Imeqqutaalat manniinik ungasinngitsukkut immaqa katerseqqissinnaalissaatit

Naalakkersuisut imeqqutaalat manniinik katerseqqissinnaalernissaq siunertaralugu sumiiffinni eqqugaasuni tusarniaanissamik aaqqissuussinissaat pillugu Jens Napaattooq (N) siunnersuuteqarmat Inatsisartut marlunngornermi oqallipput.

Uumasoqatigiit piujuaannartinneqarnissaat eqqarsaatigalugu manniit qaqugukkut qassillu katersuisoqarsinnaaneri Naalakkersuisut nakkutigissavaat.

SIunissaq ungasinnerusoq eqqarsaatigalugu uumasoqatigiit ikiliartornerannik takussutissaqarnera pissutigalugu amerlassusaat ernummatigineqarmat imeqqutaalat manniinik katersisinnaaneq 2001-imi inerteqqutigineqalerpoq.

Manninnik katersuinermut malittarisassat pissutsinut maanna atuuttunut naleqqussarnissaannut piffissanngortoq Jens NapãtôK’ siunnersuuteqarnermini tunngavilersuivoq. Taanna inuiaqatigiit pisariaqartitaannut, silap pissusiata allanngoriartornerata sunniutaanut inuussutissanillu imminut pilersornerunissamut innersuussivoq.

- Nunarsuarmi akit qaffakkiartornerat aamma Kalaallit Nunaanni eqquivoq. Inuppassuit ulluinnarni inuunerminnik ataqatigiissaarinissaat ajornakusoornerulerpoq. Taamaammat innuttaasut eqaannerusumik najukkamullu naleqqussaasumik malittarisassat aqqutigalugit imminut pilersornissamut periarfissaqarnerulernissaat pisariaqarluinnarpoq, Jens NapãtôK’ immikkoortoq 2026-mi upernaakkut ataatsimiinnermi siullermeerneqarmat oqarpoq.

Inatsisartut Naleqqami ilaasortaq isumaqatigaat. Siunnersuut 26-t akuerineqarluni akerlilerneqaranilu taasissutigineqarmat marlunngornermi oktobarip 13-ianni akuersissutigaat.

Terianniat amerlassusiannut sunniuteqartut

Aamma atuaruk

Qeqertani timmissat immikkuullarissut ulorianartorsiorput: – Timmiaaruppat uteqqinnissaat nalunarpoq

Siullermeerneqarnerani manninnik katersisarneq kulturikkut kinaassutsimik ilisimassusermillu pingaarutilimmik ersersitsisartoq, ukiorpassuarnilu inerteqqutaasimammat kinguaariinni inuusunnerusuni annaanneqarsinnaasoq Inatsisartuni partiit erseqqissarpaat.

Partiit tamarmik siunnersuut Aalisarnermut, Piniarnermut Nunalerinermullu Ataatsimiititaliamut innersuussutigaat, taakkualu Pinngortitaleriffik naapertorlugu immap nattoralunnera suli appariartortuusoq isumaliutissiissumminni allapput. Manninnik katersineq sunniuteqarsinnaasoq misissuinerit takutippaat.

Ingammilli terianniat siammarsimaneri pissutigalugit imeqqutaalat ikiliartortut ataatsimiititaliaq aamma allappoq. Kitsissunnguit qeqertaasa eqqaanni issittumi terianniat amerliartuinnarnerat imeqqutaalat ikiliartornerannut pissutaanerpaasoq Pinngortitaleriffiup 2025-mi nalunaarusiami aamma oqaatigaa.

Ataatsimiititaliap isumaqatigiilluni siunnersuut akuereqquaa. Malittarisassat nutaat 2027-mi piaqqiornerup aallartinnginnerani atuutilissammata najukkani tusarniaaneq piaarnerpaamik ingerlanneqassasoq kaammattuutigaa. Naalakkersuisullu imeqqutaalaqarfinni teriannissanik ikilisaanissamik suliniuteqarnissaat aamma kaammattuutigaa.

Piniartut atuisartuillu ilisimasaat uumassusillit pillugit aqutsinermut ilanngunneqassasut Naalakkersuisut naliliinerminni pingaartippaat, taamaammallu sumiiffinni tusarniaanerit ingerlanneqartassasut isumaqatigiissutigaat.

Aalisarnermut, Piniarnermut, Nunalerinermut Imminut Pilersornermullu Naalakkersuisup Peter Borgip (D) Naalakkersuisut soorunami allannguutit piviusunngortikkumaaraat oqarluni ataatsimiititaliaq suliaanut marlunngornermi oqallinnermi qujaffigaa.