Inuiannik toqoraasoqarsimaneranik oqaaseqarneq pillugu nunatsinnut ministeriusimasup suliassanngortitsiniarnini unitsippaa
Danmarkip Kalaallit Nunaatalu naalakkersuisui Kalaallit Nunaanni spiralinut tunngasumik suliaq assortuussutaasoq pillugu utoqqatsernikuupput.
Naalakkersuisuisa siulittaasuat Jens-Frederik Nielsen (saamerleq) naalakkersuisoqatini Múte Bourup Egede sisamanngornermi illersorpaa pisinnaatitaaffeqarnerarlugu spiralilersuisimaneq inuiannik toqoraasimanertut oqaatiginikuummagu. Assimi takuneqarsinnaapput kalaallit politikerit taakku marluullutik attaveqaqatigiinnermut ataatsimiititaliamut Savalimmiuni ataatsimiigiartut.
Assiliisoq (Toqqorsivimmit): Ida Marie Odgaard/Ritzau Scanpix
Danskit siusinnerusukkut Kalaallit Nunaannut ministererisimasaat Tom Høyemip aalajangiuppaa Múte Bourup Egede, ullumikkut Kalaallit Nunaanni aningaasaqarnermut naalakkersuisuusoq, unnerluutiginiarunnaarniarlugu.
Høyemip inatsisilerituua, Dan Shefet, aviisimut Politikenimut oqarpoq .
Unnerluutiginninniarnerminut tunngavilersuutigigaluarpaa Múte Bourup Egede decembarimi Danmark isornartorsiornikuummagu kalaallit niviarsiaqqat arnallu spiralilersorlugit naartunaveersaasersorneqarsimanerat pillugu inuiannik toqoraanertut taaneqartariaqarnerarlugu.
Tom Høyem Danmarkip Kalaallit Nunaannut ministeriuvoq kingulleq ministeriaqarfik atorunnaarsinneqanngitsiartoq.
Siusinnerusukkut Berlingskemut oqaatigaa "ataqqinninngitsuliornerusoq", politikerit tamakkiisumik isiginnillutik oqaatigissappassuk pinngitsaaliinertut inuiannillu toqoraaniarsimanertut isummaminnik saqqummiussisarnerat.
Sisamanngornermi Kalaallit Nunaanni naalakkersuisut siulittaasuat Jens-Frederik Nielsen, tusagassiorfinnut nalunaaruteqarluni, naalakkersuisuni ilaasortaqatini illersorlugu oqaaseqarpoq erseqqissaateqarluni oqaluuserisaq qaqissallugu pisinnaatitaaffeqartoq.
- Naalakkersuisut ernumanartoqartippaat politikkikkut oqaaseqarnernut tunngatillugu eqqartuussivilersuussiniarnermik qunusaarineq. Naalakkersuisut isumaqarput Tom Høyem sammisap iluani toqqaannartumik pineqanngitsoq. Isornartorsiorneqartut tassaapput iliuuserineqarsimasut aammalu naalagaaffiup inissisimaffigisimasaa – inuit ataasiakkaat pineqanngillat, taanna oqarpoq.
Tassarpiaavorlu oqaaseqaat taanna, tassa Tom Høyemimut inuttut tunngannginnera, Centrum-Demokraterne sinnnerlugit ministeriusimasup piumasaminik angusaqarsimaneranut naammappoq, Dan Shefet Politikenimut oqarpoq.
Ministeriuneq Mette Frederiksen (S) septembarimi Kalaallit Nunaanniippoq arnanut spiralit pillugit suliaq pillugu utoqqatsernini pisortatigoortumik apuukkiartorlugu.
Aamma Naalakkersuisut akisussaaffimmik nassuerutiginnipput, tamannalu tunngavigalugu Jens-Frederik Nielsen utoqqatsernerminik apuussivoq.
Septembarip aallartinnerani Danskit nunamut namminermut peqqissutsimullu ministeriaqarfik suliaq pillugu nassuiaammik saqqummiussivoq. Tassani erserpoq, nalilerneqartoq, kalaallinik niviarsiaqqanik arnanillu minnerpaamik 4070-inik 1970-ikkut naaneranni spiralilersuisoqarsimasoq.
Arnat 143-it, namminneq piumassuserinngisaminnik spiralilersorneqarsimasut siorna Danmarkimut inuit pisinnaatitaaffiinik unioqqutitsinerarlugu suliassanngortitsipput. Arnat katillugit 43 millionit koruuninik taarsiivigineqarnissamik piumasaqarput. Suliaq suli aalajangiiffigineqanngilaq.
Kalaallit Nunaanni peqqissutsimut akisussaaffik 1992-ip tungaanut Danmarkip tigummivaa.
Spiralilersuineq pillugu Danmarkip iliuusai inuiannut toqoraanerusimanersoq pillugu Naalakkersuisut naliliinissaminnut utaqqipput.
