Inatsisartuni eqqagassat oqallisigigaat: Ilisimasakittutit
Inatsisartut illoqarfinni marlunni ikuallaaveqalersinnaaneq ataasinngornermi oqallisigaat. Naleqqameersup Demokraatineersoq avannaani pissutsinik ilisimasakinnerarlugu isornartorsiorpaa. Isornartorsiorneqartoq akuersaarinninngilaq. Ataatsimiinnermi aqutsisup oqaaseq "ilisimasakinneq" atoqqunngilaa.
Ataatsimiinnermi aqutsisoq oqaatsit atorneqartut atoqqunagit inerterivoq.
Assiliisoq: Oscar Scott Carl
Inatsisartunut ilaasortat Uummannami Upernavimmilu eqqakkanik ikuallaavimmik pilersitsisoqarsinnaanera pillugu apeqquteqaat aallaavigalugu oqallisissiaq ataasinngornermi oqallisigaat. Atassutip siulittaasua, Aqqalu C. Jerimiassen, oqaluuserisassamik siunnersuuteqartuuvoq.
Demokraatineersoq, Pipaluk Olsen, partiini sinnerlugu oqaaseqartuuvoq. Naleqqameersoq, Jens Napãtôk’, Pipaluk Olsenip oqaaseqaataa oqaasissaqarfigalugu oqaaseqarumalluni nalunaarpoq.
- Uggornarpoq partiit annersaannit oqaaseqartutit, Naalakkersuisuutitaqartut, uani qulequttami inissisimaffik, pissutsit piviusut ilisimannginnakkit avannaani. Uggornartorujorujussuuvoq, Jens Napãtôk’ oqarpoq.
Pipaluk Olsenip Ittoqqortoormiini, Uummannatut Upernavittullu ukiuunerani sikusartumi, eqqagassat poortorluarneqartarnerat ilisimanerarlugu qulequtaq pillugu oqallinnermi oqaatigaa. Jens Napãtôk’-p taama sanilliussineq ilisimasakinnermik peqquteqartutut nalilerpaa.
- Ittoqqortoormiit assersuutigeriaraluarakku ilisimasakissutsinnik takutitsivoq. Nikassaanngilanga. Neriuppunga alakkarumaaritit, Jens Napãtôk’, Pipaluk Olsenimut, Inatsisartut ataatsimiittarfianni oqarpoq.
Illoqarfiit assersuunneqartut kommunini assigiinngitsuni marlunniipput. Avannaata Kommunia aamma Kommuneqarfik Sermersooq. Taakkuattaaq tamarmik eqqagassanik passussinerminni namminneq suleriaaseqarput. Taassuma saniatigutS aamma Kommuneqarfik Sermersooq kommunit eqqagassalerineq pillugu ingerlatseqatigiiffiutaannut, ESANI A/S-imut, piginneqataallunilu ilaasortaavoq. Avannataa Komuunia ingerlatseqatigiiffimmut tassunga attuumassutaarunnikuuvoq.
Ataatsimiinnermi aqutsisoq inerterisoq
Inatsisartut siulittaasuata aappaa siulleq, Mimi Karlsen (IA), oqallinnermi tassani aqutsisuuvoq. Naleqqameersullu oqaatsit atugai akuerinngilai.
- Oqaatsit ilisimasakinnerit Inatsisartoqatissinnut suukki atornagit. Oqaatsit allat atorneqarsinnaapput, Mimi Karlsen oqarpoq.
Isornartorsiorneqartoq: Oqarfiginavianngilakkit ilisimasakitsuusutit
Pipaluk Olsenip Naleqqameersumit taama pineqarnini nuannarinngilaa.
- Oqaatsit akuerinngilluinnaqqissaarpakka maanngaannit uannut apuussatit ilisimasakissuseq pillugu. Tamatta maaniippugut qinikkatut. Tamatta piginnaasaqarluta assigiinngitsunik.
- Kalaallit Nunaata iluani angalasarpugut assigiinngissuserput aallaavigalugu ilisimasagullu aallaavigalugit. Taamaattumik nikassaaneq taanna akuerinngeqqissaarpara. Uanga illit pikkorluffinnut oqarfiginaviannginnakkit; Ilisimasakitsuusutit. Neriuutigaara tamanna paasilluassagit, Pipaluk Olsen oqarpoq.
Jens Napãtôk’ isornartorsiummi akineqarneranut oqaaseqanngilaq.
