Ittoqqortoormiit nalinginnaanngitsumik kiattoq

Ittoqqortoormiini innuttaasut sapaatip-akunnerata naanerani nalinginnaanngitsumik kiassiorput.

Ittoqqortoormiit arfininngornermi juulip 18-ianni 16 gradinik kiassimasoq, DMI-p nalunaarutigaa. Nalinginnaasumik juulip qaammataani, agguaqatigiissillugu Ittoqqortoormiini 6 gradit missaanni kiattartoq, Visit Greenlandip nittartagaani allassimavoq.

- Tamassuma nassuiaatissartaa Atlantikup imartaani nassaarineqarsinnaavoq.

- Islandip kujataani naqitsinertuffik ulluni arlalinni allanngorani piuvoq. Tamatuma saniatigut Labradorimi aamma naqitsiniisaffik piuvoq. Taakkua marluk imminnut suleqatigiipput: Naqitsinertuffiup silaannaq nalunaaquttap ingerlaarfianut sangutittarpaa, naqitsiniisaffiullu silaannaq nalunaaquttap ingerlaarfiata akerlianut sangutittarlugu – taakkualu akornanni silaannaq kujasinnerusumit sakkortuumik naqisimaneqartoq Kalaallit Nunaata kangiata sineriaatigut qaffakkiartorpoq, DMI Facebookimi quppernermini allappoq.

Naqitsinerit taakkua marluk Ittoqqortoormiit eqqaaniiginnassappata aasaanerani Ittoqqortoormiit kiassiornerusinnaavoq. Taamaattorli putsilertarnissaa ilimanaateqartoq, DMI-mit ilisimatitsissutigineqarpoq.