Inatsisinik ilisimasallip eqqartuussissuserisut pisortaata aalajangiinera isornartorsioraa

Unnerluussisussaatitaasup nammineq unnerluussisussaaffigisimasamini ilisimannittumik politiinut nalunaarutiginninneq suliarisinnaavaa?

Apeqqut tamanna pinngitsaaliilluni arneriffiginninnermut tunngatillugu suliap 2025-mi martsimi eqqartuussivimmi suliarineqareernerata kingorna ilisimannittut ilaat sallulluni ilisimannittutut unnerluutigineqarmat saqqummerpoq.

Unnerluussisoq Qaqortumi politiinut nalunaaruteqarpoq, suliarli unnerluussisussaatitaasup Mariam Khalilip suliarisimavaa. Politiit misissuinissamik aallartitsissanngitsut taanna 2025-mi maajip 31-ani nalunaarpoq.

Eqqartuussivimmi suliami politiinut nalunaarutigineqartumi nammineq unnerluussisussaatitaavoq, tassanilu timersoqatigiiffimmi siulersuisutut atorfeqarsimasoq politiitullu atorfeqarnermini pinngitsaaliilluni arneriffiginnissimasutut allatigullu kannguttaatsuliorsimasutut pineqaatissinneqarpoq.

Illuinnaasiortuunnginneq qularineqartoq

Taamaappat unnerluussisussaatitaasut pisortaata nalunaarummik taassuminnga nammineq suliarinnissimanera eqqortuunersoq apeqqutaalerpoq. Naamik, Syddansk Universitetimi eqqartuussiveqarnermik ilisimatusarnermi inatsisilerinermik professori Frederik Waage isumaqarpoq.

- Unnerluussisussaatitaasoq pinerluttoqarsimatillugu suliamik ingerlatsisimasoq suliami tamatumani ilisimannittup pingaarutillip eqqunngitsumik nassuiaateqarsimanera pillugu nalunaarummik aalajangiisussalluni attuumassuteqarpallaartoq isumaqarpunga, Frederik Waage oqarpoq nangillunilu:

– Pingaartumik unnerluussisussaatitaasup nammineq siornatigut suliarisimasani nalilertariaqalersinnaagai — tassa ilisimannittup siornatigut eqqartuussivimmi sassartinneqarsimanera - eqqarsaatigineqartariaqarpoq. Suliamut atatillugu pisortat ingerlatsineranni suliassat suliarineqartarnerat pillugu inatsimmi § 3, imm. 1, nr. 1 aamma nr. 5 unnerluussisussaatitaasup illuinnaasiortuunnginneranik qularinninnissamut naapertuuppoq, tamannalu attuumassuteqarpallaarnermut tunngavoq.

Allatut oqaatigalugu: Unnerluussisussaatitaasup ilisimannittup uppernarsaanera eqqartuussivimmi ataasiarluni nalilereersimavaa. Taamaammat suliaq taannarpiaq pillugu politiinut nalunaaruteqarnermut aalajangiisussatut naleqqutinngilaq.

Isornartorsiuineq Unnerluussisussaatitaasut pisortaata Mariam Khalilip allakkatigut ima akivaa:

- Nalunaarummut 2025-mi maajip 31-ani itigartitsissutigineqartutut aalajangiiffigineqartumut attuumassuteqarpallaarnanga nammineq isumaqarpunga.

Unnerluussisussaatitaanerup politiinut nalunaarut sooq allamut ingerlateqqissimanngikkaa Sermitsiap paaserusuppaa.

Aalajangiinerup sulisuminit suliarineqarnissaa kissaatiginngikkuniuk danskit politiivinut ingerlateqqissinnaasimagaluarpaa. Attuumassuteqarneq apeqquserneqannginniassammat politiit unnerluussisullu suliaq danskit oqartussaasuinut isumagisassanngortittaraat suliani allani takuneqarsinnaavoq.

Khalililli aaqqiissut tamanna atornagu akisussaaffik sooq nammineerluni tigusimanerlugu nassuiaateqarfiginngilaa.

Nammineerluni politiinut nalunaarutigineqarsimasoq

Timersornikkut pisortaasimasup, ukiuni tallimani qaammatinilu tallimani pineqaatissinneqarsimasut inissiisarfianniittussanngortinneqartup, angutaa suliami unnerluutiginnittuuvoq. Ernerminit pisinnaatinneqarluni eqqartuussisumut sinniisuusarpoq 2024-milu ernini pillugu suliap suliarineqarnera pillugu naammagittaalliuutinik arlalinnik nassiussisimavoq.

aamma Atuaruk 

Politeeq maalaarutigineqartoq: Unnerluutigineqartoq ilisimannittumut niaqulaartuuneraraa

Aamma Mariam Khalil mamarliinerarlugu politiinut unnerluutigisimavaa. Tamannali aamma kinguneqartinneqanngilaq.

Frederik Waage naapertorlugu nalunaarut tamanna pisumut ilungersunarnerulissutaasinnaallunilu taanna pillugu nalunaarutinik allanik suliarinnikkunnaarnissaanut suli pissutissaqarnerussaaq.

Unnerluussisussaatitaasup pisortaata tamanna pillugu aatsaat 2025-mi maajip 31-ani aalajangiinermi kingorna politiinut nalunaarutiginnittup aamma politiinut nalunaarutigisimagaani paasisimallugu oqaluttuaraa.

- Tamatumunnga atatillugu politiit pillugit maalaaruteqartarfiup arlaannaanulluunniit attuumassuteqanngitsup aalajangiinnginnerani, tassa aatsaat 2025-mi juunip arfernani, uanga pillunga maalaaruteqartoqarsimanera paasigakku maluginiarneqassaaq, Mariam Khalil allappoq.

Attuumassuteqarpallaarnera naammagittaalliutigineqartoq

Angutip eqqartuunneqartup angutaata politiinut nalunaarutiginninnermi itigartitsissutigineqarnera, ilaatigut attuumassuteqarpallaarneq pissutigalugu, kingusinnerusukkut naammagittaalliuutigaa.

aamma Atuaruk 

Politiiusimasoq pinngitsaaliisimasutut sakkukinnerusumik pineqaatissinneqartoq

Naammagittaalliuut Naalagaaffiup eqqartuussissuserisuanit 2025-mi juulip 22-ani aalajangiiffigineqarpoq. Naalagaaffiup eqqartuussissuserisua Mariam Khalilitut, tassa ilisimannittup eqqunngitsumik nassuiaateqarsimaneranik misissuiffigineqannginnissaanik, aalajangiivoq.

Aalajangiisimanermili attuumassuteqarpallaarnermut tunngatillugu naammagittaalliuuteqarneq naalagaaffiup eqqartuussissuserisuata isummerfiginngilaa, aamma naammagittaalliornissamut allamik periarfissaqanngilaq.

Aamma 2025-mi juulip 22-ani Nunatta Eqqartuussiviani eqqartuussut saqqummiunneqarpoq, tassani timersornikkut aqutsisuusimasoq politiiusimasorlu ukiut tallimat affarlu pineqaatissinneqarsimasunut inissiisarfimmiittussanngorlugu eqqartuunneqarpoq. Unnerluussisussaatitaasup allap Nunatta Eqqartuussisuuneqarfiani suliaq akisussaaffigilersimavaa. Allannguineq tamanna taamaallaat ulapinnermik pissuteqartoq Mariam Khalil ilisimatitsivoq.

Sermitsiap eqqartuunneqartup angutaa, eqqaaneqareersutut ernini sinnerlugu oqaaseqarsinnaasoq, attaveqarfigisimavaa. Ilaqutariit maannamuugallartoq oqaaseqarumanngillat.