Inatsisartut immap naqqani aatsitassarsiornerup inerteqqutaalernissaa siunnersuutigaat

Inatsisartut aalajangiiffigisassatut siunnersuut sisamanngormat akueraat, Naalakkersuisullu peqquneqarput immap naqqani aatsitassarsiorfiit inerteqqutaalersinniarlugit inatsisissamik siunnersuuteqassasut.

Tamanna Inatsisartut nittartagaanni takuneqarsinnaavoq.

Najuuttut tamarmik siunnersuut akueraat.

Inerteqqutip 31. december 2029-p tungaanut atuutsinneqarnissaa ukiumullu marloriarluni sivitsorneqartassasoq, Inatsisartut siunnersuutigaat.

Aalajangiissutissatut siunnersuutip suliarineqarnerani akissuteqaammi allassimavoq Naalakkersuisut tunngavilersuutit taakku isumaqaatigaat.

Immallu naqqani aatsitassarsiornerup inerteqqutaalerallarnissaanik inatsisissatut 2027-mut siunnersuusiussallutik.

Nunarsuarmi Pinngortitamik Illersuiniaqatigiiffiup WWF-ip Kalaallit Nunaanni immikkoortortaqarfiata siunnersuut "eqqortumik alloriarnertut pingaarutilittut“ taavaa, nutaarsiassaqartitsivik AFP allappoq.

- Aalajangiinermi matumani Kalaallit Nunaat ersarissumik periarfissaqalerpoq takutissallugu immap, pinngortitap kalaallillu inuussutissarsiutaata illersorneqarnissaat pimoorunneqartariaqartoq, immap pisuussutaanik nutaanik atuinitsinni, nalunaarummi allassimavoq.

USA-p præsidentiata Donald Trumpip Kalaallit Nunaanni uuliamik, gasimik aatsitassanillu annertuumik ujaasisoqarnissaata oqarnerata aqaguani taasititsisoqarpoq.

Tamatuma kingorna Kalaallit Nunaannit oqaatigineqarpoq Trumpip oqarnera ilumuunngilluinnartoq.

Aatsitassarsiorneq pillugu præsidenti oqaaseqanngilaq.

Aalisarneq Kalaallit Nunaata aningaasaqarneranut toqqammaviuvoq, piniarnerlu kalaallit inuiaqatigiivisa inuuneranni pingaaruteqarluinnarpoq.

WWF Greenland naapertorlugu immap naqqani aatsitassarsiorneq immap uumasuisa ataqatigiinnerannut uumassusillillu assigiinngisitaarnerinut ajoqusiisinnaavoq.

Uuliasiornissamut gassisiornissamullu akuersissummik nutaanik tunniussisarneq 2021-mi unitsinneqarpoq, AFP allappoq.

Nutaarsiassaqartitsivik naapertorlugu Kalaallit Nunaanni, silaannaap sakkortussusia attaveqaatillu ajornerat pissutigalugit suliassaq unamminartuusoq, uuliamik qillerinernik imaluunniit gasimik piiaanermik suliffissuaqarfiusumik ingerlatsisoqarsimanngisaannarpoq.

RITZAU