Ittoqqortoormiini innuttaasut pingajorarterutaat akerliussutsimik takutitsinermut peqataasut 

Ittoqqortoormiini innuttaasut ippassaq ataasinngornermi juulip 13-iani unnukkut arfineq-marlunut kommunip allaffiani naapipput. Akerliussutsimik takutitsinermut qanoq takkuttoqartigissanersoq aaqqissuisup Hans Brønlundip pissanngatiginikuuaa. Innuttaasunilu 325-t missaaniittuni pingajorarterutaat takkummata tupaallassimavoq.

- Nuanneq. Amerlaqaagut, inuppassuupput. Immaqa 100-t sinnerlugit. Aamma sila atoruminarami, qujanartumik, Hans Brønlund akerliussutsimik takutitsinerup aqaguani Sermitsiamut taama oqarpoq. 

Innuttaasut taama amerlatigisut takkunnerat erseqqissumik oqariartornermik takutitsisoq akerliussutsimik takutitsinermi aaqqissuisoq naliliivoq.  

- Paasinarpoq uagutsitulli aamma isumaqartorpassuusut. Ernumallutik misissuisoqannginnissaa taperserpaat, Hans Brønlund oqarpoq.

Assit nassiunniaraat 

Akerliussutsimik takutitsisut kommunip eqqaani naapinneranni Hans Brønlund oqalugiarpoq. Taassumalu kingorna akerliusut illoqarfiup iluani ingerlaaqatigiipput. Ingerlaaqatigiinnerup kingorna Kommuneqarfik Sermersuumi kommunalbestyrelsemi ilaasortaq Mette Pike Barselajsen (IA) oqalugiarpoq.

Hans Brønlundip oqalugiarnermini sooq akerliunerlutik oqalugiutigaa, uuliamimmi misissuisoqarnerani piiaasoqarneranilu qallorneqartut avatangiisinut nerisarisaminnullu mingutsitsisinnaanerat ernummatigaa.

- Naasunut siaruassagaluarpata umimmaat timmissallu nerisarisussaavaat, imaanut kuuttuussagalarpata imarmiut nerisagut eqqorneqassapput. Taava uagutsinnut kingulliulluni tuttussaagamik, taannaana aarleqqutigigiga uanga, Hans Brønlund oqarpoq.

Akerliussutsimik takutitsinermit assit akerliuffigisaminnut allanullu oqartussanut nassiutissamaarpai. 

- Neriuppunga tusaaneqarluta. Naalaaqqaalaaginnassaanga qanoq pisoqarnissaanik. 

Naalakkersuisoq: Ernumassuteqartut paasilluarsinnaavakka 

Ittoqqortoormiini innuttaasut akerliussutsimik takutitsinerata nalaani Tasiilarmiut, Narsarmiut, Nanortalimmiut, Qaqortormiut Nuummiullu tapersersuillutik illoqarfimminni aamma katersuupput. 

Aatsitassanut naalakkersuisup Múte B. Egedep (IA) ernumassuteqartut paasisinnaallugit Facebookimi quppernermini allaaseraa. 

- Inuit minnerunngitsumillu Ittoqqortoormiuni innuttaasut, ernumassuteqartut paasilluarsinnaavakka. Ernumanermut ilaatigut pissutaapput amerikamiut ingerlatseqataasut suli aalajangiisoqanngikkaluartoq, ataqqinnigatik, suliniut pillugu piviusuunngitsumik oqariartoqattaarsimanerat, Múte B. Egede taama allappoq nangillunilu: 

- Erseqqissaatigissavara: suli aalajangiisoqanngilaq. Suliaq pillugu aalajangiisoqassappat, innuttaasut tusarnaarlugit, ammasumik peqataatitsilluni aammalu pinngortitaq najukkamilu inuiaqatigiit ataqqillugit ingerlanneqassaaq.

Naalakkersuisoq taama allakkaluartoq Hans Brønlund suli toqqissisimanngilaq.

- Taamatut oqaraluartoq suli ernumanarpoq. Ukua amerikamiut maaniikkamik oqaaserinikuusaat akuersissuteqanngikkaluartoq qaqissinnaallugit nunamut containerit bulldozerinillu. Utaqqimaaginnarlutik akuersisoqarnissaanut. Aperineqaramik akuersisoqanngippammi sussavisigit? Iluamik akisinnaannginnamikku taannartaa, tatisiniaanertut uanga isigigakku, Hans Brønlund oqarpoq.