Inuit tusindillit Unnuk Kulturisiorfimmi Folketingimut alakkarteripput

Folketingimi ukiumoortumik unnuk kulturisiorfimmi, tamanut ammatitsinermi inunnik ulikkaavippoq.

Ammaanersiornissaq sioqqullugu inuit, Christiansborg Slotskirkem tikillugu utaqqisuni siuleriiaapput. Folketingimmut alapernaatsut ukiorsiusersorsimasut amerlaqaat, Folketingip ataatsimiittarfiani, Landstingip ataatsimiittarfiani ataatsimiititaliallu inerpassuini inuit angallapput.

Atlantikup avannaamiut nalliuttorsiornerat

Politikerit arlallit unnummi tassani, najuupput. Ilaatigut Folketingimi siulittaasunngorlaaq Henrik Frandsen, Vandrehallenimi “Siulittaasup allaffiani” ataatsimiittarfianilu takornariartitsivoq.

Quleriinni siullermi aappaannilu partiit init balloninik allagartarpassuarnillu pinnersaaserpaat, kaffillerlutillu kaagillerput, nipilersortoqartarluni nittarsaassissutinillu amerlasuunik tunioraasoqarpoq.

SF-ip eqimattatut ataatsimiittarfiani quleriit aappaanni Inuit Ataqatigiit Savalimmiunilu partiit Sambandsflokkurin aamma Javnaðarflokkurin ataatsimoorlutik nalliuttorsiortitsisuupput, kalaallit savalimmiormiullu eqqumiitsuliortut ilaatigut erinarsoqatigiit Aavaat rappertartullu The Malikk unnumi tassani, aliikkusersuillutik tusarnaartitsipput.

Aamma Folketingimi ilaasortat Atlantikup avannaaneersut oqaloqatiginissaanut periarfissaqarpoq, soorluttaaq sammisat pillugit Atlantikup avannaaneersut Folketingimi ilaasortaasa sulissutiginerusinnaasaannik, siunnersuuteqartoqarsinnaasoq.

Takuniaaneq kalattoornerlu

Alapernaattut ilagaat Sika Koch, Maria Sethsen aamma Kristine Abrahamsen Københavnimi unnuk kulturisiorfimmi peqataasartut, taakkualu kalaallit aaqqissuussaannik ukioq manna peqarnera, nuannaarutigaat. Ilaatigut Qarsoq Høge-Damimit taakku takornariartinneqarput.

– Nuanneqaaq. Ilaatigut illorsuup balkoniisa ilaanniippugut, taava Aqqaluk Lynge taassumalu taalliai pillugit oqaluttuuppaatigut. Oqaluttuaavoq nuannersoq tarrarsorfigisinnaasara, Maria Sethsen Paamiuni inunngortoq Danmarkimili ukiorpassuarni najugaqartoq, oqarpoq.

Sika Koch Nuummi inunngorpoq Kristine Abrahamsenilu Narsarmiuuvoq. Ikinngutigiit pingasut Kalaallit Illuutaanni imaluunniit kalaallit aaqqissuussaannut naapitsigajupput.

– Kalattoorneq nuannaraarput, taamaattumik sapinngisatsinnik akulikitsumik taamaaliortarpugut, isumaqatigiippasittumik taama oqarput.