Inatsit sukaterneqassasoq: Partiit Danmarkimeersut tapiissuteqaqqusaajunnaassapput

Inatsisartut Kalaallit Nunaanni partiit Danmarkimiit Savalimmiuniillu tapiissutinik pisinnaajunnaassasut aalajangerput.

Naleqqap siulittaasua Pele Broberg partiinut tapiissutit pillugit inatsisip sukaterneqarnissaanik siunnersuuteqarpoq.

Assi: Oscar Scott Carl

Thomas Munk Veirum Thomas Munk Veirum Tusagassiortoq

Saqqummersinneqarpoq 22. Apriili 2026 - 17:32

Ussassaarut

Inatsisartunut 2025-mi qinersinissaq sioqqullugu partiit nunanit allanit tapiiffigineqarsinnaanerat inerteqqutigineqarpoq.

Inerteqqut USA-mi præsidenti Donald Trump Kalaallit Nunaannik aqutsinissamik piginnilerusullunilu oqaaseqareersorlu sukkasuumik suliarineqarpoq. Politikerit qinersinerup avataaniit sunnerniarneqarsinnaanera taamani ernummatigaat.

Inatsisartuni politikkerit inatsisip sukaterneqarnera pingasunngornermi akuersissutigaat, taamaalilluni Danmarkimi Savalimmiunilu partiit tapersersuisutut nalunaarsorsimasut tapiissuteqarsinnaajunnaarput.

- Qanorsuaq sunniuteqarlutillu taperseeqataasinnaapput

Naleqqap siulittaasua Pele Broberg siunnersuuteqartuuvoq. Inatsit putoqartoq partiip siulittaasua isumaqarpoq.

Ussassaarut

- Nunanit allanit partiit Islandimeersut, Norgemeersut, USA-meersut, Kinameersut allaneersullu Inatsisartuni tamat oqartussaaqataanerput taperseeqataaffiginagulu sunniuteqarfigisinnaanngilaat. Tamanna pissusissamisoorluinnarpoq.

- Kisianni, nunani allaniit partiit allat, soorlu Qallunaat Nunaanniit Savalimmiuniillu qanorsuaq sunniuteqarlutillu taperseeqataasinnaapput, Pele Brobergip siunnersuummut tunngavilersuivoq.

Siunnersuut partiinit tamanit tapersersorneqarluni akuerineqarpoq. Naalakkersuisut inatsisip allanngortinneqarnissaanik maanna suliaqartussanngorput, kingusinnerpaamillu 2027-mi ukiakkut ataatsimiinnermi Inatsisartunut saqqummiunneqassalluni.