Avannaata Kommuniani kommunalbestyrelsi pingasunngorneq maajip 27-anni immikkut ittumik ataatsimiippoq. Oqaluuserisap aappaa tassaavoq Ilulissani umiarsualiveqarnikkut pissutsit. Tamanna kommunalbestyrelsimi amerlanerussuteqartut, tassa Siumumut Naleqqamullu ilaasortat akueraat.
Tamanna aalajangerneq isumaqarpoq maanna umiarsualiviusumi puttasunik nutaanik 4,7 millionit koruuninik nalilinnik pisinissaq, puttasullu maanna umiarsualivimmiittut Itisuarsummut nuunneqassasut, Avannaata Kommuniani borgmesteri, Sermitsiamut oqarpoq.
Avannaata Kommuniani kommunalbestyrelsi pingasunngorneq maajip 27-anni immikkut ittumik ataatsimiippoq. Oqaluuserisap aappaa tassaavoq Ilulissani umiarsualiveqarnikkut pissutsit. Tamanna kommunalbestyrelsimi amerlanerussuteqartut, tassa Siumumut Naleqqamullu ilaasortat akueraat.
Tamanna aalajangerneq isumaqarpoq maanna umiarsualiviusumi puttasunik nutaanik 4,7 millionit koruuninik nalilinnik pisinissaq, puttasullu maanna umiarsualivimmiittut Itisuarsummut nuunneqassasut, Avannaata Kommuniani borgmesteri, Sermitsiamut oqarpoq.
- Suna tamaat ataatsimut isigigaanni Ilulissani umiarsualiveqarnikkut assorujussuaq inissisimanerluppugut. Ukua aningaasaliissutit itisuarsummut tunnganngillat. Puttasut pioreersut tappavunnaanneqartussaapput, Lars Erik Gabrielsen (S) oqarpoq.
Sikkussaasassasut
Puttasut nutaassat maanna talittarfimmiilerumaartussatut naatsorsuutigineqartut ukiuunerani sikuleraangat qaqinneqassanatik sikkussaasassapput.
- Qaqeqattaarlugit piiartuarnissaat eqqarsaataanngilaq, tamanna qimakkusunnarpoq, uninngaannarsinnaasunik eqqarsarpugut, borgmesteri oqarpoq.
Puttasunut tunngatillugu suliamut 4,7 milliuunit koruunit aningaasartuutissatut naatsorsuutigineqartut suliniutinit allanit aningaasalerneqareersunit illikatitsinermi matuneqassasut aalajangerneqarpoq.
Ilulissani ikuallaaviup nutarternissaanut aningaasaliissutit sinneri 3,3 millionit koruunit, aqquserngit iluarsartuunneqarnissaannut aningaasaliissutit 600.000 koruunit kiisalu nunaqarfinni aqqusinerissaanissamut aningaasaliissutaareersut 800.000 koruunit Ilulissani nutaamik puttasuliornissamut atorneqartussanngorput.
Ilulissani ikuallaaviup iluarsartuunneqarnissaa naatsorsuutaasumit akikinnerusoq ingerlatsivik allappoq. Najugaqarfinni mikinerusuni aqquserngit iluarsartuunneqarnerannut tunngatillugu 2026-mi Nuussuarmi, Aappilattumi, Upernavik Kujallermi, Ukkusissani, Saattuni, Ikerasammi, Saqqami Oqaatsunilu suliassat aallartinneqarsimasut, kommuni aamma allappoq.
Illuatungiliuttut: Paasissutissat amigarput
Illuatungiliuttut, tassa Demokraatit, Atassut IA-lu taaseqataanngillat. Suliamut tunngatillugu paasissutissanik paasisariaqartutut nalilikkaminnik amigaateqarput.
- Itisuarsummi puttasoqarfissap suliarineqarnerata ingerlanneqarnera apeqquteqarfigivarput, teknikkikkut ataatsimiititaliakkoornikuunnginnera isoralugu aammalu suliap qanoq aallartissimanera apeqqutigalugu, taakkua allapput.
Teknikkimut ataatsimiititaliamut ilaasortap, illuatungiliuttuneersup, Niels Erik Brop (D), oqarnera naapertorlugu suliniut ataatsimiititaliami suliarineqarnikuunngilaq. Aningaasanik nuussisoqartussanngormat tamanna ataatsimiititaliap aatsaat suliaraa. Tassalu taassuma oqarnera naapertorlugu aningaasanik nuussineq kisiat, suliniut pinnagu, ataatsimiititaliap aalajangiiffiginikuuaa.
Sermitsiap ataatsimiititaliap siulittaasua, Sakio Fleischer (S) attaveqarfigaa. Taassuma aningaasaliissutinik nuussineq ataatsimiititaliami eqqartorneqarsimasoq uppernarsarpaa. Suliniummulli tunngasumik ataatsimiititaliaq eqqartuisimanersoq uppernarsaanngilaq.
- Qoqassiilluni suliniuteqartoqarsimanissaa naatsorsuutiginngilara. Siusinnerusukkulli umiatsialiveqarnikkut Ilulissani inissameerneq qaangerniarlugu iliuuseqartoqarpoq, Sakio Fleischer Sermitsiamut oqarpoq.
Suliniut ataatsimiititaliami eqqartorneqarsimanngitsoq borgmesterip aamma uppernarsarpaa.
- Taanna ilumoorpoq. Qanoq isikkoqarlutik pilersissasut teknikkimut ataatsimiititaliap suliarinikuunngilaa, Lars Erik Gabrielsen oqarpoq.
Akeqalissasut
Ilulissani kommunip puttasuutaani tamani umiatsialiveqarneq akeqalissasoq, taanna aamma oqarpoq. Tassa imaappoq, aalisartut atuisullumi allat, umiatsiaat aalajangersimasumik inissisimaffeqalissapput. Atuinerli qanoq akeqassanersoq teknikkimut ataatsimiititalip suli suliarinngikkaa, borgmesteri oqarpoq.
Suliniutaareersut aningaasartaat ikilisut
Suliniutit aningaasalerneqareersut aningaasartaasa tigunerat illuatungiliuttut aamma nuannaarutiginngeqaat.
- Aningaasat siornali missingersuusianut ilaareersunit, nunaqarfinni
aqqutigissaanissamiit aningaasanik ilanngaariarluni, puttasunut
atorniarneqartut aningaasat 1.400.000 koruuniupput. Isumaqarpugut taamanili pilersaarusiorneq
aallartinneqareersimasussaagaluartoq. Ikuallaaveqarnermiik 3.300.000 koruunit tiguneqarput, uffalu avannaani sumiluunniit eqqagassanik suujunnaarsitsineq
suliniutini pingaaruteqarluinnaraluartoq, illuatungiliuttut nalunaarput.
Taakkua Ilulissani talittarfeqarnikkut aaqqiinissamut isuma aamma isumaqatigigaluarpaat, sulialli suliarineqarneranni peqataanerorusupput.
- Isumaqatigingaarparput Ilulissani talittarfeqarneq sukkanerpaamik aaqqiivigineqassasoq. Isumaqarluinnarpugullu isummersoqataatitaasinnaagutta ataatsimut angusanik kusanartunik pilersitseqatigiissinnaalluta. Eqqarsaatigisariaqarparpulli aningaasivitta pisinnaasaa aammalu siunissami paarisaqarluarnissaq, taakkua allapput.
