Issittumi tunngaviusumik ilinniarfimmi atualertut aatsaat taama amerlatigisut

Kangerlussuaq inuusuttunik ilinniarnissamut pilerisuttunik maannakkut takusassaaleqiffiunngilaq. Issittumi tunngaviusumik ilinniarfiup 2024-imi aallartinneranit atuaqatigiit pingajussaat aallarteqqammerput. Illersornissaqarfik nittartakkamini taama allaaserisaqarpoq.

Ilinniarfik iluatsilluartutut illersornissamut pisortamit nalilerneqarpoq.

- Issittumi tunngaviusumik ilinniarneq iluatsilluarmat nuannaarutigeqaara. Inuusuttummi kalaallit ilinniarnermik ingerlaqqinnissamut periarfissinneqarput, tamannalu Kalaallit Nunaanni Illersornissaqarfimmi siunissami atorfininnissaminnut aqqutissiuussisinnaavoq,  Michael W. Hyldgaard oqarpoq.

Atuartuusimasut atorluaasut

Ilinniarneq qaammatinik arfinilinnik sivisussuseqarpoq. Ingerlaqqiffiusunik ilinniarnissamut periarfissanik arlalinnik ammaassisarpoq. Ilinniaqqinnissamut periarfissat ilaatigut illersornissaqarfimmi, politiini imaluunniit upalungaarsimanermut tunngasunik ilinniartitaanerni atorneqarsinnaapput. 

- Siusinnerusukkut atuartut ilaat assersuutigalugu politiinngorniarfimmut, qatserisartutut aammalu Kalaallit Nunaanni pinerluuteqarsimasunik isumaginnittoqarfimmut ilinniarnissamut akuerineqarput. Taakkunannga aamma arlallit Illersornissaqarfimmi ingerlaqqiffiusumik ilinniarlutik sulilerput. Ilinniartut Kalaallit Nunaanni inuiaqatigiinnik nukittorsaaqataassasut anguniagaavoq, tamannalu pitsaasunik assersuutissartaqalereerpoq, ilinniarfimmi pisortaq, Mathias la Cour Vågen oqarpoq.

Sermitsiap atuartut ilaannik apersuinissani Illersornissaqarfimmut kissaatigigaluarpaa. Tamannali sapaatit akunnerat 35 sioqqullugu periarfissaanngitsoq, tassanngaanniit akipput. Atuartut ilinniarnertik piffissami siullermi ukkatarissagaat Illersornissaqarfimmit aalajangerneqarsimasoq tunngavilersuutaavoq.

Illersornissaqarfiulli nalunaarutaani atuartoq kinaassutsimigut allaaserineqanngitsoq aallartinnissamut ulloq ataaseq sioqqullugu pissangasimaqisoq atuarneqarsinnaavoq.

- Unnuaq sininngilanga, atuartoq taama issuarneqarpoq.

Ilinniarfik atuartunut 50-inut inissaqarpoq. 38-it aallartipput. Tamanna Illersornissaqarfiup Sermitsiamut ima nassuiaatissaqartippaa:

- Issittumi tunngaviusumik ilinniarfimmut ilinniartut maanna aallartissinnaasut 50-it neqeroorfigineqarput. 46-it qujarussillutik akuersipput. Kisianni neqeroorfigineqarnermit ilinniarnerup aallartinnisaanut ajoraluartumik arlalinnik uniinnartoqarpoq. Inuusuttut 105-it Issittumi tunngaviusumik ilinniarfimmi atualerusullutik qinnuteqarnikuupput.

- Issittumi Sakkutooqarfiup aallartinnginnermi uniinnartartut ikinnerusarnissaat suliariniarpaa, Issittumi Sakkutooqarfimmit allapput.