Imarsiornermik Ilinniarfik allamut nuussasoq
Nuummi Imarsiornermik Ilinniarfiup Issortarfik 5-imi attartornera ukioq nutaaq aallarnerfigalugu taamaatissaaq, taamaattumillu Ilinniartitaanermut Naalakkersuisoqarfik nutaamik, nutaaliaasumik piffissamullu naleqquttumik imarsiornermik ilinniarfinnut assigiinngitsunut atugassanik ujartuivoq.
Namminersorlutik Oqartussat Imarsiornermik Ilinniarfiup illutaanik nutaanik piffissami qaninnermi sanaartortinneqarnissaat Naalakkersuisut naatsorsuutiginngilaat, Naalakkersuisoq Nivi Olsen ilisimatitsivoq.
Assi: Oscar Scott Carl
Ilinniartitaanermut Naalakkersuisoqarfik ilinniartitsisunut umiarsuullu naalagaatut ilinniartunut, imaatigut angallannermi ilinniakkanut allanut tamatumunnga attuumassuteqartunut pisariaqartunik sinaakkutissaqarnissamik neqerooruteqarsinnaasumik isumaqatiginninniarpoq.
Ilinniartitaanermut Naalakkersuisoq Nivi Olsen Demokraatineersumut Bo Martinsenimut paragraf 37 naapertorlugu akissummini “siunissami qanittumi” attartornissamut isumaqatigiissutip atsiornissaa naatsorsuutigineqartoq ilisimatitsivoq.
Piginnittuuneq attartornerlu
Imarsiornermik ilinniarfiup illutaa Naalakkersuisut nammineq pigisarerusukkaat akissummi allaqqavoq. Maannali pissanngilaq.
Naalakkersuisut “illutaasa pigineqarneri imaluunnit attartorneqarneri nalilersornikuunngilaat aamma naatsorsornikuunngilaat” akissummi atuarneqarsinnaavoq.
- Nuummi illuutinik niuernerup ukiut ingerlanerini ineriartornera eqqarsaatigalugu ininik attartorusuttut amerliartorput aamma ininik attartornermut akit akitsoriartorput, taamaattumik ilinniarfiup illutaanik pisariaqartitanik - aamma ilinniakkat pikkorissarnerlillu nutaat ineriartortinneqarnissaat eqqarsaatigalugit, kiisalu nunami maani imarsiornermik ilinniagassat pikkorissarnerillu tamarmik katersorneqarnissaannik periarfissat eqqarsaatigalugit - piginnittuunissaq siunissami pissusissamisoornerpaajussasoq Naalakkersuisut nalilerpaat, Nivi Olsen ilisimatitsivoq.
Taassuma imarsiornermut tunngasunik ilinniarfinnik nutaanik ineriartortitsineq pilersitsinerlu aamma immami angallannermi ilinniakkat pikkorissarnerillu tamarmik nunami maani ataatsimut katersorneqarsinnaanerat eqqarsaatigalugit tamanna isiginiarneqartariaqartoq tikkuarpaa.
Aningaasaqarneq unammillerneqartoq
Aamma aningaasaqarneq: Nunatta Karsiata aningaasaqarnerata ajornartorsiornerani piginnittuunissaq attartortuunissarsluunniit eqqarsaatigineqarpoq. Nivi Olsenip Sisimiuni Saviminilerinermik Ilinniarfiup sanaartornissaanut aningaasarpassuit immikkoortinneqareersut ilaatigut tikkuarpaa.
Taamaattumik Namminersorlutik Oqartussat "siunissami qaninnermi“ imaatigut angallannermut ilinniarfimmik sanaartornissamik suliaqarnissaat naatsorsuutigineqassanngilaq, naak suli kissaatigineqaraluartoq, Nivi Olsen taama oqarpoq.
Imarsiornermik Ilinniarfimmi siulersuisut nutaamik atuarfiliornissamut pilersaarusiamik 2024-mi saqqummiussipput, tassanilu ilinniarfiup 132 millionit koruuninik akeqarnissaa missingersuutigineqarpoq.
Ullumikkut Issortarfik 5-imi init attartornerat ukiumut 1,35 millionit koruuningajannik akeqartarpoq. Tamatumunnga ilanngullugu pikkorissartitsinermut atortussat attartorneqartarput, taakkulu ukiumut 695.000 koruuninik naleqartarput, akissummi allassimavoq.
