Ivalo Amassen isumaginninnermi siunnersortitut inuunerissaasutullu ilinniagaqarsimavoq.
Inoqatiminik ikiuerusunneq sulinermini aallaavigaa, tamannalu pissutigalugu
imminut puigorsimalluni.
Ivalo Amassen isumaginninnermi siunnersortitut inuunerissaasutullu ilinniagaqarsimavoq.
Inoqatiminik ikiuerusunneq sulinermini aallaavigaa, tamannalu pissutigalugu
imminut puigorsimalluni.
- Suliffigisimasanni siorna suliamik suliaqartilluta, pisumi politiit
angerlarsimaffimmut ornigunnissaat utaqqigatsigu. Sivisuumik utaqqigatta,
angullu kamattoq angerlarsimaffimmit anillakkami saneqqullutalu, tassanilu arlaanik
igitaqarluni, paasinarsillunilu igitaa tassaasoq savik.
- Angerlareerlungali suliffigisimasanni pisimasut meeqqanik kinguaassiuutitigut atornerluinernik toqutsinernillu oqaluttuat eqqaasaatigisalerpakka. Oqaluttuat
tamakku sukumiilluinnarput killilerniarsimanngisakka. Taamani
siunnersorneqarlungaluunniit oqaloqatigineqannginnama, siornalu pisimasup
piffissamut tassunga toqqaannartumik utersaartikkaminga, Ivalo Amassen sioorasarnerminut
patsisaasoq pillugu taama oqaluttuarpoq.
Suliffigisimasaani aamma — suliassat ilungersunartut saniatigut — sulisut
sullitaminnit sioorasaarneqartarnermikkut sakkortuumillu
qisuariarfigineqartarnermikkut, aarlerinartorsiorsinnaasarput taakkualu
eqqissisarniarlugit Ivalo suleqataalu nukimminnik atuisariaqartarlutik.
Aqqusinikkut pisutsilluni isikkorlunneqarnermik oqalorujuffigineqarnermillu
pisoqarsinnaasarpoq.
SIOORASARNEQ SUNAAVA?
Siooranermik naalliuutit suussusaat arlaliupput, tamatumani
siooraneq allaanertut saqqummertarsinnaalluni. Ingerlaavaartumik
ernumassutaasinnaavoq, sakkortussusaanik allanngorartuusinnaalluni
iluaalliortitsillunilu (nalinginnaasumik siooranertut). Siooranermik
artornarnerusumik ajortinnerusinnaalluni, tassanngaannartumik saqqummertarluni
toqulersoralunilu (soorlu annilaangarujussuarluni). Aamma allatut
saqqummersinnaasarpoq, ersiutit soorlu
pisunut aalajangersimasunut atasinnaallutik.
Siooraneq imminut naleqartinnermut sunniuteqartarpoq aamma
ilinniakkat suliffillu paarissallugit ajornakusoornarsinnaalluni. Siooraneq
ajortumik kaaviiaartitsisunngorsinnaavoq, ilaqutariinnermut
inooqatigiinnermullu inuunerisamut sunniuteqarluni. Amerlasuut siooranertik
toqqorterniartarpaat, tunuarsimaalerlutik kiserliulerlutillu aamma imminnut
mattuttarlutik. Kisianni amerlasuut misigisarput siooranertik pillugu ammasumik
oqaluttuarigaangamikku nassuerutigalugulu siooranertik initunnginnerulersartoq.
Siooranermik naalliuuteqarneq tarnikkut nappaatinut
siaruarsimanerpaanut ilaavoq. Nunat Europamiittut arlallit akornanni misissuinerup
annertuup inerniliuppaa innuttaasuni inersimasuni ukiup ataatsip ingerlanerani
siooranermik atugaqarsimasut 12 procentit missaaniittut. Arnat angutinit
amerlanerusut siooranermik nappaateqartarput.
Najoqqutaq: siooraneq pillugu quppersagaq, Akaareqatigiittap
saqqummersitaa
Ullormi pineqartumi angut savilik Ivalomut eqquivoq. Imminut
mattulluinnarpoq, aatsaallu biilerluni taxarluniluunniit suliartorsinnaasarluni,
aappanilu ilagitinnagu aqqusinikkut pisussinnaanani.
- Imminut
mattuppunga. Allaannginnami isiinnartoqarsinnaassasoq, taamaattumik matu silarleq
parnaarneqartuaannarpoq. Matup parnaarnissaa ileqquliutiinnarakku, tassali
annilaangasangaarama.
Anisinnaajumalluni
nukissaqartariaqartartoq
Ivalo aninissaminut piareersarluarsimanngikkaangami, sioorasarnermi kinguneranik
piffissamik sivisuumik atuisariaqartarpoq.
- Nalunngilara
qaqugukkut suliartortussaallunga, taamaattumik anisinnaajumallunga nukissannik
katerseqqaartariaqartarpunga. Tamanna nukimmik atuiffigisorujussuuara.
Ilaanneeriarluni suli takkuttarpoq, oqarpoq.
Ullut ilaanni suleqatinilu nukinginnartumik suliaqareerlutik
ataatsimiigiaqquneqarput, tassanilu pisortaata nassuiaappaa angutip
kamassimasup Ivalo ujaarisimagaluaraa.
- Taama pisoqareermat aamma allaffinni sulitillunga allaffiga parnaarusuttalerpara.
Qanormi isertoqaraluarpat? Qanoq iliussaanga? Sioorasaarneqarutta nalunaarutiginissaanut
pisussaaffeqarnerput tuppallersaatigaara. Suliffilli uannut toqqissisimanarunnaarpoq.
Sioorasalerpunga suliffinnilu kisimiikkusukkunnaarlunga. Suleqatiga anisussanngoraangat,
kisimiinnissara siooragisalerpara.
Atorfimminit
soraartoq
Ivalo nukissaarulluinnarpoq. Ulloq naallugu siniffimmi nalasinnaasarpoq,
qiassaalu takkuteriasaarsinnaasarluni. Siooraleraangami eqqarsartarpoq:
„Meeqqammi eqqugaassappata” Apeqqutillu allat nuanniitsunut tunngasut.
- Aatsaavissuaq
inuuninni aatsaat taama siooratigivunga. Kisimiillunga pisussinnaanngilanga. Sinissinnaanngingajappunga
nipillu sakkukitsunnguit itissutigisarlugit. Nalunaaquttap akunneri
ataasiakkaarlugit sininnerusarpunga, oqaluttuarpoq.
Ullumikkut Ivalo taamatut siooraleraangami imminut eqqissisarniartarpoq.
- Tamanna
eqqartuinnarlugu timikkut kiagunnera malugisinnaavara. Uummatiga tillerululersarpoq
anersaartorniarneralu ajornakusoortittarlugu, oqarpoq.
Taamaattumik Ivalo Amassen suliffimminit soraarniarluni aalajangerpoq,
kingornalu allamik suliffittaarluni ikiorneqarluarlunilu.
Suliffimminit soraarniuteqartinnani nakorsiarpoq. Sioorasarninilu aamma
uippakajaarnini pissutigalugit napparsimalluni sulinngiffeqartussanngortinneqarluni.
- Atorfinnit
ullormit ullormut soraarniarlunga aalajangerpunga, tamanna uannut
peqqinnanngitsoq paasigakku. Tamannami nalunngereeraluarpara, allanilli
ikiuerusunnerma ilitsersuerusunnermalu kingunerinik suliinnarsimallunga.
Meeqqammi ilaqutariillu ikiorusukkakkit, naak uannut pitsaanngitsoq
nalunngereeraluarlugu suliinnarama.
Suliffinni taamaattuni atorneqarsinnaasutut neriuutigisaminik siunnersuuteqarpoq.
- Suliffinni taamaattuni tarnip pissusaanik ilisimasalimmik
ikiortissaqarnissaq ilitsersorneqarnissarlu pingaaruteqarluinnarput, tassami ikiortissaqarnikkut
tarnikkut nanertuutaasinnaasunik pinaveersaartitsisoqarsinnaavoq, Ivalo Amassen
oqarpoq, taassumalu erseqqissarpaa suliffigisimasaminit tarnip pissusaanik
ilisimasalimmit ikiorserneqarsimagaluarluni.
Oqaloqatigiinnerit ilaat peqataaffigisimavai, namminerminulli isumaqarpallaanngimmata
taamaatissimallugit. Tamatumunnga taarsiullugu
Eqqarsaatiminit allamut saasarniarluni sapangaaqqanik
sammisaqaqqilerpoq.
- Maannakkut
ima ajunngitsigaanga matu parnaartariaarullugu annerusumillu pisullunga suliartortarlunga.
Sinilluartalerama nalunaaquttap akunneri tallimat ingerlaannartumik sinissimanera
iterama tupaallaatigaara.
- Suliffiga nutaaq nuannareqaara, aamma ajunnginnerujussuuvunga. Sioorasarnera
qaangersinnaassanerlugu naluara, pitsaanerulernissarali neriuutigaara, Ivalo
Amassen naggasiivoq.
