Tallimanngormat spiralilersuinermik suliami nalunaarusiat marluk Naalakkersuisut saqqummiuppaat, peqatigisaanillu aappaa itigartillugu. Taanna inatsisilerituup Jonas Christoffersenip psykologillu Jensine Nedergaardip suliaraat.
Itigartitsineq aamma Jonas Christoffersenimut nutaarsiassaavoq. Taassuma KNR-p tallimanngornermi Naalakkersuisut siulittaasuata Jens-Frederik Nielsenip (D) inatsisillu atuutsinneqarnerannut naalakkersuisup Mariane Paviasen Jensenip (IA) tusagassiortunik katersortitsinerannik aallakaatitsinerani tamanna aatsaat tusarpaa.
Tallimanngormat spiralilersuinermik suliami nalunaarusiat marluk Naalakkersuisut saqqummiuppaat, peqatigisaanillu aappaa itigartillugu. Taanna inatsisilerituup Jonas Christoffersenip psykologillu Jensine Nedergaardip suliaraat.
Itigartitsineq aamma Jonas Christoffersenimut nutaarsiassaavoq. Taassuma KNR-p tallimanngornermi Naalakkersuisut siulittaasuata Jens-Frederik Nielsenip (D) inatsisillu atuutsinneqarnerannut naalakkersuisup Mariane Paviasen Jensenip (IA) tusagassiortunik katersortitsinerannik aallakaatitsinerani tamanna aatsaat tusarpaa.
– Periarfissaq eqqarsaatigisimavara, taamaaliortoqarnissaali ilimagisimanngilara, Jonas Christoffersen oqarpoq.
Nalunaarusiaq suliakkiummut naammassinninngitsoq, aalajangernerlu peer-reviewsit marluk kingorna pisoq, Naalakkersuisut itigartitsinermut tunngavilersuutigaat.
Christoffersen naapertorlugu peer-review kukkusumik eqqumiitsumillu isornartorsiuinermik, Naalakkersuisunut akissuteqaammini itigartissimasaanik imaqarpoq.
Taamaakkaluartoq politikerit nalunaarusiamik itigartitsinerannut qanoq oqaasissaqarpit?
– Qungujuppunga. Jens-Frederik Nielsenip kaammattuutaa inuit malissagaat kaammattuutigaara, nammineerlutillu nalunaarusiat qanoq imaqarnerat atuarlugu, taanna ilassusiivoq.
Tusagassiortunik katersortitsineq suliamik ukiut marluk sinnilaarlugit qaangiuttut, Naalakkersuisut aggustimi 2024-mi suleqatigiissitamik immikkut ilisimasalinnik Miriam Cullenimik, Dalee Sambo Doroughimik, Jonas Christoffersenimik Jensine Nedergaardimillu inuttaqartumik pilersitsinerisa kingorna aallartittumut inernerugallarpoq.
Taaneqartulli kingulliit marluk suleqatigiissitaaqqaartumit suliami isumaqatigiinnginneq pissutigalugu tunuarput. Taamaammat tallimanngormat ilapittuutit marluk saqqummiunneqarput, taakkulu assigiinngitsorujussuarmik Naalakkersuisunit tiguneqarput.
Isiginninnerit assigiinngitsut marluk
Jonas Christoffersenip nalunaarusiaanik itigartitsineq nutaarsiassaavoq. Jonas Christoffersenimulli politikikkut misigissutsitigullu navianarsinnaasumiinneq siullermiinngilaq.
Ataatsimut isigalugu ajornartorsiummik assigiinngitsunik marlunnik isiginninneq pineqarpoq, taanna nalilersuivoq:
– Illuatungaani nunap inoqqaavisa qanoq pissutsinik isiginninnerat ippoq. Qanoq pisoqarsimanera qiviarneqarpoq, arnallu ataasiakkaat oqaluttuaat ataatsimut oqaluttuanngortinneqarpoq – taavalu kalaallinut innuttaasunut kannguttaatsuliorneq ataatsimoortutut takuaat.
– Aappaani allatut isiginnittoqarpoq, tamannalu uanga suliaraara. Tassani inatsisitigut pisinnaatitaaffiit aalajangersimasut pineqarput. Suut inuit pisinnaatitaaffii eqqartuussiviillu nalinginnaasumik periusaat malillugit atuuppat, inatsisit piffissap ingerlanerani qanoq ineriartorpat ilaalu ilanngullugit.
– Isiginnittaatsillu taakku imminnut illuatungeriipput, ullutsinnimi pissutsit taamaapput. Taamaalilluni peqatigiilluni akerleriinnanilu oqaloqatigiinnissaq ajornartorujussuanngorpoq, Jonas Christoffersen oqarpoq.
Avissaartuunneq inuiannut toqoraanermut attuumassuteqanngilaq
Spiralilersuinermik ingerlatsinerup inuiannik toqoraanertut isigineqarsinnaanera sammisaavoq immikkut mianernartoq. Tamannalu apeqqutini suleqatigiissitaaqqaartup 2024-mi qulaajagassatut suliakkiunneqartunut ilaasoq.
Nalunaarusiat marluk tallimanngormat saqqummiunneqartut arlaannaataluunniit inuiannik toqoraasoqarsimanera inerniliutinngilaa. Sulili assigiinngissuteqartoqarpoq. Miriam Cullenillu Dalee Sambo Dorough-llu taamaattoqarsimannginneranik oqarusunngillat. Akerlianik Jonas Christoffersenip Jensine Nedergaardillu erseqqissumik inuiannik toqoraasoqarsimanera itigartippaat.
Inuiannik toqoraasoqarsimaneranik inerniliinissanni uppernarsaatissat suussappat?
– Danmarki nakorsanut ilitsersuummik arnat akuersiteqqaarnagit pinngitsaalillugit spiralilersornissaanni, innuttaasunik aserorterinissamik siunertaqartumik saqqummiussisimasuuppat, taava inuiannik toqoraasoqarsimasoq oqarsinnaavugut. Taamatulli pisoqarsimanngilaq. Tamannaluunniit qanillineqanngilaq, Jonas Christoffersen oqarpoq.
Cullenip Doroughllu Danmarkip inuiannik toqoraanermik aalajangersagaq unioqqutissimasinnaagaa pillugu isumaat taassuma aamma itigartippaa. Naalagaaffiup inuiannik toqoraaneq pinaveersaartissallugu sumiginnaraa, taakku tunngavilersuutigaat. Tamannalu tunngavissaqanngilluinnartutut Christoffersenip isumaqarfigaa.
Isumaqatigiinngissutit taakku illit immikkut ilisimasalinnik suleqatigiissitaaqqaartumit aninernut kinguneqarpat?
– Naagga, taakku avissaartinngilaatigut. Tunngaviatigut suut allaaserinerivut nalunaarusiarlu qanoq sanarfissaneripput pillugu apeqqut patsisaaneruvoq.
– Ilaatigut suliami qanoq pisoqarpiarsimanera pillugu kapitalinut missingiussanik, malittarisassallu suut Kalaallit Nunaanni atuunnersut pillugit takisuunik allagaqarpunga. Inatsisilerituulli allat marluk pisorpiaat oqaluuserinissaat soqutiginngilaat. Oqaloqatigisinnaanngilakka, suliannullu oqaaseqaatinik pissarsinngilanga.
Peqataanerit peqqissimissutigaajuk?
– Naamerluinnaq. Peqataalerama suliaq allalluinnaasoq isumaqarsimagaluarpunga, taavalu oqaluttuarisaanermi qulaajaaneq ingerlanneqarpoq, taassumalu suut tamaasa mumisilluinnarpai.
Jonas Christoffersenimut nalunaarusiaa Ilisimatusarfimmit oqaluttuarisaanermi qulaajaanermik annertuumik toqqammaveqarnera qitiulluinnarpoq. Tamannalu aamma inunnut taassuma Kalaallit Nunaanni pissutsinik piviusunik paasinnginneranik oqartunut akissutigaa.
– Jensinalu nalunaarusiatsinnik suliaqarnerput nuannaarutigaara, suliarmi Naalagaaffeqatigiinnut pingaaruteqartupilussuuvoq. Paasissutissinneqarneq aallaavigalugu oqallinnermut ilapittuerusuppunga, isornartorsiorneqarneralu tigulluarsinnaavara. Anigussaqqaarpara, Jonas Christoffersen oqarpoq imalu nangilluni:
– Oqallinnerilli makku Danmarkip Kalaallillu Nunaata akerleriinnerannik sakkortusisitsisinnaanerat ersissutigisinnaavara – tassanilu assersuutigalugu ajunngitsorsisitsinissamik aaqqissuussineq paaseqatigiilluni ingerlariaqqinnissamut siunertaqaraluarpoq. Tamanna ernummatiginerpaajuara.
