Ilulissani mittarfissap eqqaani ikuallattoqartoq

Ilulissani mittarfiliortut nalaanni Munck Gruppenip illutaani tallimanngornermi unnukkut ikuallattoqalerpoq.

Pigaartut pisortaat oqarpoq ikuallanneq najugaqarfiup nerisarfiani aallartissimasoq.

- Paasisavut naapertorlugit illu ikuallattoq najugaqarfigineqanngilaq. Ilulissani qatserisartut maannakkut ikuallattumik qamisaapput, tassanilu mittarfimmi qatserisartut aamma suleqataallutik, pigaartut pisortaat Bent Johnsen Sermitsiamut oqarpoq.

Mittarfik ikuallannermit sunnerneqanngilaq

- Paasisavut naapertorlugit mittarfiup sanaartorneqarnera ikuallannermit eqqorneqanngilaq, pigaartut pisortaat oqarpoq.

Ikuallanneq politiinut nalunaaqutaq 19.31 nalunaarutigineqarpoq. Nalunaarutigineqarnermiit akunnerup ataatsip missaa qaangiuttoq, maannakkut ikuallanneq Ilulissat mittarfiata YouTube-mi toqqaannartumik aallakaatitsineranit suli takuneqarsinnaavoq.

Bent Johnsenip ilisimatitsissutigaa Ilulissaniit aamma Ilulissanut timmisartuussinerit tamarmik ullumi naammassineqareersimasut, taamaattumillu ikuallattoqarnera pissutigalugu kinguaattoortoqarnanilu timmisartuussinerit taamaatiinnarneqarsimanngitsut.

Ikuallanneq qanoq aallartissimanersoq suli ilisimaneqanngilaq.

Greenland Airports Facebookimi quppernermini ilisimatitsivoq ikuallannermi inunnik ajoqusertoqarsimanngitsoq sumiiffik ikuallaffiusoq najugaqarfigineqanngimmat: