Imigassaq aalakoornartortalik pillugu ukiunut arlalinnut politikkissaq, ilisimatusarnermit tunngavilik, innersuussutinik nutaanik tunngaveqartussaq Inatsisartuni suli isumaqatigiinniutigineqanngilaq. Innersuussutit oktobarip aallartilaarnerani meeqqanut, inuusuttunut ilaqutariinnullu naalakkersuisumit Mads Pedersenimit (IA) aamma peqqissutsimut inunnullu innarluutilinnut naalakkersuisumit Anna Wangenheimimit (D) saqqummiunneqarput, tassanilu paasissutissat Inatsisartunut ilaasortanut agguaanneqarput.
– Agguaaneq Inatsisartunilu politikkikkut suliaqarnermik isumaqatiginninniarnermilluunniit pinngitsoorani kinguneqartariaqarnani pingaarnertut paasissutissiissutaasarmat erseqqissassallugu pingaaruteqarpoq, Peqqissutsimut Inunnullu Innarluutilinnut Naalakkersuisoq Anna Wangenheim (D) Sermitsiamut oqarpoq.
Imigassaq aalakoornartortalik pillugu ukiunut arlalinnut politikkissaq, ilisimatusarnermit tunngavilik, innersuussutinik nutaanik tunngaveqartussaq Inatsisartuni suli isumaqatigiinniutigineqanngilaq. Innersuussutit oktobarip aallartilaarnerani meeqqanut, inuusuttunut ilaqutariinnullu naalakkersuisumit Mads Pedersenimit (IA) aamma peqqissutsimut inunnullu innarluutilinnut naalakkersuisumit Anna Wangenheimimit (D) saqqummiunneqarput, tassanilu paasissutissat Inatsisartunut ilaasortanut agguaanneqarput.
– Agguaaneq Inatsisartunilu politikkikkut suliaqarnermik isumaqatiginninniarnermilluunniit pinngitsoorani kinguneqartariaqarnani pingaarnertut paasissutissiissutaasarmat erseqqissassallugu pingaaruteqarpoq, Peqqissutsimut Inunnullu Innarluutilinnut Naalakkersuisoq Anna Wangenheim (D) Sermitsiamut oqarpoq.
Inassuteqaatit annertuumik sukaterinissamik piumasaqaatillit
Imigassaq aalakoornartortalik pillugu politikkimut innersuussutit, inuit peqqissusaannik pingaartitsinermik tunngaveqartut niuernermilu soqutigisat eqqarsaatiginagit suliarineqartut, meeqqat imigassamit aalakoornartortalimmit ajoquserneqannginnissaannik siunertaqarput.
Innersuussutit ilaat ukuupput:
- KNI-mi niuertarfeqarfik Pilersuisoq ukiuni tallimani ikaarsaarfiusumik imigassamik aalakoornartortalimmik tuniniaanermi kisermaassisunngussasoq.
- Imigassanik aalakoornartortalinnik tuniniaaneq ataasinngornermiit tallimanngornermut nal. 10.00-imiit 20.00-imut pisinnaassasoq.
- Imigassanik aalakoornartortalinnik tuniniaaneq arfininngornermi, sapaammi aamma nalliuttuni kiisalu meeqqat ulluanni pisassanngitsoq.
- Inunnut 21-t inorlugit ukiulinnut imigassamik aalakoornartortalimmik tuniniaasinnaaneq imaluunniit sassaalliisinnaaneq inerteqqutinngortinneqassasoq.
Innersuussutit sisamanik suliniuteqarfeqarput: Imigassamik atuinerup aqunneqarnerulernissaa, katsorsartinnissamut periarfissaqarnerulernissaq ilaquttanillu tapersersuisoqarsinnaalernissaa, ataatsimoorfinnik nukittuunik imigassamik aalakoornartulimmik atuiffiunngitsunik pilersitsinissaq innuttaasunullu sukumiisumik paasissutissiinissaq.
Imigassaq aalakoornartortalik pillugu isumaqatigiissut
Peqqissutsimut inunnullu innarluutilinnut naalakkersuisoq peqqinnissaq pillugu isumaqatigiissut annertusineqartoq pillugu isumaqatiginninniarnerit ukiap ingerlanerani ingerlanneqassasut, Naalakkersuisullu sinnerlugit isumaqatiginninniarnernik aqutsissalluni nassuiaavoq. Anna Wangenheim matumani imigassaq aalakoornartortalik pillugu isumaqatigiissummik, nuna tamakkerlugu atuuttussamik ilanngussiumavoq.
– Taamaammat Naalakkersuisut peqqinnissamut isumaqatigiissummik annertusisumik isumaqatiginninniartut suleqatigalugit nuna tamakkerlugu imigassamik atuinermut isumaqatigiissutip ineriartortinnissaanut tunngaviusunik siunertanillu nalunaaruteqarnissaq sulissutigerusuppaa, Anna Wangenheim oqarpoq. Isumaqatigiissutigineqarsinnaappat aappaagu imigassaq pillugu isumaqatigiissummik suliaqarneq aallartissinnaassaaq.
– Isumaqatigiissutip siunertaa pillugu nalunaarummik ilaneqarnissaanut isumaqatigiissuteqartoqarpat, suliaq aappaagu aallartinneqarsinnaavoq, taamaassappat isumaqatiginninniarnernut taakkununnga uanga aamma siuttuujumaarpunga.
Illuatungiliuttut sakkortuumik isornartorsiuisut
Sulisitsisut aamma niuertut namminersortut – ilaatigut Kalaallit Nunaanni Brugseni Pisiffillu – imigassamik kisermaassinissamik siunnersuut isornartorsiorlugulu imigassamut aalakoornartortalimmut politikkimut atatillugu suleqataarusupput.
Innersuussutit saqqummiunneqareersullu illuatungiliuttup Naleqqap Naalakkersuisut siulittaasuat Demokraatillu “aalajangiisimanerminnik allanngortitsinerarlugit” isornartorsiorpaat. 2023-mi ukiakkut ataatsimiinnermi immikkoortoq 67 oqaluuserineqarmat imigassamut politikkimi inerteqqutit qanorluunniillu annikitsumik malittarisassaliinerit suulluunniit partiimit akerlerineqartut partiip oqaaseqartartua Jens-Frederik Nielsen oqarpoq.
– Immaqa taamani upperiuminarpoq - maannali suna takuarput?
Naalakkersuisut, Demokraatit qitiusumik inissisimaffigisaasa, allakkiaq Imigassaq aalakoornartortalik pillugu ukiunut arlalinnut politikkissamut innersuussutit saqqummiuteqqammerpaat. Tassani siunnersuutigineqartut tassaapput Jens-Frederik Nielsenip Demokraatillu siornatigut „ajorluinnartutut“ aamma „naalagaaniartutut“ taasaat: pisortat imigassamik kisermaassinerat, imigassamik ussassaarinerup inerteqqutigineqarnera, 21-nik ukioqalernissamut killiliineq kiisalu ammasarfiit killilerneqarnissaat aammalu tuniniaanermut sassaallernermullu malittarisassat nutaat, Jens Napãtôk oqarpoq.
