Inatsisartut ukiaanerani ataatsimiinnissaanni akunneq apeqqarissaarfik taamaatinneqartoq

Tallimanngornermi 18. september Inatsisartut ukiaanerani ataatsimiinnerat aallartissaaq.

Tamanna ukiut siusinnerusut assigalugit immikkoortunut marlunnut agguarneqassaaq, immikkoortoq siulleq ukiakkut, immikkoortullu aappaa ukiup nikinnerata kingorna.

Taama Inatsisartut nittartakkakkut quppernerminni allapput.

Immikkoortoq siulleq novembarip 19-iata tungaanut ingerlassaaq, immikkoortullu aappaa januaarip 29-ani 2027-mi aallartissaaq.

Immikkoortut katillugit 108-t suliarineqassapput. Taakkunannga immikkoortut 52-it nutaat Inatsisartunut ilaasortaneersut, immikkoortullu 16-t nutaat Naalakkersuisuneersut ullormut oqaluuserisassanut ilanngunneqarput. Taakku saniatigut immikkoortut 36-t upernaakkut ataatsimiinnermit kinguartitat ilanngunneqarput, taamaammallu suliarineqarneri nanginneqartussaallutik.

Immikkoortumi siullermi aappaanilu ullut ataatsimiiffiusut katillugit 35-upput. Sapaatip akunneranut ullut ataatsimiiffiit pingasuusassapput, taakkulu nalunaaqutaq aqqanernut aallartittassapput.

Immikkoortoq siulleq, septembarip 18-iani aallartittoq, ulloq ammaanersiorfik ilanngullugu ullunik ataatsimiiffiusunik 28-nik imaqassaaq. Ataatsimiinnermit kingullermit immikkoortut kinguartitat siulliullugit suliarineqassapput, immikkoortullu nutaat immikkoortup siulliup sinnerani agguataarneqarput.

Ataatsimiinnerup immikkoortuata aappaa, januaarip 29-iani aallartittoq aappassaaneerinninnernik pingajussaaneerinninnernillu kiisalu apeqquteqaat aallaavigalugu oqallinnissamik siunnersuutinik imaqassaaq.

Ataatsimiinnermi matumani akunnermik apeqqarissaarfimmik ingerlatsisoqannginnissaa Siulittaasoqarfiup aalajangerpaa.

Siorna ukiaanerani ataatsimiinneq aamma marlunngorlugu agguarneqarpoq. Taamaattoq ataatsimiinnerup immikkoortuata aappaa, februaarimi 2026-mi allartittussaagaluaq, USA-mi pissutsit pissutigalugit kinguartinneqarpoq.