Island EU-mik isumaqatiginninniarnissamut naaggaartoq

Islandimi EU-mut ilaasortanngornissamut isumaqatiginninniarnerit nanginneqarnissaat pillugu taasinermi naaggaarput.

Tamanna nunami qinersiviit kingulliit kisinneqarnerisa kingorna paasinarsisoq, Islandimi tusagassiorfimmit RUV-mit kisitsisit takutippaat.

Qinersisartut 47,2 procentii naalakkersuisut isumaqatiginninniarnernik nangitsinissamik siunnersuutaannut akuersillutik taasipput. 52,8 procentit akerliullutik taasipput.

Taasinermi peqataasut 82,5 procentiupput, Islandimilu tusagassiorfik malillugu tamanna 2009-mi inatsisisartunut qinersinerup kingorna annertunersaavoq.

Islandimi taasisinnaatitaasut 270.000-iupput, tassanilu innutaasut 400.000-ingajaapput.

Taamaallaat illoqarfiit pingaarnersaani qinersivinni marlunni angertut amerlanerussuteqarput. Qinersivinni sinneruttuni sisamani naaggaartut taasisuni tamani amerlanerussuteqarput.

Rikke Wetendorff Nørgaard, DI-mi Europapolitikimi underdirektørip ”Islandimiut alloriarnermik tullermik tiguserusunnginnerat, taamaalillutillu siunissami EU-mi ilaasortaanissamut periarfissanik misissuerusunnginnerat uggornartoq”, allakkatigut oqaaseqaammini oqarpoq.

- Nunarsuaq nalorninartorsiorneruvoq, uagullu paasinninnerput malillugu tamanna Europamiut suleqatigiinnerunissaannut piumasaqaateqarfiuvoq, annikillisaanani. Taasinerli qanorluunniit inerneqaraluarpat Island qanimut iligaarput, nuannilu avannarlerni Europamilu qanimut suleqatigiinnerup nanginnissaa qilanaaraarput, taanna Ritzaumut oqaaseqaammini allappoq.

Island aallaqqaammut EU-mut ilaasortanngornissamik 2009-mi – aningaasarsiornermi ajornartorsiulernermit ukioq ataaseq qaangiuttoq qinnuteqarpoq. Nuna ajornartorsiornermit immikkut sakkortuumik eqqugaavoq, aningaasarsiornerlu nukeerutsinneqarluni, nutaarsiassaqartitsivik Ritzau allappoq.

Naalakkersuisut EU-mut isorinnittut suliaq 2013-mi unitsippaat.

EU-mut ilaasortaaneq ernianik appasinnerulersitsillunilu nunarsuarmi pisuni Ukrainemi sorsunnermik USA-llu præsidentianik Donald Trumpimik sunnersimaneqartumi isumannaannerulersitsissasoq angertut isumaqarput.

EU-mut ilaasortaanermut tapersersuisut ingammik Trumpip Kalaallit Nunaannut, Danmarkimit Islandimut qaninnermut inissisimasumut qunusaarinera immikkut aarlerinartippaat.

Akerlianik naaggaartut EU-mut ilaasortaanerup nunap nammineertuunera navianartorsiortitsinissaa, aalisarnermullu killilersuutinik eqqussisoqarnissaa aarlerigaat