Isornartorsiuisoqareersorlu: Ilisimatusartuunerup partii namminiilivinnissamik anguniagaqartoq ilaleraa
Kalaallit Nunaata namminiilivinnissaa kinguarsarlugu Naalakkersuisut isumalioqatigiissitamik pilersitsinerarlugit Naleqqap isornartorsiorpaa. Isornartorsiuineq ilisimatusartuunerup Ulrik Pram Gadip taperserpaa.
Assi: Arthur Cammelbeeck/Ritzau Scanpix
Naalakkersuisut Danmarkimiit namminiilivinnissaq kinguartinniarsaraat.
Naalakkersuisut §21-mut isumalioqatigiissutap sulinissaannut sinaakkutissat akuerimmassuk Naleraq taama isornartorsiuivoq. Isumalioqatigiissitap ukiup tulliani ilaatigut Namminersorneq pillugu inatsimmi paragraf 21-mi, Kalaallit Nunaata namminiilivinnissaanut aqqutissiuussisumi, inatsisitigut suliarineqarnissaa qulaajassavaat.
Suliarli taanna tamakkiisumik suliarineqareersoq Naleqqamit oqaatigineqarpoq, taamaattumillu kinguarsaaniartoqarneraalluni. Partiip isornartorsiuinera Sermitsiami allaaserineqarpoq, aammattaaq Kuno Fencker, Nalerap sinnerlugu Inatsisartunut ilaasortaq, RADIO IIII-mut taama oqarpoq.
Maannalu Ulrik Pram Gad, Dansk Institut for Internationale Studierimi ilisimatusartuuneq, Kalaallit Nunaata Danmarkimut nunarsuullu sinneranut attaveqarneranik ilisimatusartoq, partiip isornartorsiuinera taperserpaa.
- Isumaqarpunga Kuno Fenckerip isumalioqatigiissitamut suliassiissutigineqartup suliarineqareernikuuneranik oqarnera ilumoortuusoq.
Isumalioqatigiissitaq katillugit 2 millionit koruuninik akeqassaaq. Aningaasalli taakku asuli atorneqarsimanersut oqaatigissallugu suli siusittoq, Ulrik Pram Gad oqarpoq.
- Paragraf 21-mili – aammattaaq namminersorneq pillugu isumaliutissiissummi 2008-meersumi oqaaseqaatit ilanngunneqartut – Kalaallit Nunaata qanoq ililluni Danmarki pisortatigoortumik isumaqatiginninniarfigisinnaaneraa tunngaviusumik allassimavoq, taamaalillunilu taannartaa suliarineqareerluni, nassuiaavoq.
Kalaallit Nunaata isumaqatiginninniarnermi inissisimaffini erseqqissumik oqaatiginissaa, namminiilivinnissarlu qanoq timitalerneqarumaarnersoq amigaatigineqartoq, Ulrik Pram Gadip naqissuserpaa.
§21-li naapertorlugu isumalioqatigiissitaq maanna naalakkersuisuusut misissorneqarnissaanik piumaffigineqarnikuunngitsut taanna aamma oqarpoq.
- Isumalioqatigiissitamut suliakkiissutit tunngaviusumut tunnganngillat.
- Inatsisitigut ingerlatseriaatsit suliarineqassapput, tamannalu ersarippoq, oqarpoq naqissuserlugulu Naleqqap isornartorsiuinera tunngavissaqarluartoq, tassalu Naalakkersuisut namminiilivinnissamut isumalioqatigiissitaliornikkut kinguarsaaneraanerat.
RADIO IIII-p Naalakkersuisut siulittaasuat Jens-Frederik Nielsen (Demokraatit) oqaaseqartinniaraluarpaa, sulili akineqanngillat.
