Inuit innarluutillit kattuffiat isornartorsiuisoq: Ataqatigiinngitsumik oqalunneq ilungersunartoq
Nunatsinni Inuit Innarluutillit Kattuffiata NIIK-p 2026-mut aningaasanut inatsimmi inuit innarluutillit kattuffiisa ingerlannissaannut aningaasaliisoqannginnera isornartorsiorpaa. - Politikkikkut oqariartuutigineqartartut iliuuserineqartullu ilungersunartumik ataqatigiinngillat, NIIK-miit oqaatigineqarpoq.
- Aningaasanut inatsimmi tapiiffigineqarnissarput ataasiinnarmilluunniit eqqaaneqanngilaq, taamaammat inuit innarluutillit kattuffiisa piumasaqaateqanngitsumik tapersersorneqarnissaat piumasaraarput, NIIK-imi siulittaasoq Viggo Johansen oqarpoq.
Assi: Leiff Josefsen
2026-mut aningaasanut inatsisip sapaatip-akunnerani kingullermi tallimanngormat akuersissutigineqarnissaa sioqqutitsiarlugu, Nunatsinni Inuit Innarluutillit Kattuffiat (NIIK) ikioqqulluni oqariartuuteqarpoq.
Naalakkersuisut peqqissutsimut inunnullu innarluutilinnut naalakkersuisoqalersitsinikuugaluarlutik 2026-mi inuit innarluutillit kattuffiinut tapiissutinik immikkoortitsisoqannginnera NIIK-imit eqqumiigineqarpoq:
- Sooq naalakkersuisoqarfimmik pilersitsisoqariarluni kattuffiit taassuma isumasiorfigisassai innuttaasullu oqaaseqartartuisa pingaarnersaat aningaasatigut tunngavissaarutsinneqassappat?
- Taamatut iliuuseqarneq politikkikkut oqariartuutigineqartartut iliuuserineqartullu ilungersunartumik ataqatigiinngillat, NIIK tusagassiuutitigut nalunaarummi allappoq.
Millioni ataaseq qaammatit marlunni atorneqassasoq
NIIK-imit isornartorsiuineq marlunnut tunngasoq NIIK-p siulittaasuata Viggo Johansenip Sermitsiamut itisilerpaa.
Siullertut, ukioq manna aningaasanut inatsimmi inuit innarluutillit kattuffiisa sulinissaannut 1 million koruunit immikkoortinneqarnerat.
Aningaasalli novembarip aallartinnerani aatsaat qinnutigineqarsinnaalerput, taakkulu ukioq naatinnagu atorneqareersimassallutik.
- Qaammatini marlunni atussallugit periarfissaqarpianngilagut, Viggo Johansen oqarpoq, isornartorsiorneqartullu aappaanut saalluni:
- Aappaagu aningaasaliiffigineqassanngilagut. Aningaasanut inatsimmi tapiiffigineqarnissarput ataasiinnarmilluunniit eqqaaneqanngilaq, taamaammat inuit innarluutillit kattuffiisa piumasaqaateqanngitsumik tapersersorneqarnissaat piumasaraarput, oqarpoq.
Oqaaseqartartutut atuuffillit
Viggo Johansenip inuit innarluutillit pillugit isumaqatigiissut Kalaallit Nunaanniit ilannguffigineqarnikuunera innersuussutigaa. Inuit innarluutillit taakkualu kattuffii oqaaseqartartutut atukkat pillugit ingerlateqqiisartuunerat tapersersorneqarnissaat qulakkeerneqassasoq isumaqatigiissummi allassimavoq.
- Kingullermi nakkutilliinermi Inuit innarluutillit kattuffii aningaasaliiffigineqassasut Kalaallit Nunaannut inassutigineqartut ilagaat, Viggo Johansen nassuiaavoq.
NIIK-p isornartorsiuineranut Naalakkersuisut oqaaseqartinniarlugit Sermitsiamiit novembarip 17-ianni saaffiginnissutigaarput, sulilu akissutisinissaq utaqqillugu.
