Tuluit oqaasii nunarsuarmi oqaatsit ataatsimoorussamik atorneqartarput, taamaammallu - kalaallisut oqaatsinut ilanngullugit - meeqqat atuarfianni nukittorsarneqartariaqarput.
Tamanna Inatsisartut sapaatip-akunnerani kingullermi aalajangerpaat. Aalajangiineq IMAK-imit (Kalaallit Nunaanni ilinniartitsisut kattuffiat) isumaqatigineqarlunilu isumaqatigineqanngilaq, tassmai kalaallisut oqaatsit nukittorsarneqarnissaannik tapersersuigaluarlutik tuluttut ilinniartitsinerup annertusineqarnerata kinguneri ernummatigaat.
Tuluit oqaasii nunarsuarmi oqaatsit ataatsimoorussamik atorneqartarput, taamaammallu - kalaallisut oqaatsinut ilanngullugit - meeqqat atuarfianni nukittorsarneqartariaqarput.
Tamanna Inatsisartut sapaatip-akunnerani kingullermi aalajangerpaat. Aalajangiineq IMAK-imit (Kalaallit Nunaanni ilinniartitsisut kattuffiat) isumaqatigineqarlunilu isumaqatigineqanngilaq, tassmai kalaallisut oqaatsit nukittorsarneqarnissaannik tapersersuigaluarlutik tuluttut ilinniartitsinerup annertusineqarnerata kinguneri ernummatigaat.
- Meeqqat amerlasuut tuluttut oqalupput, tamannalu pissutigalugu kalaallisut oqaaseqarneq navianartorsiulersinnaavoq.
- Oqaatsigut annaanngikkutsigit meeqqat atuarfianni kalaallisut oqaatsit nukittorsarneqartariaqarput, IMAK-imi siulittaasoq Elna Heilmann oqarpoq.
Inatsisartut aalajangiinermikkut tuluit oqaasiisa allamiutut oqaatsinut siullernut ilanngunneqarnissaat siullermeerluni iliuuseqarfigineqarpoq. Oqaasileriffik tuluttut oqaatsit allamiutut oqaatsinut siullernut ilanngunneqapallaarpata kalaallisut oqaatsit ajoquserneqarsinnaasut mianersoqqussuteqarsimavoq. Ernumassut IMAK-imit taperserneqarpoq:
- Tuluit oqaasiisa allamiutut ilinniarneqaqqaarnissaannut tunngatillugu isumarput naapertorlugu mianersortariaqarpugut, aalajangertinnatalu misissoqqissaartariaqarparput. Tuluttut oqaatsit atugaaneruleriartoramik Kalaallit Nunaanni uagutsinnut navianarsinnaasut isumaqarpugut. Oqartarnerattuut: Oqaatsinik allanik tammariartortitsisartuupput.
Oqaatsit oqaatsinik allanik tammariartortitsisartut tassaapput oqaatsit salliunneqarnermikkut amerlanerusunit atorneqaleraangamik oqaatsinik allanik tammariartortitsinngikkunik tammartitsisartut.
Ilinniartitsisut amerlanerusut sulinermilu avatangiisit pitsaanerusut
Kalaallisut oqaatsit pingaarnerpaatinneqassasut Inatsisartuni aamma isumaqatigineqarpoq. Tassanilu arlalitsigut iliuuseqartoqarsinnaasoq Elna Heilmann isumaqarpoq.
Siullertut pingaarnertullu ilinniartitsisut pikkorissartinneqarlutillu ilinniarteqqinneqarnissaat.
- Ullumikkut ilinniartitsisut amigaataangaarput, tamannalu sinerissami tamangajammi atuuppoq, taanna oqarpoq.
Elna Heilmannip atuarfiit amerlanersaanni akullerni angajullernilu ilinniartitsisunik ilinniagaqarsimasunik atuartitsineq pingaarnerutinneqarmat taamaammat nukarlernik atuartitsineq pingaaruteqannginnerulersinneqartartoq assersuutigalugu tikkuarpaa, tassani meeqqat kalaallisut ilinniartitsinissamik ilinniagaqarsimasumik ilinniartitsisoqarneq ajorput.
- Tamannalu tunngavimmut sunniuteqarpoq, taanna oqarpoq.
Ilinniartitsisunngorniartulli ikiliartuinnarput, taamaammallu ilinniartitsisunngornissaq pilerinarnerulersinniarlugu iliuuseqartoqartariaqarpoq.
- Meeqqat atuarfianni atukkat ajormata inuusuttut ilinniartitsisunngorniarusuttoqannginnera paasinarpoq.
- Taamaammat meeqqat atuarfiat iliuuseqarfigisariaqarparput. Pikkorissartitsinikkut, aammali kommunini suliffimmi avatangiisit pillugit iliuuseqartoqarneratigut.
Ilinniartitsisut piareersimanngitsut
Naalakkersuisut kalaallit oqaasiisa inissisimaffiata atorneqarneratalu nukittorsarneqarnissaat attatiinnarnissaallu siunertaralugu meeqqat atuarfiini kalaallisut tuluttullu ilinniartitsinerup nukittorsarneqarnissaanut iliuusissatut pilersaarummik suliaqarnissaannik peqquneqassasut Inatsisartut sisamanngornermi apriilip 16-ianni aalajangerput.
Tuluttut ilinniartitsinerup qanoq pitsanngorsarsinnaaneqarnissaanik misissuinermi kalaallisut oqaatsit ajoqusinngikkaluarlugit atuisut tamarmik peqataatinneqarnissaat pingaaruteqartoq Elna Heilmannip oqaatigaa.
Tamannattaaq ilinniartitsisut ulluinnarni meeqqat atuarfianni sulinerannik allannguerujussuartussaavoq.
Tuluit oqaasii allamiut oqaasiini siullertut ilinniarneqalerpata ilinniartitsisut tuluttut taamak atuartitsitiginissamut piareersimappat?
- Naamik, piareersimanngillat. Piareersimanngitsut isumaqarpugut, Elna Heilmann oqarpoq.
Iliuusissatut pilersaarusiaq kingusinnerpaamik 2027-mi upernaakkut ataatsimiinnermi saqqummiunneqartussaavoq.
