Inuit marluk tillitaminnik tigummiartut tigusarineqartut

Sapaatip ullaassanni nalunaaqutaq 04.30 Kalaallit Nunaanni Politiinut nalunaarutiginnittoqarpoq pasinartumik pissusilersortoqarnera tunngavigalugu, tamannalumi pissutissaqarsimavoq, tassami Nuup immikkoortortaani Qinngutsinni isaruaarniarfimmut tillinniartoqartoq paasinarsivoq.

Taamak oqaluttuarpoq nakkutilliisut pisortaat Jeppe Andsager.

Politiit alapernaarsuititaat sumiiffimmut ornigutsinneqarput, politiillu apuukkamik takusinnaavaat pisiniarfimmit qimaguttunik apummi tumiliortoqarsimasoq.

Politiit qimmiat tumisiortinneqalerpoq innuttaasullu pisumut malinnaalluartut iluaqutigalugit, politiit sukkuussanerlutik tikkuunneqarput, taamaalillutik politiit tillinniarsimasutut pasisat marluk tigusarilertorsinnaasimavaat.

– Tigusarivagut suli tillitatik tigummigaat aammalu allanik tillitaasimagunartunik tigummiaqarput, fortæller Jeppe Andsager.

Isaruaarniarfimmiit tillinniat isarussat seqinersiutaanerusut tillissimavaat, allallu tigummiaat tillitaarpasittut tassaapput tupat assigiinngitsut.

Tillinnarsimasutut pasineqartut angutaapput inuusuttut, pisumullu tunngatillugu unnerluutigineqareerput.

Suliaq politiit suli misissorpaat paasiniarlugu, tillinniarnermut atatillugu inuit allat peqataasimanersut, kiisalu tupat assigiinngitsut suminngaaneernersut ilanngullugu paasiniarneqarluni.