Inatsisartut ullumi ataatsimiissapput: Siumut illuatungiliuttunngorpoq Naalakkersuisullu nutaat akuerineqassallutik
Upernaakkut ataatsimiinneq marlunngornermi aallartissaaq, tassanilu ilaatigut Kim Kielsen Inatsisartut siulittaasuattut ingerlaqqissanersoq kikkullu Naalakkersuisunut ilaasortanngussanersut aalajangiiffigineqassapput.
Inatsisartut 2025-mi ukiakkut ataatsimiinnerisa aallartinneranni.
Assi: Oscar Scott Carl
Inatsisartuni ilaasortat USA-mit tatineqarnerulerneq oqallisiginiarlugu februaarip aappaani ulloq ataaseq kingullermik ataatsimiinneranniilli pisoqangaatsiarnikuuvoq.
Siumut naalakkersuisooqatigiinnit tunuarpoq, tamannalu Inatsisartuni sulinermut qanoq kinguneqassanersoq marlunngornermi paasinarsissaaq.
Inatsisartut upernaakkut ataatsimiinnerat nalunaaqutaq qulinut aallartissaaq, oqaluuserisassanilu siullerni siulittaasuuffiit ataatsimiititalianullu ilaasortat taarserneqarnissaat takuneqarsinnaapput, aamma Naalakkersuisut nutaat akuerineqassallutik.
Siulittaasoqarfik inissititerneqassasoq
Siumup tunuarnerata kingorna Inatsisartut ataatsimiititaliaanni atuuffiit pingaarutillit arlallit inissititerneqartussaapput. Siullertut Inatsisartut siulittaasuat, Kim Kielsenip maannakkut atuuffia, pineqarpoq.
Siulittaasutuuffik pingaarutilik siulittaasoqarfimmilu ilaasortanngortussat politikkerit marlunngornermi siullertut aalajangiiffigisavaat.
Siumut ataatsimiititaliani marlunni pingaarutilinni aamma inissisimaffeqarpoq. Aningaasaqarnermut Akileraartarnermullu Ataatsimiititaliami Erik Jensen siulittaasuuvoq aamma Aalisarnermut, Piniarnermut Nunalerinermullu Ataatsimiititaliami Lars Poulsen siulittaasuulluni, taakkulu aamma allanngortinneqassagunavipput.
Siumup naalakkersuisooqatigiinnit anineranut atatillugu Kim Kielsen aamma Vivian Motzfeldt partiimi ilaasortaajunnaassallutik aalajangerput, taamaalillunilu partii pissaaneqartorujussuunikuugaluartoq maanna Inatsisartuni ilaasortai marluinnaapput.
Vivian Motzfeldt aamma Kim Kielsen partiimut allamut ilaasortanngorniarnerlutik suli aalajangersimarpasinngilaat, Inatsisartunimi ilaasortat allattorsimaffianni attaviitsutut allaqqapput.
Naalakkersuisunut ilaasortat nutaat
Inatsisartut Siulittaasoqarfianiittussanik qinersisoqareernerata kingorna ataatsimiititaliani ilaasortanngortussat aalajangiiffigitinnagit Naalakkersuisut siulittaasuat Jens-Frederik Nielsen (D) oqaluuserisassamik saqqummiussivoq: Naalakkersuisunut ilaasortanik qinersineq.
Tassani Naalakkersuisunut ilaasortanngortussat sisamat Inatsisartunut akuerisassanngorlugit saqqummiutissagunavippai.
Siumup naalakkersuisooqatigiinnit aninera folketingimilu qinersineq pissutigalugit naalakkersuisut ilaasortaatitaat marluk aamma tunuarput, tassaappullu Vivian Motzfeldt (nunanut allanut tunngasunut ilisimatusarnermullu) Naaja H. Nathanielsenilu (inuussutissarsiornermut, aatsitassanut, nukissiornermut, inatsisinik atortitsinermut naligiissitaanermullu).
Taamaasilluni naalakkersuisooqatigiit siorna suleqatigiilermata naalakkersuisut quliusut maanna arfiniliupput. Mads Pedersen aamma Bentiaraq Ottosen 2025-p naanerani Naalakkersuisunit tunuartut suli taarserneqarnikuunngillat.
Sermitsiap ullumi ataatsimiinneq soorunami malinnaaffigissavaa, aamma siulittaasoqarfiup Naalakkersuisunngortullu inissititernerat.
