Isumaqatigiissut: Isorliunerusuni internetsi sukkanerulissaaq

EU, Danmark Kalaallit Nunaallu satellitsikkut attaveqarnermut isumaqatigiissummik millionilikkaanik naleqartumik atsioqatigiipput.

Saamerlermiit: EU-p kommissioniata siulittaasua Ursula von der Leyen, Naalakkersuisut siulittaasuat Jens-Frederik Nielsen, Tusassip pisortaanera Jonas Hasselriis aamma nunat tamalaat suleqatigiinnissaannut Europami kommissæri Josef Síkela.

Assi: Oscar Scott Carl

Hanna Hviid Hanna Hviid Tusagassiortoq

Arnaq Nielsen Arnaq Nielsen Tusagassiortoq

Saqqummersinneqarpoq 7. Septembari 2026 - 10:17

Ussassaarut

EU-kommissionip siulittaasuata Ursula von der Leyenip tikeraarneranut atatillugu EU, Danmark Kalaallit Nunaallu ullumikkumiit isorliunerusut attaveqarluarnerulernissaat qulakkeerniarlugu isumaqatigiissummik atsioqatigiipput.

Tusassimi pisortaaneq Jonas Hasselriis taama oqarpoq.

- Tusass nuannaraara, inuiaqatigiinnut iluaqutaavugut, pitsaanerusumillu aaqqiissuteqarnissamut peqataasinnaanerput uagutsinnut pingaaruteqarpoq, matumanilu tamanna EU-p, Danmarkip Kalaallit Nunaatalu suleqatigiinneratigut pivoq. Aammali suliffeqarfiit suleqatigiipput: Tusass, Hispasat Eutelsatilu aaqqiissutinik pilersitsisuupput, tamannalu nuannaarutigeqaarput.

Isumaqatigiissut katillugit 9 millionit euronik naleqartoq EU-mit 5 millionit euronik, Danmarkimit 2 millionit euronik Kalaallit Nunaannillu 2 millionit euronik tapiissuteqarfigineqarpoq.

Tusassip Qaanaami Savissivimmilu internetsimut attaveqaatit nutaat pitsaanerusut ullumikkumiit atulersissinnaavai.

Ussassaarut

- Piffissami aggersumi satellitsinut tunngatillugu atortorissaarutit pitsaanerulersissinnaallugit neriuutigaarput, tamannalu maanna misissussavarput, Jonas Hasselriis oqarpoq.

Suleqatigiinnerulernissamut periarfissatut neriuutigineqartoq

Jonas Hasselriis Nuummi satellitsikkut attaveqarfimmi apersorneqarpoq. Kalaallit Nunaata qulaani qaammataasarpassuaqartoq, taakkualu tamarmik immikkut Nuummi satellitsikkut attaveqarfimut attaveqartut nassuiarpaa. Taamaammat nunatsinni atuisutut qaammataasamukariarluni, maanga Nuummut apuuteriarluni tassanngaanniit sumiiffimmut ingerlaqqittarpoq.

- EU-mik suleqateqarneq aqqutigalugu IRIS²-imut, qaammataasanut suli pitsaanerusunut, ilanngussinnaalluta neriuutigaarput. EU-p qaammataasatigut piginnaasat pitsanngorsarniarlugit suliaqangaatsiarpoq, tassungalu suleqataasinnaagutta uagutsinnut iluaqutaassaaq, Jonas Hasselriis oqarpoq.

Qaanaami atassuteqaat ullumikkut sukkanerpaaq sekundimut 6 megabit-iusoq, maannalu Tasiilami Ittoqqortoormiunilu sukkassutsit 15 megabit-inut qaffanneqassasut taanna oqaluttuarpoq. Tusassip sukkassuseq siunissami qaninnerusumi suli qaffassinnaassallugu neriuutigaa.