Islandimut attaveqaatit maannakkorpiaq ajoquteqarput

Nutartigaq: Tusassip nalunaarutigaa tallimanngornermi 18:30-ip missaani attaveqaatit iluarseqqinneqartut, taamaalilluni immap naqqatigut kabelit pissusissamisut ingerlaqqilersut.

Tusass tallimanngornermi ualikkut nalunaarpoq Islandimi atortorissaarutit pingaarutillit ilaat teknikkikkut ajoquteqalersimasut, tamannalu atuisut attaveqarnerannut piffissap ilaani sunniuteqartarsinnaasoq.

- Islandimi attaveqaatitigut pilersuisutsinnik suleqateqarluta ajornartorsiut piaarnerpaamik aaqqinniarlugu tamaviaarpugut.

- Islandimut immap naqqatigut kabeli amerikap avannaanut immap naqqatigut kabelimut nuukkallaqqavarput, taamaalillutik attaveqaatitta tamarmik Amerikap avannaa aqqutigalugu ingerlanneqalersillugit. Naak aaqqiissutaagallaannaraluartoq, atuisugut oqaaseqaataat naapertorlugit tamanna  attaveqaatinut iluaqutaasimavoq.

Tusassip ajutoornermut nalunaarutai kingulliit naapertorlugit internetsikkut attaveqaatit kipisaqattaarsinnaapput - tassa imaappoq, atuisut ilaat nalinginnaasumik attaveqarsinnaasut, allallu attaveerutivittarsinnaasut. 

- Islandimi pilersuisugut suleqatigit tamaviaarluta ajoqutaasinnaasut misissorpavut, Tusassimit nalunaarutigineqarpoq.