Inuit 135-it tigusarineqartut franskit akerliussutsimik takutitsineranni

Arfininngornermi Frankrigimi akerliussutsimik takutitsinermut siumoortumik nalunaarutigineqareersumut peqataasut akornanni inuit 135-it tigusarineqarput.

Franskit nunami namminermi naalakkersuisuiat, Laurent Nuñez, nutaarsiassaqartitsivik AFP naapertorlugu taamak ilisimatitsivoq.

Taamatuttaaq ilisimatitsissutigineqarpoq sakkut assigiinngitsut arlalissuit arsaarinnissutigineqarsimasut.

Sakkut arsaarinnissutigineqartut ilaatigut tassaapput kuglit savimerngit, timmiarsiutit imassaat, qummoroortartut aammalu illusaatit.

Taamaattorli ministeri erseqqissaateqarpoq, manna tikillugu ”pisut ilungersunartut” nalaanneqanngillat .

Sapaatip akunennerata siuliani arfininngornermi Frankrig akerliussutsimik takutitsineq sakkortuumik perulluliornertalik ukiuni kingullerni aatsaat taamak sakkortutigisoq ingerlanneqarpoq.

Tamatuma malitsigisaanik illoqarfinni arlalinni angerlarsimaffinniit aneqqusaajunnaarallarnerit sapaatip akunnerata ingerlanerani peqqussutaasarsimapput.

Ullumikkut akerliussutsimik takutitsinissat siumoortumik nalunaarutigineqareersut sioqqullugit ilaatigut borgmesterit arlallit inerteqqutinik tamanut atuuttunik arlalinnik peqqusisimapput, allanili akerliussutsimik takutitsisinnaaneq akuerineqarsimalluni, taakkulu oqartussaasunut siumoortumik ilisimatitsissutigineqarsimapput.

Tamanna aamma atuuppoq assersuutigiinnarlugu frankrigip kujataani Marseille-mi, tassani siusinnerusukkut akerliussutsimik takutitsisoqarnissaa itigartitsissutigineqarsimariarluni itigartitsissut tunuartinneqarsimavoq, taamaalilluni sulisartut kattuffiata aaqqissugaanik ingerlaaqatigiinneq pisinnaasimalluni.

Parisip qiterpasissuani ilaatigut ilinniartut kattuffissuat UNEF aammalu akerliussutsimik takutitsinissamut eqimattaliarineqarsimasoq De Gule Veste, akerliussutsimik takutitsissamaarput. De Gule Veste 2018-mi pilersinneqarnikuupput taamani ikummatissamik akitsuinissamik pilersaaruteqartoqarneranut akerlilerneqarluni. Taanna eqimattaq sukkasuumik ilaasortanikkiartupallassimavoq inuiaqatigiinni isornartuutitat pillugit akerliugaangamik qisuariaqatigiittarlutik.

Arfininngornermi akerliussutsimik takutitsinermi ilaatigut inuuniarnermi akit qaffasinnerujussui  aammalu pisortat sipaarniarnerat akerliussutsimik takutitsissutigineqarput.

Tamatuma saniatigut illoqarfik Orléans, Parisi-p kujataaniittoq ukkatarineqarpoq. Tassani partii talerperliusoq National Samling ataatsimeersuarpoq, naatsorsuutigineqarporlu akerliussutsimik takutitsinerit annertuut tassani ingerlanneqassasut, ilaatigut naatsorsuutigineqarluni inuit 20-30.000-it peqataassasut.

Taamatuttaaq sapaatip akunnerata siuliani sakkortuumik akerliussutsimik takutitsisoqarnerata kingunerisaanik politiit amerlanerit sumiiffinni sulisinneqarput taamak pisoqaqqissinnaanissaa pinngitsoortinniarlugu.

Politiit 70.000-it nuna tamakkerlugu sillimatinneqarput, sapaatip akunnerata siuliani 60.000-iutinneqarsimariarlutik.

- Inunnut sequtserisunut aammalu tillinniartunut kiisalu inoqatiminnut persuttaasunut naaperiaarusussuseqarata sulissaagut, Laurent Nunez akerliussutsimik takutitsinerit sioqqullugit oqarpoq.

Taamatuttaaq dronit, qulimiguullit sakkutuullu qamussui sillimatinneqassasut ilisimatitsissutigineqarpoq.