Inuuniarneq akitsorujussuartoq - aningaasat naleerukkiartornerat tupaallaatigineqartoq
Aningaasaqarnermut Siunnersuisoqatigiit siulittuinerminni kusanarnerusumik saqqummiisimarpasipput. Siunnersuisoqatigiimmi aningaasat naleerukkiartornerannut ilimagisaat annikinneruvoq. Ajoraluartumillu innuttaasunut kinguneqarpoq, tassami inuuniarneq ilimagisamiit akisunerujussuanngorpoq.
Inuussutissat akitsungaatsiarput saniatigullu ineqarnermut, innaallagissamut, imermut kiassarnermullu atuinermut akiliutit aamma 2025-mi qaffapput.
Toqqorsivimmit: Leiff Josefsen
Inuussutissat akitsornerat aningaasartuutillu qaffakkiartornerat pissutaallutik aningaasat naleerukkiartornerat ima annertutigaaq Aningaasaqarnermut Siunnersuisoqatigiit ilimaginngisaanniit qaffasinnerulluni.
Naatsorsueqqissaartarfiup atuisunut akit 2025-miit januaariimiit 2026-mi januaarip tungaanut qaffakkiartornerat saqqummiuteqqammerpaa, ukiullu arlallit ingerlaneranni aatsaat taama qaffasitsigaluni 3,7 procentimik annertuseriarsimavoq.
2022-miit 2025-mut aningaasat naleerukkiartornerat.
Tusarfik: Naatsorsueqqissaartarfik.
Naatsorsueqqissaartarfiup kisitsisaatai misissorluaraanni ineqarnermut, innaallagiamut, imermut kiassarnermullu akit qaffakkiartornerat pissutigalugu aningaasat naleerukkiartornerat ukiuni tallimani kingullerni aatsaat taama annertutigisoq.
- Qaffariaat inneqarnermut inuussutissanullu akit qaffanneranik pingaartumik peqquteqarpoq, ataatsimut isigalungu ineriartornermut annertunerpaamik sunniuteqarmata. Inuussutissat 3,7 pct.-imik qaffattut ineqarnermut aningaasartuutit 4,7 pct.-imik qaffassimapput, Naatsorsueqqissaartarfik paasissutissiivoq.
Kisitsisit pingaarutillit
Atuisunut akit naleqqersuutaat inuiaqatigiit aningaasaqarneranni pingaaruteqarpoq. Aningaasat naleerukkiartornerat annertutillugu pisissutaasinnaasut ikiliartortarput. Inoqutigiillu missingersuutaannut sunniuteqassanngippat aningaasarsiat taakkununnga assingusunik qaffattariaqarput.
Aningaasat naaleerukkiartornerannut kisitsisit nutaat Aningaasaqarnermut Siunnersuisoqatigiinni aningaasaqanermik ilisimasallit tupaallaatigisimassavaat.
Aningaasaqarnermut Siunnersuisoqatigiit 2026-mut ukiup affaanut siullermut nalunaarusiaat saqqummerpoq, tassanilu aningaasat naleerukkiartornerat 2025-mi "3 procentit tungaannaanut" annertutiginissaa nalilerneqarpoq.
Siunnersuisoqatigiit 2026-mi aningaasat naleerukkiartornissaannut naliliinerat annertusisariaqarpoq. Ukioq manna aningaasat naleerukkiartornerat 2,5 procentiussasoq januaarimi naatsorsuutigineqarpoq.
Aningaasaqarnermut Siunnersuisoqatigiit 2025-mi aningaasat naleerukkiartornerat kukkusumik nalilerpaat. Uku kisitsisinut ilimagisat qaammat ataaseq matuma siorna saqqummiussaapput.
Tusarfik: Aningaasaqarnermut
Siunnersuisoqatigiit
Nalunaarusiaq 2026
ukiup affaa siulleq.
Akit qaffakkiartornerannut aningaasat naleerukkiartornerannut pissutaasinnaasut ilaat pillugit Aningaasaqarnermut Siunnersuisoqatigiit ima allapput:
"Akit qaffakkiartornerannut inissianik attartornermi akit, imermullu innaallagiamullu akit qaffasinneruneri annertuumik ilapittuutaapput. Ilaatigut namminersorlutik oqartussat inissiaataasa attartortittakkat iluarsartuunnerini kinguussaaneq illuatungilerniarlugu, atuisunut akiliutigitinneqartut qaffannissaat siunnerfigineqarpoq."
"Atuisunut akigititat qaffasinnerusut nuannarineqanngitsuupput, inissialli ullutsinnut naleqquttunngorsaqqinnissaannut pilersuinermillu ingerlatsivinni namminersorlutik oqartussanit pigineqartuni aningaasaqarnerup patajaatsup pilerseqqinnissaanut tamakku pisariaqarput. Pissutsit taakku tunuliaqutaralugit 2025-mi akit qaffakkiartornerat 3 procentit kiisalu 2026-mi 2½ procentit angullugit annertussuseqartussatut ilimagineqarpoq. Taakku 2025-mi septembarimi naliliutigineqartunit qaffasinnerulaarput, tassanilu ilaatigut inuussutissat akiisa qaffannerat ilimagineqartumit annertunerunera patsisaavoq, tamannalu akit nunani allani ukiuni siusinnerusuni akit ineriartornerannut kingusinaartumik nalimmassarnerannik patsiseqarunarpoq."
