Inuttaaqatigiittut pingaartinneq ataqqeqatigiinnerlu
kingornussaavoq pitsaasoq ataatsimoornermik misigititsisartoq.
Taanna
siulitsinnit, ilinniartitsisutsialannit, ikinngutinit suliatigullu
peqatigisartakkatsinnit pissarsiarput allanullu nutaanut siaruarterniagassarput.
Inuttaaqatigiittut pingaartinneq ataqqeqatigiinnerlu
kingornussaavoq pitsaasoq ataatsimoornermik misigititsisartoq.
Taanna
siulitsinnit, ilinniartitsisutsialannit, ikinngutinit suliatigullu
peqatigisartakkatsinnit pissarsiarput allanullu nutaanut siaruarterniagassarput.
Tassaniippoq aamma ileqqorissaarnissaq, Sakkiusikkut
Beniallu aammali inuiaqatigiinni iliuuseqartartut allat paasisassaat,
minnerunngitsumillu tamat oqalliffiini oqaloqataarusuttut
qinngarsuinertaqanngitsumik.
Arlaqarpugut sivitsortumik isiginnaartuusimasut
Facebookikkut oqalliseriaatsimik tujorminartumik atuisunik, ilaanni
ingasattupilussuarmik pissusilersorfiusartumik ammillu qalipaataanik
immikkoortitsinertaqartartumik. Akuerineqarsinnaanngilaq inuit ilaasa
kalaaleqatiminnik akusanik, pingaartumik politikerinik allanillu
akerartuisarnersuat, allaat oqaluttarlutik assuutigut atussanngilluinnaraat.
Oqaasipalaat soorlu annoraamik qaqortumik assukkersimasup atukkani piissagaa,
asugooq inunnguutsiminik akutaammat. Ilami aamma ingasakkami naalakkersuisut
siulittaasuannik taamatut oqaasipalaat atorlugit saassutarinninneq. Tassa
silaqassaanngitsuliorneq iliuuseqarfigisariaqagaq nalunaarutigineqarlunilu.
Oqaq soqqusaatsoq
Oqaluttuarisaanitsinnit pissuteqartumik inuppassuit
akusaapput. Imaanngilarli kalaallit akusat kalaallinit allanit
nikanarnerussasut muminganilluunniit.
Tamat akornanni oqallinnermi, Facebookimiunerusoq,
oqalliseriaaseq ilaanni kusanaattaqaaq. Ajorluinnarluni
kannguttaalliornerullunilu. Inuit-uku ilaat pissutissarsiuinnarlersimagunartut
kamassamik aniatinnissaannut, sualuttorsuarmik kamassarlutik.
Soorunami naapertuilluanngitsumik pineqarsimasut
kamassartarput aaqqiagiinngissutaasinnaasunillu ujarlertarlutik,
nunasiaataasimanitsinnik pissuteqarsinnaasunik. Ingerlaqqinnissarliuna
saammaasseqatigiinnissarlu pisariaqartut, imminut inoqatinullu kamak aserorterisuutikkunnaarlugu. Nalunngilara oqaannarluni ajornakusoortoq,
kamannersuulliuna atugaaqisup ajortumik sunniussimanera naammatsinnarsisimasoq
allatullu katsorsartariaqalersimalluni.
Toqqorlutik pisut
Suallattarpit inuit nalusatit oqalorujullutit sorpajunnik
akerartullaraangakkit?
Taakkuluunniimmi oqaatsit politiivi, isumaqarunartut
Facebookikkut kalaallisut oqarluutinik oqaatsinillu kukkusumik atuisunik
naqqissuisoqarsinnaasoq iluaqutaasumik.
Oqaatsigut paarilluartariaqarpagut. Pingaartuuvoq.
”Silassorissut” naapittarfiannik oqaloqatigiiffiusumik
pilersitsisoqarsinnaavoq, ilisimasanik avitseqatigiiffiusumik
siaruarteriffiusumillu. Qulareqaarali oqaatsinik atuinermik kukkunersiuinerit
Facebookikkut iluarsineqarnissaat,
naveersillattaaginnarluni.
Taamatulli oqareerlunga nuannarisannik oqassaguma tassaavoq
aaqqissuulluakkanik oqallitsitsinernik isiginnaarneq tusarnaarnerluunniit,
tunngavilersorluakkanik oqaluttut peqataaffigisaannik. Tassani
assigiinngissuseq immini inissaminiippoq. Puussarilaarsinnaavutit
qinngasaarilaarlutillu aammali ilumoorsaarlutillu anguniagaqarsinnaavutit
isummersoqatinnik naapigiaanikkut. Taamatut ataqqeqatigiilluni
isummersoqatigiinneq tassa aatsaat ileqqussaq.
