Isumaqatiginninniarnermi suliakkiut: Naalakkersuisut suliakkiussamut tunngatillugu aningaasartuutigisaat tunniunneqassapput
Isumaqatigiissitsiniarnermut eqqartuussivik aalajangiivoq aatsitassarsioqatigiiffik Greenland Minerals Naalakkersuisut aningaasartuutaannik amerlanerpaartaanik akiliissasoq. Suliakkiussaq maanna eqqartuussivimmi ingerlaqqittussanngorpoq.
Foto: Oscar Scott Carl
Aatsitassarsioqatigiiffik Greenland Minerals A/S isumaqatigiissitsiniartarfimmi Naalakkersuisut pillugit suliami aningaasartuutit amerlanersaat akilertariaqarpai. Isumaqatigiissitsiniarnermut eqqartuussivik ataasinngornermi marsip qulingiluaani taama aalajangiivoq.
Isumaqatigiissitsiniarnermut eqqartuussiviup 2025-mi oktobarimi aalajangiineranut nangissutigalugu taama aalajangiisoqarpoq.
Naalakkersuisut tusagassiorfinnut nalunaaruteqarlutik taama allapput.
Greenland Minerals akiliinerpaassaaq
Aalajangiineq naapertorlugu Greenland Minerals A/S-ip isumaqatigiissitsiniartarfiup aalajangiisinnaatitaaneranut apeqqut pillugu Naalakkersuisut aningaasartuutaannut 90 procentit akilissavai. Aningaasat akiliutissat 14.354.937,07 koruuninik naatsorsuunneqartut ullut 30-t qaangiutsinnagit aatsitassarsioqatigiiffimmit tunniunneqassapput.
Aningaasat taakku eqqartuussisunut suliamilu sulisunut, init attartornerinut, nerisassanut allanullu atorneqartunut aningaasartuutinut akiliutaapput. Suliami allaffissornermut, angalanermut nutserinermullu aamma aningaasartuuteqartoqarsimavoq.
Taarsiinissaq pillugu apeqqummut atatillugu Naalakkersuisut aningaasartuutaannut tunngatillugu suli aalajangiisoqanngilaq.
Greenland Mineralsip Kuannersuarni aatsitassarsiornissamut qinnuteqaataa Naalakkersuisut 1. juni 2023-mi itigartimmassuk, akerleriittoqalerpoq.
Naalakkersuisoq: Aalajangiineq pissusissamisoortoq
Inuussutissarsiornermut, aatsitassanut, nukissiornermut, inatsisinut naligiissitaanermullu naalakkersuisup Naaja H. Nathanielsenip aalajangiineq nuannaarutigaa.
- Aalajangiineq, ukiarmi isumaqatigiissitsiniarnermut eqqartuussiviup piginnaatitaanera pillugu apeqqummi taperserneqarnitta pissusissamisoortumik malitsigisaa, Naalakkersuisut naammagisimaartorujussuuaat. Isumaqarpunga eqqortumik aalajangiinissaq, Naalakkersuisut suliap ingerlanera tamaat aalajangiusimasimasaat, taannatuaasoq, tassalu suliassaq eqqartuussivinni ingerlanneqartussaasoq aammalu isumaqatigiissitsiniarnermut eqqartuussivimmi ingerlanneqarsinnaanngitsoq. Aammalu suliakkiisumit suliassamik siunissaqanngitsumik suliakkiissuteqartumit aningaasartuuteqarnissamik pinngitsaalineqarsinnaaneq eqqortuusinnaanngilaq, Naaja H. Nathanielsen oqarpoq.
Suliarli suli tamakkiisumik naammassinngitsoq erseqqissarpaa:
- Suliassap illuatungiusumut, aningaasat Naalakkersuisunut aalajangiinermi tunniunneqartussatut aalajangiiffigineqartut akilereerunigit, 100 millioner koruunit tungaannut akeqarsimanera eqqarsaatigigaanni, annikinnerusunik aningaasartuuteqarnissarput kisinngoruttoq akuerisinnaavarput, oqarpoq nangillunilu:
- Maannakkut suliassaq eqqartuussivimmi ingerlaqqissaaq. Kisianni maannakkorpiaq ajugaasimanerput nuannaarutigisinnaalerparput, aammalu eqqartuussivimmi suliassami isumalluutigut ukkatarisinnaanngoratsigu oqiliallaataavoq, oqarpoq.
Nunatta Eqqartuussiviani suliaq ingerlaqqissasoq
Naak isumaqatigiissitsiniartartut suliami aningaasartuutit pillugit aalajangiigaluartut, Naalakkersuisut Greenland Mineralsillu akornanni aaqqiagiinngissut pillugu suliaq suli naammassineqanngilaq.
Suliaq Nunatta Eqqartuussiviani ingerlaqqissaaq, tassanilu apeqqutit pingaarnerit suliarineqarnissaannut suli ulluliisoqanngilaq.
Isumaqatigiissitsiniartarfimmi suliaq marsimi 2022-mili ingerlanneqarpoq. Maannalu suliap ilaa naammassineqarpoq, eqqartuussivilli taarsiissuteqarnissamik apeqqut isumaqatigiissitsiniartarfimmit ingerlateqqinneqarsinnaasoq suli suliarissagaat, Naalakkersuisut ilisimatitsipput.
