Issittumi Sakkutooqarfik Norgelu suleqatigiinnissamut sungiusartut

Kalaallit Nunaat, Savalimmiut Danmarkilu siorna Issittumi Siunnersuisoqatigiinni siulittaasunngormata immikkut ittumik siulittaasuuffeqalerpoq.

Kunngeqarfimmi aammattaaq Sineriammi Upalungaarsimasut Issittumi Ataatsimoorfianni, nunani arfineq-pingasuni Issittumi Siunnersuisoqatigiinnut ilaasortaasuni sineriammi upalungaarsimasut suleqatigiinneranni, siulittaasuuvoq.

Matumani Issittumi Sakkutooqarfik Kalaallit Nunaata sineriaani upalungaarsimasutut akisussaaffeqartarpoq - taamaammallu siulittaasoqarfiup Nuummi sakkutooqarfimmut atassuteqarnera pissusissamisoorpoq.

Tikeraartoq

Norgemiut sineriammi upalungaarsuisuisa umiarsuaat NoCGV Hopen juulip naanerani Nuummut tikeraarpoq. Umiarsuaq Sineriammi Upalungaarsimasut Issittumi Ataatsimoorfianni ilaasortat arlallit tikeraaqattaartillugit Kalaallit Nunaannut tikippoq.

Norgep sakkutuui Kalaallit Nunaata imartaani isumannaatsumik angalasinnaajumallutik sakkutuut imarsiortut naalagaat misilittagaqarluartoq, ukiuni arlalinni Issittumi sakkutooqarnermi misilittagaqareerluni sineriammi upalungaarsimasunut ikiuussinnaasoq, umiarsuarmut ikiuutsikkusullugu Illersornissaqarfimmut qinnuteqarput.

- Nuummiinnermi nunaqavissut suleqatigisat arlallit, soorlu Kalaallit Nunaanni Politiit, Aalisarnermut Piniarnermullu Nakkutilliisoqarfik kiisalu Issittumi Sakkutooqarfik attaveqarfiginerulernissaannut aamma periarfissaqarpoq. Aamma Illersornissaqarfiup umiarsuaa nakkutilliisoq Ejnar Mikkelsen suleqatigalugu sungiusartoqarsinnaasimavoq, Illersornissaqarfik tusagassiuutinut nalunaarummi ilisimatitsivoq.

- Ataatsimut isigalugu sumiiffik unammillernartorpassualik sineriammi upalungaarsimasut arlaannaataluunniit kisimiilluni nakkutigisinnaanngisaa nakkutigaarput, taamaammallu nunat arfineq-pingasut taakkua imaani ajornartorsiutit assigiinngitsorpassuit iliuuseqarfiginissaannut suleqatigiinniarlutik aalajangersimapput.

- Ilaasortat uuliakoornermiit umiarsuit takornariartaatinut maskiinaminnik ajutoortunut aalisariutinullu annaassiniaanermut ikioqatigiittarput. Issittumi isorartummat kilometerinik hundrede-nik tusindinillu arlalinnik isorartutigisumukartoqakkajummat, immami upalungaarsimanermut tunngatillugu suleqatigiilluarnissaq pisariaqarluinnartuullunilu pingaaruteqarpoq, tusagassiuutinut nalunaarummi nangilluni allassimavoq.

Issittumi Siunnersuisoqatigiit 2011-mi Nuummi ministerit ataatsimiinneranni Issittumi ujaasineq annaassiniarnerlu pillugit suleqatigiinnissamut isumaqatigiissummik siullermik pisussaaffiliisumik atsioreersullu, Sineriammi Upalungaarsimasut Issittumi Ataatsimoorfiat 2015-imi pilersinneqarpoq.

- Sineriammi Upalungaarsimasut Issittumi Ataatsimoorfianni sakkutooqarnikkut peqatigiiffiunngilaq. Suleqatigiinneruvoq atoriaannaasunik suliaqarfiusoq, tassani ilaasortat misilittakkanik avitseqatigiittarlutillu periutsit ineriartortittarpaat kiisalu Issittoq isumannaatsumik avatangiisinullu akisussaaffilimmik pilersinniarlugu sungiusartarlutillu ataatsimut anguniagaqartarput, Illersornissaqarfiup tusagassiuutinut nalunaarutaani erseqqissarneqarpoq.