Inatsisit tunngaviusoq naapertorlugu killisiuineq: 21-nik ukiulik toqutsisimasutut pisuunnginnerarpoq

Angut 21-nik ukiulik Eqqartuussiveqarfik Sermersuumi inatsisit tunngaviusoq naapertorlugit sisamanngornermi ualikkut killisiorneqarpoq.

Taanna Nuussuarmi angummik 20-nik ukiulimmik toqutsisimasutut unnerluutigineqarpoq – eqqartuussivillu aalajangerpoq taanna tigummigallarneqassasoq. Tamanna ulluni 28-vani atuutsinneqassaaq kingusinnerusukkullu sivitsorneqarsinnaalluni.

Unnerluussut naapertorlugu angut 21-nik ukiulik Nuussuarmi biilinut inissiisarfimmi angummut allamut savimmik kapisivoq. Tamanna pingasunngornermi oktobarip 21-ani nalunaaqutaq 16.45 missaani, pivoq.

Illersuisup eqqartuussivimmut nalunaarutigaa unnerluutigineqartoq toqutsisimasutut pisuunnginnerartoq. Toqumilli kinguneqartumik nakuusersimanermut pisuutinneqarnini akuerissanerlugu eqqarsaatigaa.

Toqutsinerup nakuusernerlu toqumik kinguneqartup assigiinngissutaat pingaarnerpaaq tassaavoq pinerluttup toqutsinissamik siunertaqarluni taama iliorsimanera. Nakuuserneq toqumik malitsilik annikinnerusumik pineqaatissiissutigineqartarpoq.

Eqqartuussivik aalajangerpoq eqqartuussineq matoqqasumik ingerlanneqassasoq. Tamanna pivoq unnerluussisup illersuisullu qinnuiginerat malillugu.

Eqqartuussisup matoqqasumik eqqartuussinissamut tunngavilersuutigaa misissuinerup aatsaat aallartilaarsimanera, taamaasillunilu ammasumik eqqartuussisoqarnerani misissuineq innarlerneqarsinnaammat.