Inughuit Pituffimmut atassuteqarluartutut misigisimapput

Avanersuarmi Inughuit Pituffiup ammanerulersimanera qujamasuutigalugu oqaluttuaraat. Utoqqaat Pituffimmut tikeraarsarneqarsimanertik, angajoqqaallu juullilernerani meeqqat poortukkanik tunissutisisarnerat "Julemandsoperation"-imik taallugu Pituffimmi sulisunik aaqqissuunneqartartoq qujamasuutigalugu aamma oqaluttuarput. 

Innuttaasut Pituffiup saassutsissinnaaneranut assigiinngitsunik isumaqarput. 

Inussuk A/S Pituffimmut kiffartuussinissamik isumaqatigiissuteqartoq avanersuarmeersunik suliffimmik misileerusuttoqalernissaanik kissaateqarpoq. 

Qaanaami nunaqarfittaanilu ukioq kaajallallugu naatitanik pisiassaqarnissamut Pituffik iluaqutaasoq KNI A/S paasissutissiivoq.

Tamakkuupput Avanersuarmiut amerikamiut sakkutooqarfianut Pituffik Space Basemut sanileqarnerminnik oqaluttuaat.

Qaanaamiit Pituffik Space Basemut toqqaannarlugu 108 kilometerit missaanik ungasitsigipput, nuna uiarlugu 130 kilometerit missaanik ungasissuseqarput, qulimiguulimmillu Qaanaamiit Pituffimmut minutsit 40-t missaani angalasoqarsinnaalluni.

Piniartup sakkutooqarfik toqqissisimanartikkaa

Olennguaq Kristensennip Pituffiup Savissiviup eqqaani inissisimaneranut toqqissisimalluni, piniarnermullu akornutaanngitsoq, Sermitsiamut oqaatigaa.

- Pituffimmiullu ikinngutigiinnerput aamma attaveqaqatigiinnerput naammagisimaarpara aamma sungiunnikuugatsigu Pituffik sanileralutigu. Tikissatilluta tikilluaqqusilluartarmata qujamasuutigivara, Olennguaq Kristensen oqarpoq.

Olennguaq Kristensen Pituffimmi attaveqarfissamut sianerlutik ilisimatitsiinnartarlutik oqaluttuarpoq.

- Qassiulluta tikittussaanerluta nalunaarutigisarparput, tikikkaangattalu aaneqartarpugut inissatsinnukaanneqarlutalu, Olennguaq Kristensen oqaluttuarpoq.

Ukiormanna Pituffimmiut mittarfeqarfimmut umimmaat qanillattorpallaalersimasut Inughuarnit piniarneqarnissaannik periarfissiisimasut Olennguaq Kristensenip ilanngullugu aamma oqaatigaa.

Piniartup Olennguaq Kristensenip Pituffiup inissisimanera (Ruslandip USA-llu akornanni, aaqq.) peqqutigalugu saassussisoqaratarsinnaanera nammineq ernumassutissaqartinngilaa, Pituffimmilu sakkutooqarnerulissagaluarpat piniarnermut aamma akornutaanavianngitsoq Olennguaq Kristensen isumaqarpoq. 

- Pituffimmi radareqarfissuaq pulaarnikuuarput, taamaammat nunarsuup affaa avannarleq qanoq nakkutigilluartigineraat isinnik nammineerlunga takunikuugakku ernumassutissaqanngilanga. Taamaammat toqqissisimavunga, Olennguaq Kristensen oqarpoq.

Suleqatigiinnerulertoqarnissaa kissaatigineqartoq

Avannaata kommuniani kommunalbestyrelsimut ilaasortap Mikivsuk Thomassennip (IA) Inughuit Pituffiullu ajunngitsumik atassuteqaqatigiinnerat maluginiarlugu oqaatigaa.

- Avannaata Kommuniani kommunalbestyrelsi Pituffik Space Base-mik toqqaannaq suleqateqanngilaq, Mikivsuk Thomassen erseqqissaavoq.

Taamaakkaluartorli Avannaata kommunia Pituffik Space Baselu siunissami qanimut suleqatigiilerumaartut neriuutigalugu, Mikivsuk Thomassen oqarpoq.

- Neriuutigaara Pituffik Avannaata Kommunianut pingaartumik Avanersuarmut aningaasatigut toqqaannaq iluaqutaalerumaartoq, soorlu Pituffimmi sulisut kommunip akileraarutitigut isertitsissutigisalerlugit, Mikivsuk Thomassen oqarpoq.

Pituffilli Avanersuarmiut aningaasaateqarfiannut (Thulefonden, aaqq.) aningaatigut iluaqutaammat ilanngullugu eqqaavaa.

Ilaatigut Qaanaami nunaqarfittaanilu Pituffik atortulersuutitigut ineriartortitsinermut Pituffiup ikiuunnissaanut atorluarneqarsinnaasoq, Mikivsuk Thomassen isumaqarpoq.

- Uggoriuaannarpara tusartarnikuugakku Qaanaaq pilersinneqalermat, Qaanaami anartarfiit kuutsiinnartakkat pilersinneqarnissaanut Pituffiummiut ikiuussinnaanissaminik neqeroormata Inughuit itigartitsisimammata. Taamaattumik neriuppunga siunissami, anartarfiit kuutsiinnartakkat pilersinniarneqarnerinut aqqusinigissaanissamullu Pituffimmiut ikiuussinnaassasut, Mikivsuk Thomassen oqarpoq.

Sakkutuulli amerlineqarnissaat akerleralugu, Mikivsuk Thomassen oqarpoq.

- Kissaatigaara issittumi sakkulersortoqannginnissaa aamma sakkutuut amerliartortinneqassanngitsut, Mikivsuk Thomassen oqarpoq.

Qaanaap Pituffiullu siunissami suli pitsaanerusumik atassuteqaqatigiinnissaq – ulluinnarni inuuniarnikkut, kommunemullu aningaasatigut toqqaannartumik - ineriartortissagaat Mikivsuk Thomassenip kissaatigaa.

Niihimaamut qujamasunneq

Niihimaap (Julimaap, aaqq.) "Julemandsoperation"-imi juullilernerani poortukkanik pajulluni tikinnissaa qilanaarnartuaannartoq, angajoqqaajusoq Rosa Kristiansen oqarpoq.

- Ernera takusinnaallugu niihimaap tikinnissaanut poortugarsinissaminullu pissangalluni qilanaartoq isigalugu qilanaaqataanartarpoq, Rosa Kristiansen oqarpoq.

Rosa Kristiansenip Pituffimmi sulisut nammineq kajumissusertik aallaavigalugu, ukiorpassuarni ajunngitsuliorlutik iliuserisartagaannut kusanartumut nersualaarlugit, oqarpoq.

- Nuannaartitserusullutik meeqqanut poortukkanik tunniussisarnerat qujamasunnartorujussuuvoq, neriuppunga  ileqqutoqaq tamanna suli ukiorpassuarni ingerlatiinnarumaaraat, Rosa Kristiansen qujaniarluni oqarpoq.

Utoqqaat qujamasuttut

Utoqqaat arlallit siorna upernaakkut juni qaammat sulisunit Pituffimmut tikeraarsarneqarsimapput. Tikeraarsimanertillu nuannaarutigalugu Aviaq Petersen aamma Regine Larsen oqaluttuarput.

- Illoqarfitsinniit nikinneq ajoratta Pituffimmut tikeraartinneqarsimanerput nuannaarutigeqaarput. Ajunngitsorsuarmik nerisarissaartinneqarlutalu pineqarsimanerput attortissutigaarput qujamasuutigalugulu, Aviaq Petersen Qaanaap utoqqaat illuanni najugalik oqarpoq.

Utoqqaallu Qaanaamiit Pituffimmut tikeraarsarneqaqqikkumaarlutik neriorsorneqarsimanertik isumalluarfigalugu, Aviaq Petersen aamma Regine Larsen oqarput.

- Tikeraarsarneqaqqikkumaartugut neriorsorluta oqarnikuummata, neriorsuutertik piviusunngortikkumaaraat neriuppugut, Aviaq Petersen Aamma Regine Larsen oqarput.

Uummannatoqqamullu biilerlutik ilerfiartinneqarsimanertik attortissutigisimallugu, Regine Larsen oqaluttuarpoq.

- Aqqaluannguara Maagganngaaq Qujaukitsoq aanarsuaralu Maren Jerimiassen assut nuannaarutigeqisannik ilerfiarpakka. Iliviutigut takullugit iluaallannarlunilu eqqissiallannarpoq, Regine Larsen oqarpoq.

Aviaq Petersen Qaanaap Pituffimmut qaninnera eqqarsaatigalugu sakkutooqarfik saassutsissagaluarpat annilaangagisarlugu oqarpoq.

- Pituffik qanippallaaratsigu annilaangagilaartarpara, Pituffik Space Base saassutsissagaluarpat qanoq pisoqassanersoq eqqarsaatigisarpara, annilaanganaq. Imatorsuaq pisoqassanngippat naammagaara, Aviaq Petersen oqarpoq.

Inussuk A/S Avanersuarmiunik ilinniartuuteqarnerunissaminik kissaateqartoq

Inussuk A/S Qaanaameersunik nunaqarfittaaneersuniillu suliffimmik misiliisussanik tigusissallutik pingaarnerutittarlugu, Pituffimmi ukiuni 18-ni ilinniartunut siunnersorti Margrethe Poulsen oqarpoq.

- Qaanaameersunik nunaqarfittaaniillu amerlanerusunik Inussuk A/S-mi suliffimmik misiliisoqarnissaa kissaatigigaluarparput, ajoraluartumilli avanersuarmeersut ikitsuinnaat qinnuteqartarput, Margrethe Poulsen oqarpoq.

Pituffimmi Inussuk A/S-mi ilaatigut makkua misiliutigalugit suliffiusinnaapput: Igasoq, quersuarmi assartugalerisoq, biililerisoq, allaffimmiunngorniarneq, oqalutsinngorniarneq, qalipaasoq, Margrethe Poulsen sermitsiamut allakkatigut paasissutissiivoq.

Nunarsuami inoqarfinni avannarlerpaami naatitanik pisiassaqartuaannartoq

Pituffik Qaanaami nunaqarfittaanilu allatut iluaqutitaqartoq aamma malugineqarsinnaavoq. KNI A/S-ip paasissutissiinera naapertorlugu Qaanaami nunaqarfittaanilu Pilersuisup pisiniarfii Pituffik aqqutigalugu naatitanik ukiuunerani pilersorneqartarpoq.

- Ilisimatitsissutigisinnaavara Qaanaaq, Siorapaluk kiisalu Savissivik ukiuunerani Pituffimmiit naatitanik pisarput. Taamatut periarfissaqarnerput nuannerpoq qujanaqalunilu, Juliane Henningsen Heilmann KNI-mi attaveqaqatigiinnermu pisortaq oqarpoq.