Isumaqatigiissut nutaaq: Danmarkip napparsimasunut Kalaallit Nunaanneersunut siunissami akiliussisarneq tiguaa

Danmarkip ukioq manna septembarimi napparsimasut Kalaallit Nunaanneersut Danmarkimi katsorsarneqarnerannik tigusinissaq nalunaarutigimmagu, ikiorsiinerup Naalakkersuisut nunatsinnilu peqqinnissaqarfiup 180 mio. kr-t missaannik amerlassusilinnik allanut atuisinnaanerat pisinnaanngortippaa.

Februaarimi Naalakkersuisut danskillu naalakkersuisui 2026-mut aaqqissuussinerup aningaasalersorneqarnissaanut isumaqatigiissuteqarput, isumaqatigiissullu taanna maanna ingerlaavartunngortinneqarpoq.

Danmarkimi peqqinnissamut ministereqarfiup taamaalilluni peqqissutsimut inunnullu innarluutilinnut naalakkersuisoq Anna Wangenheim (D) kiisalu peqqinnissamut ministeri Ida Auken, ministerip Nuummut sapaatip akunnerani uani tikeraarnerani isumaqatigiissuteqartut, isumaqatigiissullu ulloq 1. januar 2027 atuutilissasoq nalunaarutigaa.

Isumaqatigiissutip siunissami kalaallit napparsimasut Danmarkimi immikkut ittumik katsorsarneqarnerannut Kalaallit Nunaanni peqqinnissaqarfiup akiligassinneqartarunnaarnera, isumaqatigiissullu ukiumut Kalaallit Nunaani peqqinnissaqarfimmut nukittorsaanissamut ineriartortitsinermullu 180 mio. kr-t missaannik atorneqarsinnaanngortitsisoq, ministereqarfiup tusagassiortunut nalunaarummini allappaa.

– Peqqinnissamik neqeroorutinik, kalaallit danskillu peqqinnissaqarfiinik pitsaanerusumik ataqatigiissitsisumik pisariaqartitsivugut. Taamaammat isumaqatigiissutikkut ugguunakkut kalaallit napparsimasut, Danmarkimi katsorsaanerup ingerlanneqarnerani danskisulli napparsimasutulli assigiimmik immikkut ilisimasalinnik katsorsarneqarnissamik qulakkeerinniffigineqarnerat nuannaarutigaara, peqqinnissamut ministeri Ida Auken isumaqatigiissut pillugu oqarpoq.

Allaffissornikkut aporfiiaasoqartoq

Isumaqatigiissutip kalaallit napparsimasut immikkut ittumik katsorsarneqarnissamik pisariaqartitsileraangata, pitsaanerpaamik neqeroorummik qulakkeerinnittoq, Naalakkersuisoq Anna Wangenheim oqarpoq:

– Napparsimaleraanni ungasissumullu angalasussanngorluni, taava pisariaqanngitsumik kinguarsaanertaqanngitsumik pitsaanerpaamik katsorsarneqarnissaq pingaaruteqarpoq. Tassunga atatillugu uagut innuttatsinnut danskinullu innuttaasunut immikkut ilisimasalinnik katsorsarneqarnissamik neqeroorutit assigiinnginnissat uannut pingaartuuvoq, taanna oqarpoq.

Anna Wangenheimittaaq isumaqatigiissutip nutaap allaffissornikkut suleriaatsinik aporfinnillu, manna tikillugu Danmarkimut innersuussinermi katsorsaanermilu nalaanneqartartunik annikillisaanera pingaartutut isigaa.

Isumaqatigiissukkuttaaq midicinsk fagrådimik nutaamik, katsorsaanerit sorliit Kalaallit Nunaanni ingerlanneqartariaqarnerannik, sorliillu Danmarkimi isumagineqartariaqarnerannik siunnersuisussamik pilersitsisoqarpoq.

Fagrådi Kalaallit Nunaanni aallaavilerneqarpoq, Kalaallillu Nunaanni peqqinnissaqarfiup danskillu napparsimaviisa akornanni sulianik erseqqissumik agguaassinissamut ilapittuisussaalluni, peqqinnissamut ministereqarfik allappoq.