Imaani sikut akornanni nalunnermut Kalaallit Nunaanni pissartanngorniunneq siullerpaaq: Imaq nillertoq toqumik kinguneqartuaannanngilaq

Inuppassuit takorluuisarput imaanut nillertumut nakkaraanni, tamanna annannissamut neriuutaarutsitsisartoq. Taamatut takorluuisoqartarnera peqatigiiffiup Siku Svøm-ip unammillerniarpaa, peqataasussat nutaat misilittagallillu Kalaallit Nunaata imartaani sikut akornanni siullerpaamik ammasumik pissartanngorniutsitsileruni.

Kalaallit Nunaanni pissartanngorniunneq Nuup saavani pissaaq okrobarip 18-iani. Unammersuartitsineq ataatsimoornermik pilersitsissaaq aammalu minutsimi ataatsimiit marluk tungaannaanut immami nillertumi taamaallaat uumasoqarsinnaaneranik takorluuisarneq unammillerneqassalluni. Peqatigiiffiup taamaaliornermini oqariartuutaa paasiuminartuuvoq: Annanniuteqartarit – inuunermi pisariaqartilluinnakkannik minutsinik tunisinnaavaatit.

Taamak Siku Svøm tusagassiuutitigut nalunaaruteqarluni allappoq.

- Kalaallit Nunaanni meeraallunga, ilisimatinneqartarpunga, imaanut nakkaraanni toqu avaqqunneqarsinnaajunnaartartoq. Taamatut takorluuisoqartarnera maannamut suli tusartarpara. Takutikkusupparput, neriuuteqarnissaq pissutissaqartoq – aammalu sutigut tamatigut isumatusaarnerusoq imaaniitilluni annanniummik atugaqartarnissaq, taamak oqarpoq Bo Krüger, aaqqissuusseqataasoq aammalu peqatigiiffimmi Siku Svøm-imi siulersuisuni ilaasortaasoq, Qullissanilu inunngorsimasoq.

- Imaani sikut akornanni nalunnguartartuusugut misigisarparput, timi imermi nillertumiilluni takorluukkamiit piginnaasaqarnerusartoq. Taamaattorli pilersaarutaareersumik unammisitsinermi nalulluni peqataaneq imaanut nakkariataarnermit allaaneruvoq. Taamaattumik pingaarnerpaatut oqariartuutigaarput: Imaaniitilluni annanniut atortarsiuk. Taassuma puttatissavaatit aammalu annaassiniartut ilinnut anngunnissaanut piffissaqarnerulertissavatit, taamak oqarpoq Emma Firestone, Siku Svøm-imi siulersuisuni ilaasortaq.

25 meteriniit en kilometerimut

Unammersuarnermi peqataasussat isorartussutsit assigiinngitsut peqataaffigissallugit toqqarsinnaasaat tassaapput 25, 50, 100, 200 og 1.000 meterit. Isorartussutsit tamarmik arnanik angutinillu ajugaatitsisoqartassaaq, peqataasullu tamarmik peqataasimanermut saqqarmiunnatsinneqassapput.

- Takutikkusupparput, imaani sikulimmi nalunneq timersuutaasinnaasoq aammalu ataatsimoorluni nutaanik misigisassarsiorfiusinnaasoq. Inuit ilaannut 25 meteri inuttut ajugaanertut annertuutut misigineqartarpoq. Taakku aamma peqataasimanermut uppernarsaammik saqqarmilerneqarnissaat pissusissamisoorpoq, aaqqissueqataasoq Henrik Stokholm oqarpoq.

Unammersuarneq imaani sikut akornanni nalunniartalerlaanut misilittagaqareersunullu saaffiginnippoq. Aaqqissuisut kaammattuipput aallarterpaat isorartussutsit naannerit peqataaniarfigissagaat aammalu unammineq sioqqullugu aaqqissuisunut saaffiginnissasut, peqataaniarnerminnut atatillugu nalornissuteqarunik. Isorartorsuseq 1.000 meteri taamaallaat imaani sikut akornanni naluttartut misilittagartuut peqataaffigisinnaavaat.

Pissartanngorniunneq kikkunnut tamanut aamma nunani allaneersunut ammavoq. Taamatut naluttartut arlalissuit Danmarkimiit aamma Frankrigimiit peqataaniarlutik nalunaareersimapput, taakkulu Nuummut ingerlaassapput unammersuarnermi peqataajartorlutik. Siku Svøm Grønlandsbankenimit aningaasaliiffigineqarpoq.