Filmiliuutip filmiliugai ukioq ataaseq toqqoqqaneqartassasut, kommuni ilisimatitsivoq. 

Filmiliuutit pingasut pisiarinerat ikkussuunnerallu 40.000 koruunit missaanni akeqassasoq naatsorsuutigineqarpoq. Taakkua aningaasaliissutaareersut iluani akilerneqassasut aamma allassimavoq.