Inuiattut erinarsuut pillugu taasisoqarataannaasoq

Kalaallit Nunaat qanoq ittumik inuiattut erinarsuuteqassava? “Nunarput utoqqarsuanngoravit” aamma “Nuna asiilasooq” inuiattut erinarsuutitut marluutillugit ullumi atorneqartarput. Atassutip siulittaasua, Aqqalu C. Jerimiassen, tamassuminnga allannguerusuppoq. Taamaattumik Inatsisartut aalajangiiffigisassaatut siunnersuuteqarpoq.

- Piffissaavoq maannaakkut Nunatta siunissami pisortatigoortumik inuiattut erinarsuutaa pillugu isummernissatsinnut, Aqqalu C. Jerimiassen siunnersuumminik pingasunngornermi saqqummiussinermini oqarpoq.

AAMMA ATUARUK:

Inuiattut erinarsuut niperujoorutinik ilaqquneqartoq

Taassuma aalajangiiffigisassatut siunnersuummini, Naalakkersuisunut suliakkiutigiumasaanut ilaavoq, inuiattut erinarsuutit maanna atorneqartut arlaata pisortatigoortumik toqqarneqarsinnaanera imaluunniit inuiattut erinarsuummik nutaamik pilersitsinissaq siunertaralugu suliassap aallartinneqarsinnaanera Naalakkersuisunit qulaajarneqassasoq.

Partiip inuiattut nutaamik erinarsuutitaarsinnaanissaq qanillattorpaa. 

- Atassut isumaqarpoq inuiattut erinarsuummik nutaamik, nammineq pilersitamik, suliaqarnissamut periarfissaq pimoorullugu misissorneqartariaqartoq.

- Tamanna oqaatigissallugu kanngusuutissaqanngilagut. Erinarsuutip nutaap ullutsinni Nunarput, ataatsimoornerput siunissamullu anguniakkavut ersersitsisinnaavai. Inuiattulli erinarsuut partiimit ataatsimit kisimi aalajangiiffigineqarsinnaanngilaq. Taamaattumik siunnersuummi inuiattut erinarsuutit maanna atorneqartut atorunnaarsinneqarnissaat imaluunniit erinarsuut aalajangersimasoq toqqarneqarnissaa siumungaaq aalajangiiffigineqanngilaq, partiip siulittaasua oqarpoq.

Naalakkersuisut: Innuttaasut taasitinneqarlik

Atassummeersup Naalakkersuisunik suliakkeerusunnera, suliakkerneqarumasut allatut isumaqarfigaat. Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen (D), siunnersuutip siullermeerneqarnerani akissummini allannguutissamik Naalakkersuisut sinnerlugit siunnersuuteqarpoq.

Taakkua suliakkerneqarniarnerminnut taarsiullugu, innuttaasut Inatsisartunut qinersinermi taasinissaat angorusuppaat.

- Taamaattumik tamanna tunngavigalugu Naalakkersuisut matumuuna allannguutissatut imatut siunnersuuteqarput: “Kalaallit Nunaata pisortatigoortumik inuiattut erinarsuutissaa pillugu siunnerfiliisumik taasititsisoqarnissaanik inatsisitigut tunngavissamik tamatumalu kingorna taasititsinermik ingerlatsinissamut Naalakkersuisut suliaqarnissaannik peqquneqassasut."

- Innuttaasunik taasisitsineq Inatsisartunut nalinginnaasumik qinersisoqarneranut peqatigitillugu ingerlanneqassaaq. Taasititsinermi toqqagassatut periarfissanut ukua ilaassapput: maannakkut atuuttup ingerlatiinnarneqarnera, inuiattut erinarsuutit pioreersut arlaata pisortatigoortumik inuiattut erinarsuutissatut toqqarneqarnera imaluunniit inuiattut erinarsuutissamik nutaamik siunnersuummik suliaqartoqarnissaa siunertaralugu suliamik aallartitsineq. Nunap pisortatigoortumik inuiattut erinarsuutissaa pillugu inaarutaasumik aalajangiineq Inatsisartut akuersissuteqarneratigut pissaaq, Nivi Olsen siunnersuuteqarpoq.

Suliaq Inatsisartut Kultureqarnermut, Ilinniartitaanermut Ilisimatusarnermut Ilageeqarnermullu ataatsimiititaliaata maanna suliarissavaa. Siunnersuut Inatsisartuni aappassaaneerluni, inaarutaasumik, novembarip tallimaani oqallisigineqarnissaa pilersaarutaavoq.